Daniyees 5:1-4; 22-31
Nqe cim:
“Tsis txhob muab kuv lub npe mus hais ua dog ua dig, rau qhov kuv yog tus Tswv uas yog nej tus Vajtswv, kuv yuav rau txim rau cov neeg uas muab kuv lub npe mus hais ua dog ua dig.” (Khiavdim 20:7).
Lus nug rau sawvdaws xav:
- Vajntxwv Npesaxas paub dabtsi txog cov Yixalayees tus Tswv?
- Txawm yog paub, los nws tseem ua dabtsi rau tej khoom dawbhuv uas nqa hauv tus Tswv lub Tuamtsev los?
- Qhov ntawd qhia pom nws txojkev xav rau tus Tswv zoo licas? Thaum kawg raug dabtsi?
- Puas muaj yam twg uas peb tau ua saib tsis taus tus Vajntxwv saum Ntuj Ceebtsheej?
Txij li tshooj 4 hla rau tshooj 5 yog ib ncua caijnyoog ntev kwv lam 20 lub xyoo. Vajntxwv Nenpukajnexales tuag lawm thiab nws tus tub uas yog Npesaxas ua vajntxwv hloov nws chaw. Nyob rau hauv ib rooj kevcai tseemceeb, vajntxwv Npesaxas npaj ib rooj noj rooj haus rau nws tsoom nomtswv loj. Thaum zoo siab heev lawm, vajntxwv muaj tav hais kom mus thau tej khoom uas muab kub thiab nyiaj ua, uas thaud nws txiv huab hauv tus Tswv lub Tuamtsev hauv nroog Yeluxalees nqa “los hliv cawv rau lawv sawvdaws haus” (nqe 2-3). Tsis yog tsuas nqa tej khoom ntawd los haus cawv xwb, vajntxwv Npesaxas tseem “qhuas tej mlom uas muab nyiaj, muab kub, muab tooj liab, muab hlau, muab ntoo thiab muab pobzeb ua ntawd.” (nqe 4).
Vajntxwv Npesaxas puas paub txog cov Yixalayees tus Vajtswv? Tus cev lus Daniyees hais meej hais tias vajntxwv Npesaxas “twb paub tej no zoo lawm” (nqe 22), txhais tau hais tias paub txhua yam xwmtxheej uas tshwm tuaj rau nws txiv nyob hauv tshooj 4, paub hais tias Vajtswv txo nws txiv nqis thiab tomqab ntawd mam rov tsaws nws txiv rau chaw siab thaum uas nws txiv paub txo hwjchim kom tsimnyog. Vajntxwv yeej paub zoo txog Tus uas qhia vajntxwv txiv hais tias, Nws yog “Vajtswv tus uas muaj Hwjchim Loj kawg nkaus, nws muaj hwjchim loj dua tej tebchaws uas neeg ua vajntxwv kav, thiab nws xav tsa leejtwg ua vajntxwv kav tej tebchaws ntawd los tau; txawm yog tus ntse thiab tus ruam los nws yeej tsa tau.” (Daniyees 4:17). Txawm paub li ntawd, los nws tseem muaj tav siv tej khoom uas muab cais tseg cia pehawm Vajtswv coj los siv ua tej yam tsis dawbhuv thiab.
Peb tsis muaj cuabkav siv tagnrho lubneej los mus kawm tau ib zaj kawm zuj zus thaum peb ua txhaum. Tus neeg ntse yog tus uas kawm tau tej zaj kawm thaum pom luag tej ua txhaum. Vajntxwv Npesaxas yog neeg ruam, txawm yog nws twb paub txog nws txiv tej zaj kawm uas txaus ntshai thiab txaus txaj muag lawm, los nws tseem haj yam ua txhaum loj dua, phem dua nws txiv lawm thiab. Muab tej khoom dawbhuv tshwj cia pehawm tus Tswv los siv noj siv haus tsis haum kev haum cai yog ib tes haujlwm txhaum loj heev ua saib tsis taus tus Tswv. Twb siv tus Tswv tej khoom dawbhuv los ua yam txhaum lawm, los tseem “qhuas tej mlom uas muab nyiaj, muab kub, muab tooj liab, muab hlau, muab ntoo thiab muab pobzeb” thiab, ntawd yog tes haujlwm uas ua saib tsis tau tus Tswv kawg nkaus. Qhov kawg ntawm vajntxwv kev ua saib tsis taus tus Tswv yog nws tsis tshuav sijhawm los lees kev txhaum. “Hmo ntawd Npesaxas uas yog vajntxwv kav lub tebchaws Npanpiloos txawm raug luag muab tua povtseg lawm” (nqe 30).
Niaj hnub nimno, peb ntseeg hais tias neeg ntiajteb uas saib tsis taus Vajtswv yuav khiav tsis dhau Vajtswv txojkev txiav txim, txawm hais tias lawv yuav yog leejtwg, vim tus Tswv “yuav rau txim rau cov neeg uas muab Nws lub npe mus hais ua dog ua dig”. Tsis yog li ntawd xwb, peb kuj yuav tsum ceevfaj, vim ntau zaug peb kawm paub tus Tswv tiamsis tseem muaj tej lus hais thiab tes haujlwm ua saib tsis taus Vajtswv thiab Nws Txojlus. Yuavtsum nco ntsoov hais tias yeej tsis muaj ib tug yuav dag tau Vajtswv hlo li! (Kalatias 6:7).
Puas muaj yam kev xav, lus hais thiab tes haujlwm twg nyob hauv peb lubneej ua saib tsis taus Vajtswv?
Thov Vajtswv:
Tus Tswv, Koj yog Vajntxwv ntawm tej vajntxwv uas tsimnyog tau hwm, tau koobmeej. Thov pab nyuam yaus ceevfaj tej kev xav, lus hais thiab tes haujlwm kom xwv nyuam yaus tsis poob rau txojkev ua saib tsis taus Koj. Amees.
Nyeem Vajluskub hauv peb lub xyoo: I.Xwmtxheej Vajntxwv 11:10-47
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
