Klei Aê Diê Blŭ: I Y-Yôhan 4:1-3
Êlan kliăng: “…leh anăn jih jang yang amâo hưn klei Yêsu, amâo kbiă hriê mơ̆ng Aê Diê ôh.” (I Y-Yôhan 4:3a)
Klei êmuh ksiêm mĭn: Ya klei khua ƀĭng kna Y-Yôhan mtă mtăn kơ phung đăo? Si drei ngă čiăng thâo kral Yang Mngăt Jăk Aê Diê? Ya mta klei bi knăl hưn mdah kơ drei mă tŭ Khua Yang Yêsu “hriê leh hlăm kđeh kbiă hriê mơ̆ng Aê Diê”?
Kyuadah “mâo lu phung khua pô hưn êlâo soh mŭt leh hlăm lăn ala” kyuanăn khua ƀĭng kna Y-Yôhan mtă mtăn kơ phung đăo “đăm đăo kơ jih jang yang ôh”, ƀiădah brei lông dlăng phung yang thâodah diñu kbiă hriê mơ̆ng Aê Diê (êlan 1). Ñu hưn mdah sa klei sĭt nik êlam lĭn: klei mâo Yang Mngăt Jăk dôk mbĭt leh anăn ngă bruă dưi thâo kral hŏng klei Ñu hưn bi sĭt kơ Khua Yang Yêsu (êlan 2). Yang Mngăt Jăk Aê Diê đru nanao kơ jih jang mnuih hưn Khua Yang hriê leh hlăm kđeh, Ñu jing Aê Diê kluôm dhuôm, jing mnuih kluôm dhuôm, leh anăn knŏng sa hjăn Ñu jing Pô Bi Mtlaih lăn ala. Hŏng khua ƀĭng kna Y-Yôhan, Klei Mrâo Mrang Jăk dưi klah čŭn snei: “Klei Blŭ bliư̆ jing kđeh leh anăn dôk mbĭt hŏng drei” (Y-Yôhan 1:14). Yang Mngăt Jăk yơh srăng “hưn” kơ klei anăn (êlan 2). Tơdah kñăm kơ klei hưn Khua Yang Yêsu mơ̆ng Yang Mngăt Jăk, khua ƀĭng kna Y-Yôhan kñăm kơ klei hriê hlăm kđeh, bi êdah klei khăp klei pap Aê Diê prŏng hĭn êdimima. Khua Yang amâo dôk ti êngao klei hdĭp drei ôh, ƀiădah mŭt hlăm anôk anăn. Ñu hriê hlăm kđeh čiăng klam klei soh, bi hlao anôk ruă êka, leh anăn ba drei mŭt hlăm găp djuê Ñu. Yang Mngăt Jăk bi êrâo ai tiê leh anăn klei mĭn čiăng đru drei thâo kral sĭt, Khua Yang Yêsu yơh jing Pô Bi Mtlaih lăn ala trŭn hriê leh ti lăn ala čiăng bi mtlaih anak mnuih.
Yang Mngăt Jăk hưn mdah klei kpă ênô Aê Diê. Klei Blŭ hưn: “Yêsu Krist hriê leh hlăm kđeh kbiă hriê mơ̆ng Aê Diê” ăt mblang jing Ñu hriê čiăng bi mgaih mkra klei soh hŏng klei kpă ênô. Khua Yang amâo phưi lui klei soh ôh. Hlăm klei kpă ênô, Ñu tiŏ nao Anak Ñu Mâo Knŏng Sa Čô hriê čiăng tŭ klam klei phat kđi năng kơ klei soh tŭ. Yang Mngăt Jăk đru drei thâo kral klei kpă ênô doh jăk Aê Diê bi êdah leh ti kyâo bi kal.
Khua ƀĭng kna Y-Yôhan hưn êlâo brei răng kơ jih jang phung yang hngah hưn kơ klei Khua Yang Yêsu hriê hlăm kđeh, amâo kbiă hriê mơ̆ng Aê Diê ôh (êlan 3). Klei anei brei ƀuh, hŏng klei pap, Yang Mngăt Jăk răng mgang phung đăo đăm lĕ hlăm klei mplư ôh. Hŏng klei kpă ênô, Ñu hưn mdah jih klei soh wê, klei čhuai amâodah klei bi kdơ̆ng hŏng Yang Krist. Yang Mngăt Jăk brei kơ drei thâo kral klei mdê klei sĭt nik hŏng klei soh čhuai, klei mngač hŏng klei mmăt, leh anăn Klei Blŭ mơ̆ng Aê Diê hŏng klei blŭ mơ̆ng lăn ala.
Hưn mdah Khua Yang Yêsu “hriê leh hlăm kđeh” mblang jing drei đăo knang kơ Khua Yang, tui hlue Ñu, leh anăn bi mjing klei drei čuăn ngă hlăm klei sĭt nik Ñu. Mbĭt hŏng klei anăn, drei ăt knang kơ Yang Mngăt Jăk mtrang atăt drei, bi kjăp klei đăo, răng mgang drei tlaih mơ̆ng klei mplư luar, leh anăn atăt gai drei thâo săng klă klei khăp Aê Diê.
Si ngă drei thâo kral sĭt Yang Mngăt Jăk dôk hlăm klei hdĭp drei mơ̆?
Wah lač: Ơ Khua Yang, bi mni lač jăk kơ Khua Yang brei leh Yang Mngăt Jăk čiăng đru kâo thâo kral Khua Yang Yêsu leh anăn hưn mă tŭ Ñu jing Khua Yang Pô Bi Mtlaih kâo. Akâo Khua Yang đru kâo djăl pral thâo kral mâo Yang Mngăt Jăk dôk mbĭt dôk ngă bruă hlăm kâo, čiăng kơ kâo amâo lĕ hlăm klei mplư amâodah ngă soh ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 100-101
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
