Klei Aê Diê Blŭ: Klei Mtô Mñă Klei Bhiăn 9:15-21
Êlan kliăng: “Leh anăn kâo buôn ti anăp Yêhôwa msĕ si tal êlâo pă pluh hruê leh anăn pă pluh mlam; kâo amâo tuôm ƀơ̆ng kpŭng ôh, kăn mnăm êa rei, kyua jih klei soh diih ngă leh êjai ngă klei jhat ti anăp ală Yêhôwa mčhur ai ngêñ Ñu.” (Klei Mtô Mñă Klei Bhiăn 9:18).
Klei êmuh ksiêm mĭn: Hlăk phung ƀuôn sang Israel ngă klei soh prŏng, si klei Aê Diê ăl ngêñ kơ diñu? Ya bruă klam Y-Môis ngă plah wah phung ƀuôn sang Aê Diê hŏng Aê Diê? Knhuah ngă Y-Môis bi êdah si mnuih ñu jing? Si knhuah drei ngă tơdah thâo kơ ayŏng adei ngă klei soh hŏng Aê Diê?
Hlăm trăn Klei Aê Diê Blŭ anei, Y-Môis lŏ yăl dliê wĭt klei Aê Diê ăl ngêñ hlăk ƀuh phung ƀuôn sang Ñu ngă klei soh kkuh kơ rup yang. Kyua klei anăn yơh, Aê Diê ăl ngêñ snăk tơl čiăng bi rai jih phung ƀuôn sang Israel leh anăn Y-Arôn, ayŏng Y-Môis. Ti djiêo rup Aê Diê ăl ngêñ snăk jing rup sa čô Y-Môis hŏng jih ai tiê kơ phung ƀuôn sang Israel. Hĭn kơ jih jang pô mkăn, Y-Môis thâo săng klă klei ktrŏ kjham leh anăn jêč ruăt kơ mta čuăn anei. Anei jing mta čuăn djŏ kơ klei hdĭp leh anăn klei djiê. Hlăk Y-Môis ƀuh phung phung ƀuôn sang Aê Diê dôk ti anăp klei rai luč, ñu tŭ ư dôk ti anăp kăp tŭ jih hrô brei kơ phung ƀuôn sang Aê Diê. Ñu klăm buôn ti anăp Aê Diê pă pluh hruê pă pluh mlam, amâo tuôm ƀơ̆ng kpŭng ôh, kăn mnăm êa rei (êlan 18). Êgao hĭn kơnăn, ñu bi rai jih rup yang soh jhat phung ƀuôn sang Israel, ba čuh rup êđai êmô mah hŏng pui, bi mčah, ktit tơl ƀhĭ jing ƀhơ̆k leh anăn dlăm ƀhơ̆k anăn hlăm hnoh êa đoh trŭn mơ̆ng čư̆ (êlan 21). Kyua hŏng klei ñu jih ai tiê kwưh akâo brei kơ phung ƀuôn sang yơh, Aê Diê wĭt lač pap brei leh klei soh diñu (êlan 19).
Găn hŏng klei truh anei, drei ƀuh Y-Môis amâo djŏ knŏng jing khua pô hưn êlâo kơ Aê Diê, khua kiă kriê phung ƀuôn sang Israel, ƀiădah ñu ăt jing pô bi mgrăng plah wah phung ƀuôn sang Israel hŏng Aê Diê mơh. Kyuanăn yơh, klei soh phung ƀuôn sang Aê Diê dưi mâo klei pap brei, leh anăn diñu dưi lŏ mâo klei bi mguôp hŏng Aê Diê.
Lu hlăm phung drei tơdah thâo kơ ayŏng adei drei hlăm Phung Sang Aê Diê ngă klei soh ktrŏ kjham, snăn drei kreh mâo klei kdơ̆ng wĭt êdu ai. Đa đuĕ kbưi mơ̆ng diñu amâo čiăng lŏ mjĕ giăm ôh, đa blŭ êkŭt bi lar čiăng kơ lu mnuih thâo… Ƀiădah ƀiă pô mâo klei ruă ênguôt ai tiê amâodah čiăng wah lač brei kơ klei awăt êdu ayŏng adei drei. Klei kdơ̆ng wĭt êdu ai msĕ snăn, amâo dưi đru ayŏng adei drei dôk lĕ hlăm klei soh, dưi jing jăk hĭn ôh. Sĭt yơh klei soh ayŏng adei drei ngă, amâo djŏ jing bruă klam drei ôh, ƀiădah amâo djŏ ôh kyua klei anăn, drei wir rŏng ngă ngai ti anăp klei truh ruă ênguôt diñu. Brei drei hriăm mơ̆ng rup bi hmô Y-Môis, jih ai tiê kwưh akâo brei kơ diñu, kăp dôk ti anôk pô bi mgrăng. “Jăk mơak yơh phung đru brei klei êđăp ênang hdơ̆ng mnuih, kyuadah Aê Diê srăng pia diñu phung anak Aê Diê.” (Y-Mathiơ 5:9). Aê Diê ăt dôk duah phung myơr jih klei hdĭp kăp ngă bruă bi mgrăng anăn.
Si knhuah drei kreh ngă tơdah thâo kơ ayŏng adei drei ngă soh hŏng Aê Diê?
Ơ Khua Yang, akâo kơ Ih brei kâo thâo pap kơ phung ayŏng adei kâo ti anăp klei diñu awăt êdu. Akâo kơ Ih đru kâo jih ai tiê kwưh akâo brei kơ phung ayŏng adei kâo, kăp ngă bruă bi mgrăng msĕ si klei bi hmô Y-Môis ngă leh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 24
Kênh Youtube BHKTHN:
