II Hơ’mon 31:20-21
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm kơ̆l ‘bai: Pơm Tơdrong ‘Lơ̆ng, Tơpăt păng Tơpă kiơ̆ kơ sơ̆p hla bơar IIHơ’mon 31: 20-21.
20 Tơ jơ̆p lăm char Juđa, Hesekia pơm thoi noh, sư pơm tơdrong ‘lơ̆ng tơpăt ‘bơ̆t anăp Kră Yang ‘Bok Kei-Dei lu sư. 21 Dôm tơdrong jang sư pơm, gah Hnam Kră Yang ‘Bok Kei-Dei gah tơdrong wei răk khôi juăt păng nơ̆r tơtă, gah tơdrong chă Kră Yang ‘Bok Kei-Dei sư jang đĭ jơhngơ̆m, na tơdrong jang sư rai tŏk keh ‘lơ̆ng.
Trong tơm ‘bai pơhrăm ‘nâu:
“Tơ jơ̆p lăm char Juđa, Hesekia pơm thoi noh, sư pơm tơdrong ‘lơ̆ng tơpăt ‘bơ̆t anăp Kră Yang ‘Bok Kei-Dei lu sư.” (II Hơ’mon 31:20)
Nơ̆r jet tơchĕng pơwao:
– Pơtao Êsêkia đei bơ̆jang hăm jơhngơ̆m thoi yơ, đei yua tơdrong kiơ?
– Wă kơ lu bơ̆n đei pŭn hiôk, chơt hiôk, hơđơ̆ng noh tơdrong kiơ?
Kơkuh kơ đĭ đăng,
‘Bar trong lăm sơ̆p hla bơar Nơ̆r ‘Bok Kei-Dei ‘nâu đei roi gah tơdrong arih pơtao Êsêkia păng kư̆m pơtôch lăm chăl 29 truh 31 lăm hla bơar IIHơ’mon. Đơ̆ng pơtơm chăl 29 đei roi tơbăt gah pơtao Êsêkia tŏk pơm pơtao kơplah ‘bar jĭt pơđăm sơnăm, pơgơ̆r ‘bar jĭt tơsĭn sơnăm tơ Jêrusalem “ pơm tơdrong ‘lơ̆ng tơpăt ‘bơ̆t anăp Kră Yang Yêhôwa ‘Bok Kei-Dei lu sư” pơtôch chăl pêng jĭt mônh kư̆m đei roi tơbăt gah pơtao “ pơm tơdrong ‘lơ̆ng tơpăt ‘bơ̆t anăp Kră Yang Yêhôwa ‘Bok Kei-Dei lu sư” tơm hloh noh lăm pêng chăl ‘nâu chih gah tơdrong pơm ‘lơ̆ng, tơpăt păng tơpă đơ̆ng pơtao pơm, lăm noh đei tơdrong jang pơrăm rup yang, tơiug dơ̆ng tơdrong akŭm kơkuh kơ Kră Yang tơ hnam akŭm Jêrusalem, krao pơtơm kon pơlei wơ̆t dơ̆ng tơ Kră Yang pămg bơwei tơdrong Phĕt năm brih, tơiung lu bơngai bơ̆jang kơ Kră Yang lăm hnam akŭm, păng tơiung dơ̆ng tơdrong pơyơ̆r wă kơ tơgŭm lu ‘bok soi păng bơngai Lêvi.
Tơdrong pơtao Êsêkia hiơ̆k tih hloh noh đei chih lăm pêng chăl ‘nâu ưh kơ trŏ gơh pơgơ̆r lăm teh đak dah tơdrong đe ư-ang, mă tơpă noh pơtao pơm tơdrong ‘lơ̆ng tơpăt tơpă ‘bơ̆t anăp Kră Yang. ‘Bar trong pơtôch ‘nâu tơ’bôh tơdrong pơtao kơnhăm kư̆m thoi pơtao chă trong pơm wă kơ đei yua noh “đei pŭn hiôk” jing mơdrŏng, keh jing ‘lơ̆ng đơ̆ng dôm tơdrong pơtao jang, lăm tơdrong chă Kră Yang adrol, pơtao chu yom pơm kiơ̆ thoi Kră Yang wă mă đei tơ’bôh bơih lăm Tơdrong juăt păng Khôi juăt Kră Yang wă ba ăn kơ kon pơlei wơ̆t tơ Kră Yang. Pơtao Adrin đĭ jơhngơ̆m wă chông kon pơlei wơ̆t kơkuh kơ Kră Yang tơ hnam akŭm, păng dôm tơdrong pơtao jang đei Kră Yang ‘Bok Kei-Dei ăn keh jing, đei kon pơlei lăp đon chu pơm.
Pơtao Êsêkia băt mơn tơdrong mơdrŏng tơpă, đơ̆ng gah bơhngol hăm mŭk tơmam, đei minh tơdrong kơplah pơm kiơ̆ tơdrong juăt păng Nơ̆r Kră Yang tơtă, kư̆m thoi chă Kră Yang đĭ jơhngơ̆m (trong 20-21). Pơtôch lăm hla boar Hơ’mon gah minh tơdrong chăl arih pơtao Êsêkia kư̆m trŏ kơ Kră Yang lăng gah tơdrong arih sư, noh bơih tơdrong arih pơm kơ Kră Yang lăp đon, đei Kră Yang ăn pŭn hiôk. Đei yua đơ̆ng đon lui păng đơ̆ng lăm jơhngơ̆m pơtao đei yua pŭn hiôk tôm mah ăn kơ đĭ đăng kon pơlei mơ̆n. tơdrong âu pơtao Đawĭt kư̆m đei bơtho pơtao Salômôn; pơtao Salômôn chu pơm kiơ̆ păng đei keh jing, mơdrŏng, jing kon pơlei Kră Yang bơih, lu bơ̆n kư̆m athei arih ‘lơ̆ng tơpăt, ‘bơ̆t anăp Kră Yang ‘Bok Kei-Dei păng pơm kiơ̆ Nơ̆r Sư bơtho, mă khan arih thoi noh đei tơ’bơ̆p tơdrong pơhlŭ, pơgăn lu bơ̆n, tơdrong lu bơ̆n kơnhăm tih tin noh chă Kră Yang ưh kơ sĭ chă mŭk tơmam, tơdrong ư-ang, pơm thoi noh gơh tơproh ‘lơ̆ng, chơt hiôk, hơđơ̆ng.
Bĕ lu bơ̆n wang pôm jơhngơ̆m đon krao khan,
Kơkuh kơ Ih, ơ Kră Yang apinh Ih ăn kơ inh ling pơm tơdrong ‘lơ̆ng, tơpăt, tơpă ‘bơ̆t Kră Yang, chă Kră Yang hăm đĭ jơhngơ̆m, đĭ chăl arih, wă kơ Kră Yang lăp đon ling lang yua inh bơ̆jang lăm hnam Kră Yang, krao khan yua anăn Kră Yang Yêsu Krist. Amen.
Ơ đĭ đăng bơngai mơ̆ng mă ‘mêm kơeng,
Tơdrong arih lu bơ̆n hăm oei bơ̆jang kơ Kră Yang đĭ jơhngơ̆m, hăm tơpăt, tơpă ưh?
Arih pơm trŏ ‘lơ̆ng tơpăt
Hơpơi wă kơ adrin ră roi tơdrong ‘lơ̆ng
Chă tơdrong pŭn hiôk đơ̆ng Yang ‘Bă
Hơpơi apinh đi chăl arih oei lăm Kră Yang
Đŏk sơ̆p hla bơar nơ̆r ‘Bok Kei-Dei lăm pêng sơnăm: I Hơ’mon 3-4
Kênh Youtube BHKTHN:
