Klei Aê Diê Blŭ: Y‑Đaniel 5:1-4; 22-31
Êlan kliăng: “Đăm ih yua anăn Yêhôwa Aê Diê ih hơăi mang ôh, kyuadah Yêhôwa amâo srăng yap kpă ôh pô yua anăn ñu hơăi mang” (Klei Kbiă 20:7).
Klei êmuh ksiêm mĭn: Ya klei mtao Belsasar thâo kơ Aê Diê Israel? Khădah thâo leh dưn ƀiădah ya klei ñu ăt ngă mơh hŏng mnơ̆ng yua mă ba mơ̆ng Sang Yang Aê Diê? Klei anăn si brei ƀuh knhuah ñu ngă hŏng Aê Diê? Ya boh tŭ truh? Si ngă mâo mơ̆ đa bruă drei ngă kƀah klei huĭ mpŭ kơ Aê Diê Ƀuôn Ala Mtao?
Dơ̆ng mơ̆ng kdrêč 4 kơ kdrêč 5 mâo hlăm brô dua pluh thŭn găn gao. Mtao Nebukatnetsar djiê leh, leh anăn anak êkei ñu Y‑Belsasar čuê đĭ jing mtao. Hlăm sa klei huă mnăm prŏng, mtao Belsasar iêu jak phung khua êmua hlăm čar. Êjai mơak đei, mtao jhŏng mă kčok mtĭl ngă hŏng mah leh anăn prăk arăng mă mơ̆ng sang yang, sang Aê Diê ti ƀuôn Yêrusalem čiăng “yua mnăm” (êlan 2-3). Amâo djŏ ôh knŏng mă mnơ̆ng doh jăk yua kơ klei huă ƀơ̆ng mnăm, mtao Belsasar wăt lŏ “bi mni kơ phung yang ngă hŏng mah, prăk, kông, msei, kyâo, leh anăn boh tâo.” (êlan 4).
Si ngă mtao Belsasar tuôm thâo mơ̆ kơ Aê Diê kơ phung Israel? Khua pô hưn êlâo Y‑Đaniel lač klă mtao Belsasar “thâo leh jih klei anăn” (êlan 22), čiăng lač ñu thâo jih leh ya klei truh kơ ama ñu hlăm kdrêč 4, thâo kơ Aê Diê bi mdlưh leh anăn bi mđĭ hlăk ama ñu lŏ bi êdah klei ngă năng djŏ hŏng Aê Diê. Ñu thâo Pô mtô ama ñu snei, Ñu jing “Pô Ti Dlông Hĭn kiă kriê hlăm ƀuôn ala mtao mnuih, leh anăn ñu brei kơ hlei pô ñu čiăng, leh anăn bi mđĭ mnuih hơăi mang hĭn brei kiă kriê.” (Y‑Đaniel 4:17). Ƀiădah lĕ, ñu jhŏng mă mnơ̆ng pioh yua hjăn kơ klei kkuh kơ Aê Diê, yua kơ bruă mnuih.
Drei amâo mâo ôh jih klei hdĭp kăp mă klei hriăm mơ̆ng klei soh wê drei pô găn. Mnuih thâo mĭn jing pô thâo mă hriăm kơ ñu mơ̆ng klei dluh lĕ pô mkăn. Mtao Belsasar jing sa čô mluk kyua ñu thâo leh klei hriăm ruă ai tiê, hêñ mlâo mơ̆ng mtao ama ñu ƀiădah ñu ăt ngă soh mơh, ngă klei soh prŏng hĭn, jhat ƀai hĭn kơ mtao ama ñu mơh. Mă mnơ̆ng yua pioh hjăn kơ klei kkuh mpŭ kơ Yêhôwa čiăng yua kơ klei huă ƀơ̆ng mnăm amâo mâo năng, jing sa klei ngă soh prŏng hŏng Aê Diê. Yua leh mnơ̆ng doh jăk Aê Diê kơ bruă soh wê, wăt lŏ dôk ngă klei mưč mač, “bi mni kơ phung yang ngă hŏng mah, prăk, kông, msei, kyâo, leh anăn boh tâo” jing klei ngă soh hŏng Aê Diê prŏng êdimima. Boh tŭ mă mơ̆ng klei amâo huĭ mpŭ kơ Aê Diê tal anei, ñu amâo lŏ mâo mmông mkra ôh. “Mlam anăn yơh arăng bi mdjiê mtao phung Kaldê, Y‑Belsasar” (êlan 30).
Hruê anei, drei đăo phung lăn ala amâo huĭ mpŭ kơ Aê Diê amâo srăng tlaih ôh mơ̆ng klei Aê Diê bi kmhal, khădah hlei pô diñu jing dưn mơh, kyuadah “Yêhôwa amâo srăng yap kpă ôh pô yua anăn ñu hơăi mang”. Tĭng nah mkăn, brei drei răng, kyuadah lu blư̆ drei hriăm thâo kơ Khua Yang leh, ƀiădah adôk mâo mơh đa hlăm klei blŭ leh anăn klei ngă ăt soh, mưč kơ Khua Yang leh anăn kơ Klei Ñu Blŭ. Hdơr bĕ, Aê Diê amâo tŭ klei arăng mưč ôh (Galati 6:7).
Si ngă mâo mơ̆ đa knuih, klei mĭn, klei blŭ, bruă ngă drei bi êdah klei dlăng hơăi mang kơ Khua Yang?
Wah lač: Ơ Khua Yang, Ih jing Mtao kơ jih jang mtao. Ih năng mă tŭ jih jang klei huĭ mpŭ, guh kơang. Akâo kơ Ih đru kâo thâo răng hlăm klei mĭn, klei blŭ leh anăn bruă ngă čiăng kơ kâo amâo ngă klei mưč kơ Ih ôh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 11:10-47
Kênh Youtube BHKTHN:
