II Hơ’mon 29:20-24
“Mă-lei sư gô iŏk đak ôp klak păng tơkong. Đơ̆ng noh lu ‘bok soi gô ‘buh dan đĭ tơmam soi tơ kơpal chơnang soi, noh boih tơmam soi ‘buh, wă khan tơmam soi ‘buh lăm ŭnh sa wă pơyơ̆r đei ‘bâu phu ‘lơ̆ng ăn kơ Kră Yang” (Lêwi 1:9)
Nơ̆r jet tơchĕng pơwao:
– Pơtao Hesekia hlôi pơm kiơ đơ̆ng rŏng kơ hơmet rơgoh Hnam Akŭm tơm?
– Tơdrong pơtao Hesekia pơm noh tơ’bôh jơhngơ̆m sư thoi yơ?
– Dang ei bơ̆n pơyơ̆r kiơ ăn kơ Kră Yang wă ‘mong tơdrong Sư‘mêm?
Đơ̆ng rŏng kơ hơmet rơgoh Hnam Akŭm tơm bơih,tơdong pơyơ̆r dơ̆ng Hnam Akŭm tơm noh kăl kơ jah pơyơ̆r ngei bơih. Yua kơ thoi noh, na pơtao Hesekia “iung đơ̆ng hrôih” krao pơpôi đĭ lu kuan tih mă pơgơ̆r lăm pơlei, na năm tŏk tơ Hnam Kră Yang; tơdrong pơtao Hesekia pơm noh tơ’bôh jơhngơ̆m sư ‘maih pơjing dơ̆ng tơdrong kơkuh kơ Kră Yang. Lu sư chĕp ba tơpơh tŏ rơmo tơno, tơpơh tŏ triu tơno, tơpơh tŏ kon triu păng tơpơh tŏ bơbe tơno, noh tơ’bôh tơdrong ‘lơ̆ng tôm yua kơ lu sư ‘maih wă kơ Kră Yang sŭt rơgoh dôm tơdrong yoch lu sư ding mă lu sư‘lơ̆ng tôm. Lu sư pơyơ̆r lu sem dơrong noh pơm tơmam soi huai iŏk dêh char lu sư đơ̆ng tơdrong yoch, wă khan huai iŏk hnam dơnŏ pơtao đơ̆ng tơdrong yoch; huai iŏk Hnam akŭm tơm, wă khan huai iŏk lu bơngai jang lăm hnam akŭm tơm noh huai iŏk lu sư đơ̆ng yoch păng wă huai iŏk Hnam akŭm tơm hloi ‘mơ̆i yua kơ đe pơm pơ’mê̆ lê̆ bơih, kư̆m wă huai iŏk Juđa wă khan huai iŏk đĭ-đăng kon pơlei pơla đơ̆ng tơdrong yoch.
Lu ’bok soi pơyơ̆r ‘bar anăn tơmam soi wă hơlơ̆k pơyơ̆r dơ̆ng Hnam akŭm tơm.Mă mĭnh, lu tơmam soi ‘buh (tr.24,27) lu sư pơyơ̆r noh rơmo tơno, triu tơno păng kon triu. ‘Nâu bơih lu sem dơrong mă đe ‘buh pơkhôi wă pơm tơmam soi pơyơ̆r ăn kơ Kră Yang, ‘nâu wă pơma kơ lu bơngai mă kơkuh kơ Kră Yang,lu sư pơyơ̆r đĭ jơhngơ̆m păng chu yom tôm tơdrong. Tơmam soi ‘nâu kư̆m wă khan pơm ăn mă rơgoh păng rơgoh ‘lơ̆ng (Lêwi 16:19). Mă ‘bar, tơmam soi huai bơngai yoch, đe pơyơ̆r hăm lu bơbe tơno. (tr.23), wă kơ Kră Yang sŭt lê̆ tơdrong yoch kon pơlei đơ̆ng anăp Sư. Pơtao păng tơpôl kon pơlei dan ti lu sư kơpal lu kon bơbe wă kơ tơdrong yoch lu sư ‘bơm tơ lu bơbe noh. Tơdrong yoch lu kon pơlei,Kră Yang iŏk lê̆ đơ̆ng lu sư na tơpŭ lê̆ tơ lu kon bơbe pơm tơmam soi noh.
Lu tơmam soi chăl Pah Pơgơ̆p Pơkă So wă pơma kơ tơdrong ‘Bok Krist, păng dôm lu tơdrong kiơ mă Sư pơm ăn kơ bơ̆n tơ kơpal ‘long pơglang. Dang ei, lu bơngai lui bơ̆n ưh pă pơyơ̆r tơmam soi huai yoch bơngai đơ̆ng yoch bơih, yua kơ ‘Bok Krist hlôi lôch tang bơ̆n bơngai yoch. Bơ̆n ưh pă pơyơ̆r sem dơrong pơm tơmam soi ‘buh, mălei kư̆m thoi chơnang ‘măn soi tơmam soi ‘buh chăl Pah Pơgơ̆p Pơkă So athei wei ling-lang ưh kơ gơh pĭt ŭnh. (Lêwi 6:8-13), lu bơngai lui bơ̆n dang ei, tơdrong pơyơ̆r akâu, chu yom kơ Kră Yang kư̆m athei khŏm wei ling-lang ưh kơ gơh kơtĕch ‘muăt ‘bơ̆t jơ ayơ ôh.’Bok Pôl bơtho khan kơ Lu Bơngai lui: “Ơ lu ‘nhŏng oh, bơ̆n băt bơih’Bok Kei-Dei ‘mêm kơ bơ̆n tôch bơneh dang noh,na bơ̆n athei pơjao akâu bơ̆n kơ Sư, ’nĕ pă pơm yoch,pơm kiơ̆ kơ Sư đĕch, noh na Sư lăp đon kơ bơ̆n.” (Rôm 12:1). Kră Yang ưh kơ athei bơ̆n khŏm lôch gah akâu thoi sem dơrong sơ̆ ôh,mălei athei bơ̆n arih pơyua kơ Sư. Rim năr, rim jơ phŭt lăm chăl arih, bơ̆n athei pơyơ̆r akâu bơ̆n kơ Sư, thoi tơmam soi arih păng’lơ̆ng rơgoh, ‘noh wă khan bơ̆n weh ataih đơ̆ng tơdrong arih bơngai ala teh yoch kơnê̆, wă arih tơplih ‘nao đơ̆ng Kră Yang ăn (Rôm 12:2; Philip 4:18). Đĭ-đăng dôm tơdrong noh gô nhen thoi tơmam ‘bâu phu , wă khan tơmam soi mă Kră Yang lăp đon păng drơ̆ng iŏk.
Tơdrong arih lu bơ̆n hăm trŏ thoi tơmam soi arih păng ‘lơ̆ng rơgoh lăp đon Kră Yang dah ưh?
Kơkuh kơ Ih Kră Yang, inh bơnê kơ Ih, yua kơ Ih Tơ’ngla ‘mêm mơnat, Ih pơklaih, pă jô̆ yo dôm tơdrong yoch inh. Apinh Ih ăn kơ inh đĭ jơhngơ̆m pơyơ̆r chăl arih inh thoi tơmam soi arih păng ‘lơ̆ng rơgoh, Ih lăp đon.Inh krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 12
Kênh Youtube BHKTHN: