1 Kauleethaus 6:12-20
Nqe cim:
“Tus Tswv tsis tsim lub cev cia ua kev nkauj kev nraug, tiamsis yog tsim los cia pehawm tus Tswv” (1 Kauleethaus 6:13b)
Lus nug xav:
– Timthawj Paulus hais meej tej yam tseemceeb twg txog lub cev?
– Timthawj Paulus tej lus qhia cog rau tej lub plag twg?
– Peb yuav tsum ua neej li cas rau lub ntiajteb uas txhawb nqa lub cev rau txoj kev ua phem ua qias?
Cov Kilis txojkev coj noj coj ua tim ib qhia hais tias tus ntsujplig thiaj li tseemceeb, ho lub cev yog lub “qhov ntxa lossis tsev lojcuj kaw tus ntsujplig”. Vim li ntawd, muaj ob txojkev xav fab sib txawv txog lub cev; txojkev xav fab (quan điểm) txwv lub cev, nrhiav kev tswj yus lub cev txojkev ntshaw; thiab txoj kev xavfab ywjpheej siv yus lub cev. Txojkev xav fab tim ob yog txoj uas coj feem coob hauv Kauleethaus. Timthawj Paulus qhia hais tias tus ntseeg tau ywjpheej hauv Tswv Yexus txoj kevcai, vim li ntawd ntau tus ntseeg to taub yuam kev thiaj ua neej ywjpheej kom txaus yus lub cev kev ntshaw.
Timthawj Paulus hais meej tej yam tseemceeb txog lub cev, tshwjxeeb yog ntawm txoj “kev nkauj kev nraug”, kev deev “niamntiav” (nqe 13-18). Tim ib, timthawj Paulus hais meej “Tus Tswv tsis tsim lub cev cia ua kev nkauj kev nraug, tiamsis yog tsim los cia pehawm tus Tswv” (nqe 13). Timthawj Paulus piv, noj dabtsi mus rau hauv plab tsis tseemceeb vim yuav dua mus, tiamsis qhov uas yuav ua ib yam dabtsi rau lub cev mas txawv. Vim zoo ib yam li Tswv Yexus muaj lub cev sawv rov qab los, thiab peb lub cev los hnub kawg yeej yuav sawv rov qab los thiab. Txoj kev xav uas hais tias Vajtswv tsuas cawm tus ntsujplig xwb mas yeej tsis raws li Vajluskub qhia. Tus ntsujplig tseemceeb, yeej yog, tiamsis lub cev los yeej tseemceeb kawg thiab, vim lub cev no yuav sawv rov qab los hnub uas peb ntsib tus Tswv.
Tim 2, timthawj Paulus muab lub plag ntawm Adas thiab Evas nkawd koom ua ib lub cev (Chivkeeb 2:24) los qhia pom hais tias kev koom ua ib lub cev yog ib txojkev koom tseemceeb thiab zoo heev. Vim li ntawd, koom ib lub cev nrog niamntiav yog ib txojkev koom tsis tsimnyog thiab yog kev txhaum.
Tim 3, timthawj Paulus hais dua txog Vaj Ntsujplig tabtom nyob hauv tus ntseeg lub neej, thiab “Vajtswv twb txhiv nej kim kawg li los lawm” los ntawm Vajtswv tus Tub kev tuag. Vim li ntawm, peb lub cev muaj nqis thiab yuav tsum cia siv “rau Vajtswv tau ntsejmuag” (nqe 20).
Lub ntiajteb uas peb tabtom nyob no txhawb nqa rau ywjpheej lub cev heev dua txhua lub sijhawm “tsuas yog tsis ua phem rau leejtwg xwb”! Tibneeg ywjpheej rau lub qhovmuag saib tej duab liab qab, ywjpheej ua nkauj ua nraug ua ntej sib yuav lossis sab nraum yus tus pojniam tus txiv thaum uas tseem mus pehawm ua Vajtswv haujlwm! Vajtswv cov menyuam yuav tsum nco ntsoov “Tus Tswv tsis tsim lub cev cia ua kev nkauj kev nraug, tiamsis yog tsim los cia pehawm tus Tswv” (nqe 13b). Thaum txog hnub kawg, Vajtswv yuav cawm tagnrho peb lub cev thiab peb tus ntsujplig. Vim li ntawd, thaum tseem nyob rau hauv lub ntiajteb ntawm no, cia li siv peb lub cev kom dawbhuv vim Vajtswv kom ua rau Nws lub npe raug qhuas.
Thov Vajtswv,
Tus Tswv, thov pab kom nyuam yaus nco ntsoov hais tias nyuam yaus lub cev muaj nqis heev. Nyuam yaus cog lus hais tias yuav siv nyuam yaus lub cev los qhuas thiab ua kom Koj lub npe tau koobmeej. Thov pab kom nyuam yaus ua neej raws li Koj siab nyiam, kom txog hnub kawg nyuam yaus tau txais lub cev tshiab thiab tau nyob nrog Koj mus ib txhis saum Ntuj Ceebtsheej. Nyuam yaus tuav Tswv Yexus Khetos lub npe thov, Amees.
Peb puas tabtom ua raws li nqaij tawv kev ntshaw thiab tsis mloog raws li Vajtswv tej lus qhia uas yuav tau ceev lub cev?
Nyeem Vajluskub hauv peb lub xyoos: Malakaus 3
Kênh Youtube BHKTHN:
