Klei Aê Diê Blŭ: I Kôrantô 6:12-20
Êlan kliăng: “Aê Diê amâo pioh asei mlei kơ klei knhông ôh, ƀiădah pioh mă bruă kơ Khua Yang, leh anăn Khua Yang pioh kơ asei mlei.” (I Kôrantô 6:13b)
Klei êmuh ksiêm mĭn: Ya klei Khua ƀĭng kna Y-Pôl hưn mdah bi mklă klei yuôm bhăn asei mlei? Klei ñu mtô mơ̆ng ya tur knơ̆ng? Si ih hdĭp ti krah lăn ala bi mđĭ kơ klei êngiê yua asei mlei hŏng klei phưi tha?
Dhar kreh Grĕk êtuh thŭn tal sa brei thâo mngăt jing yuôm bhăn, bi asei mlei jing “msat dơr amâodah sang mnă krư̆ mngăt”. Kyua anăn, mâo dua klei mĭn bi mklăk kơ asei mlei: klei mĭn mjuăt knap asei mlei, duah klei mkhư̆ klei čiăng mơ̆ng kđeh asăr; leh anăn klei mĭn yua asei mlei hlue si klei čiăng. Klei mĭn tal dua dôk mâo êdah kdlưn ti Kôrantô. Êngao anăn, hŏng klei Khua ƀĭng kna Y-Pôl mtô kơ klei êngiê mơ̆ng klei bhiăn phung đăo hlăm Krist, lu phung đăo thâo săng soh kyua anăn hdĭp êngiê hlue si klei kđeh čiăng.
Khua ƀĭng kna Y-Pôl hưn mdah leh lu klei bi mklă yuôm bhăn kơ asei mlei, boh nik hlăm boh klei djŏ tuôm kơ “klei knhông” (êlan 13-18). Tal sa, ñu bi mklă “amâo pioh asei mlei kơ klei knhông ôh, ƀiădah pioh mă bruă kơ Khua Yang, leh anăn Khua Yang pioh kơ asei mlei”(êlan 13). Ñu bi hmô, ya drei ƀơ̆ng amâo yuôm bhăn ôh kyua ăt srăng êgao mơh, ƀiădah ya bruă drei ngă hŏng asei mlei snăn mdê. Kyua msĕ si Khua Yang Yêsu mâo asei mlei kbiă lŏ hdĭp, asei mlei drei ăt srăng dưi kbiă lŏ hdĭp hlăm hruê knhal tuč. Klei mĭn Khua Yang knŏng bi mtlaih mngăt đuč jing amâo djŏ hlue si Klei Aê Diê Blŭ ôh. Mngăt yuôm bhăn, djŏ snăn, ƀiădah asei mlei ăt yuôm bhăn mơh, kyua asei mlei anei srăng dưi kbiă lŏ hdĭp hlăm hruê drei bi tuôm hŏng Khua Yang.
Tal dua, ñu ba tur knơ̆ng mơ̆ng bruă Ađam leh anăn Êwơ jing sa anăn hlăm asei mlei (Klei Mphŭn Dơ̆ng 2:24) čiăng brei ƀuh klei bi mguôp kơ asei mlei jing sa klei bi mguôp êlam, yuôm bhăn. Kyua anăn, klei bi mguôp hlăm asei mlei hŏng klei ngă knhông jing sa klei bi mguôp amâo năng ôh leh anăn soh jhat.
Tal tlâo, ñu lŏ mñă klă klei hriăm hlăm klei đăo jing Yang Mngăt Jăk dôk kiă kriê hlăm klei hdĭp phung đăo kơ Krist, leh anăn “Aê Diê blei leh diih hŏng sa ênoh” hŏng klei djiê Anak Aê Diê. Kyua anăn, asei mlei drei mâo ênoh yuôm leh anăn brei dưi yua čiăng “bi guh kơang bĕ Aê Diê” (êlan 20).
Hĭn mơh, dlông rŏng lăn drei dôk hdĭp dôk mđĭ klei hdĭp hlue si kđeh čiăng “knŏng amâo ngă jhat kơ hlei pô ôh”! Arăng hlue si klei ală čiăng hŏng rup klei knhông; êngiê bi dôk êkei mniê êlâo kơ jing ung mô̆, êngao kơ ung mô̆, hlăk êjai ăt nao sang kkuh mpŭ leh anăn mă bruă kơ Aê Diê! Phung ƀuôn sang Aê Diê brei hdơr: “amâo pioh asei mlei kơ klei knhông ôh, ƀiădah pioh mă bruă kơ Khua Yang, leh anăn Khua Yang pioh kơ asei mlei” (êlan 13b). Hlăm hruê knhal tuč, Khua Yang bi mtlaih drei kluôm ênŭm wăt asei mlei, mngăt. Kyua anăn, dŭm hruê hdĭp ti lăn, brei yua asei mlei pô hŏng klei doh jăk kyua Khua Yang Aê Diê čiăng bi guh kơang Anăn Ñu.
Drei dôk hlue ngă tui si klei kđeh čiăng amâo hlue ngă ôh klei bhiăn Aê Diê mtô kơ klei răng kriê asei mlei mơ̆?
Wah lač: Ơ Khua Yang, akâo kơ Ih đru kâo hdơr asei mlei kâo yuôm snăk. Kâo ƀuăn srăng yua asei mlei kâo bi guh kơang Anăn Ih čiăng kơ hruê knhal tuč kâo dưi bi mlih hlăm asei mlei, hdĭp mbĭt hŏng Ih hlăm Ƀuôn Ala Mtao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
