Galati 5:13-18
“Na inh wă khan kơ iĕm thoi âu: Iĕm athei apinh kơdih Yang Bơhngol ‘Lơ̆ng mơ̆t pơgơ̆r iĕm ling lang. Tơdah iĕm pơm thoi noh jơhngơ̆m đon iĕm huay kơ tơchĕng pơm tơdrong kơnê̆ ôh.” (Galati 5:16)
Nơ̆r jet tơchĕng pơwao:
– ‘Bok Pôl khă lu bơngai lui tơ Galati tơdrong kiơ?
– Pơting tơdrong yak kiơ̆ Yang Bơhngol ‘Lơ̆ng, ưh kơ “arih kiơ̆ kơdih” hăm tơdrong “kiơ̆ khôi juăt”?
– Bơ̆n oei yak kiơ̆ Yang Bơhngol ‘Lơ̆ng hăm tơdrong tơ’bưh ‘mêm mơnat thoi yơ?
Hloh kơ puăn chăl lăm kơthơ, ‘Bok Pôl pơma kơ tơdrong hŏk pơhrăm jô̆ ‘lơ̆ng tơpăt; lăm chăl đơ̆ng rŏng lăm kơthơ, sư pơma gah tơdrong arih pơm ‘lơ̆ng. Năr chăl adrol sư chih gah tơdrong bơngai lui rơngei đơ̆ng tơdrong pơgŏ kăt tơdra akar păng tơdrong juăt, lei na lơ bơngai gô tơchĕng thoi so, wă khan, pơma thoi noh, bơngai lui gơh rơngei gơh pơm dôm tơdrong kiơ bơ̆n ‘maih pơm, thoi noh pơtrơp dơ̆ng sư bơtho gah trong yua iŏk tơdrong rơngei noh thoi yơ.
‘Bok Pôl pơtrơp chăl adrol păng chăl ‘nâu hăm nơ̆r: “Ơ lu ‘nhŏng oh, gah lu iĕm Kră Yang ‘Bok Kei-Dei krao iĕm kiơ̆ Sư boih, wă kơ iĕm rơngei đơ̆ng tơdrong juăt kon bơngai, mă-lei Sư ưh kơ wă kơ bơ̆n pơma khan bơ̆n rơngei đơ̆ng tơdrong juăt kon bơngai boih, mơ̆ng kơ bơ̆n wă pơm kiơ, mă ‘lơ̆ng kơnê̆ kư̆m bưh. Ưh ôh, Sư kuă ăn bơ̆n pơm thoi noh ôh. Sư wă kơ bơ̆n ‘mêm dih băl đei đon tơchĕng ‘mêm mơnat tơgŭm dih băl tơduă bơ̆n.” (trong 13). Đei ‘bar trong arih kơplah đei tơdrong rơngei, mălei ‘nĕ iŏk tơdrong rơngei noh pơm kơ ‘nhŏng oh arih kiơ̆ kơdih; dah yak năm kiơ̆ Yang Bơhngol ‘Lơ̆ng tơ’bôh. Kơplah bơtho gah tơdrong arih kiơ̆ Yang Bơhngol ‘Lơ̆ng, ‘bok Pôl ưh kơ đei pơma kơ tơdrong tơm, tơdrong juăt, na lơ wơ̆t sư yua nơ̆r “’mêm”. Sư khan “’mêm dih băl đei đon tơchĕng ‘mêm mơnat tơgŭm dih băl tơduă bơ̆n” păng “bơ̆n athei ‘mêm kơ bôl buăl thoi bơ̆n ‘mêm kơ akâu bơ̆n kơdih” (trong 13-14). ‘Nguaih kơ noh dơ̆ng, sư pơma dơ̆ng kơ “kiơ̆ dôm tơdrong” đơ̆ng Yang Bơhngol ‘Lơ̆ng tơplơ̆ hăm “kơ gơh pơm kiơ̆ kơ iĕm wă ôh” (trong 16-17); trong arih kiơ̆ Yang Bơhngol ‘Lơ̆ng kư̆m tơplơ̆ hăm tơdrong arih sa kiơ̆ kơdih (trong 13) păng “pơm kiơ̆ tơdrong juăt” (trong 18). Pơm kiơ̆ tơdrong juăt noh kiơ̆ tơdrong juăt kon bơngai; yak năm kiơ Yang Bơhngol ‘Lơ̆ng noh gơnang kơ tơdrong bơtho tơ’bôh đơ̆ng pêng Anăn ‘Bok Kei-Dei. Thoi noh, na gơh ‘bôh thoi ‘bok Pôl, yak năm kiơ̆ Yang Bơhngol ‘Lơ̆ng noh arih ‘mêm mơnat păng hiơ̆k tơgŭm dih băl, noh băt păng pơm kiơ̆ dôm tơdrong Yang Bơhngol ‘Lơ̆ng lăp đon. Đơ̆ng noh yak năm kiơ̆ Yang Bơhngol ‘Lơ̆ng lăm tơdrong tơ’bưh dih băl hăm tơdrong ‘mêm. Tơplơ̆ dơ̆ng, kiơ̆ tơdrong juăt noh pơm kiơ̆ lu tơdrong tơm hmă đĕch, ưh kơ hiơ̆k tơgŭm tơ’bưh tơduă kon bơngai dih băl.
Kiơ̆ kơ Yôhan bơngai jơ̆ng ‘bang Kră Yang, kiơ̆ Yang Bơhngol ‘Lơ̆ng noh “oei” lăm Kră Yang păng Kră Yang oei lăm bơ̆n (Yôhan 15:1-11). ‘Noh bơih tơdrong tơ’bưh mă thoi kơ dơng ‘long sư arih đơ̆ng rơh, noh Kră Yang, ăn kơ lu tơ’bla, noh lu bơ̆n păng đei plei kiơ̆ kơ đơ̆ng “oei lăm” ‘long. Kơplah noh, dôm tơdrong ‘lơ̆ng đơ̆ng bơ̆n ‘noh lĕch tơdrong bơ̆n hlôh dôm tơdrong Yang Bơhngol ‘Lơ̆ng kiơ̆ kơ tơdrong tơ’bưh lu bơ̆n hăm sư, ưh kơ sĭ đơ̆ng tơdrong bơ̆n pơm kiơ̆ khôi juăt Kră Yang na ưh kơ đei tơ’bưh kiơ hăm sư ôh. Bơ̆n gơh rơngei bơih thoi noh athei kiơ̆ Yang Bơhngol ‘Lơ̆ng.
Kơkuh kơ Ih Kră Yang, ‘bônh dêh tơpă inh gơh tơplih tơdrong arih lăm Kră Yang jing năm kiơ̆ tơdrong juăt kon bơngai hmă. Apinh Ih tơgŭm ăn kơ inh bơwei tơdrong tơ’bưh pơgơ̆p hăm Kră Yang wă kơ hlôh băt dôm tơdrong Kră Yang wă păng pơm kiơ̆. Krao khan yua anăn Kră Yang Yêsu Krist, Amen.
Bơ̆n oei yak kiơ̆ Yang Bơhngol ‘Lơ̆ng dah kiơ̆ kơdih?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 55
Kênh Youtube BHKTHN:
