Klei Aê Diê Blŭ: I Y-Pêtrôs 2:4-6
Êlan kliăng: “Hriê bĕ giăm Ñu, Pô jing Boh Tâo hdĭp, phung mnuih hngah leh ƀiădah jing Pô Aê Diê ruah leh anăn yap yuôm”(I Y-Pêtrôs 2:4)
Klei êmuh ksiêm mĭn: Khua ƀĭng kna Y-Pêtrôs yua rup “Boh Tâo Hdĭp” čiăng mtô kơ ya klei? Si srăng ngă čiăng kơ Phung Sang Aê Diê bi mguôp jing sa djŏ tui si klei Aê Diê čiăng? Ya drei srăng ngă čiăng đru bi mkŏ mjing klei bi mguôp jing sa hlăm Phung Sang Aê Diê?
Phung Sang Aê Diê jing sa phung đăo leh kơ Yêsu Krist, jing sa phung pioh brei mdê mơ̆ng lăn ala, bi kƀĭn mbĭt čiăng kkuh mpŭ leh anăn mă bruă kơ Aê Diê Tlâo Čô Yang. Khua ƀĭng kna Y-Pêtrôs yua rup “Boh Tâo Hdĭp” jing Khua Yang Yêsu, leh anăn grăp čô phung đăo kơ Ñu jing boh tâo hdĭp mđrăm mbĭt mdơ̆ng sa boh sang myang jing Phung Sang Aê Diê. Ñu mtă kơ phung djiêl leh thâo sĭt kơ Khua Yang jing jăk (I Y-Pêtrôs 2:3), snăn hriê bĕ giăm Khua Yang Yêsu. Boh blŭ “hriê giăm” čiăng lač kơ klei bi mguôp sĭt suôr. “Hriê giăm Ñu” jing hriê mŭt hlăm klei bi mguôp hŏng Khua Yang Yêsu, bi mguôp sĭt suôr hŏng Ñu msĕ si adhan hŏng phŭn boh kriăk ƀâo.
Snăn yơh, Phung Sang Aê Diê jing phung mâo knuih mdê mdê, mâo klei čiăng mdê mdê bi mguôp mbĭt jing sa, mdơ̆ng atur klei đăo ti dlông Khua Yang Yêsu Krist sơăi, thâo kral Ñu “jing Boh Tâo hdĭp, phung mnuih hngah leh ƀiădah jing Pô Aê Diê ruah leh anăn yap yuôm” (êlan 4). Kyuanăn, Phung Sang Aê Diê jing “sa boh sang myang”, čiăng lač sa boh sang hlăm klei hdĭp myang, mâo Yêsu Krist jing atur, grăp čô phung đăo jing sa klŏ boh tâo bi đru mkŏ mdơ̆ng klei đăo hdơ̆ng phung đăo, mjing klei bi mguôp jing sa hlăm sang Aê Diê.
Mâo lu mnuih thâo săng soh kơ klei bi mguôp jing sa jing brei mâo klei sa ai, sa klei mĭn hŏng diñu, tơdah amâo mâo sa ai, sa klei mĭn ôh diñu srăng lač “amâo mâo klei bi mguôp jing sa ôh”, kyuanăn srăng mâo klei bi mguôp amâo djŏ tui si klei Khua Yang čiăng ôh. Klei Aê Diê Blŭ lač bi mguôp jing sa hlăm Phung Sang Aê Diê jing bi mguôp jing sa hŏng Khua Yang, amâo djŏ bi mguôp mă hdơ̆ng phung đăo ôh, msĕ si rup “boh tâo hdĭp” hlăm sa boh sang myang. Čiăng Phung Sang Aê Diê mâo klei bi mguôp jing sa hŏng klei djŏ, brei grăp čô phung đăo jing “boh tâo hdĭp” sĭt, mâo Yang Mngăt Jăk dôk hlăm ai tiê. Răng bĕ, kyuadah Klei Aê Diê Blŭ brei thâo Phung Sang Aê Diê ti lăn ala anei mâo phung biăp wăt phung bê mơh, mâo rơ̆k jhat wăt mdiê ƀlê, phung pô mtô sĭt leh anăn phung pô mtô soh. Drei amâo dưi bi mguôp jing sa hŏng phung mâo ƀô̆ mta hlăm Phung Sang Aê Diê ƀiădah amâo djŏ “boh tâo hdĭp” ôh. Grăp čô phung đăo kơ Krist sĭt, măng ai ya bruă diñu djă, ăt brei ñu luă gŭ mơh leh anăn mbĭt mđrăm mdơ̆ng “sa boh sang myang”, amâo djŏ mkŏ mjing sa phung mnuih ôh. Grăp čô phung đăo kơ Krist sĭt srăng “jing phung khua ngă yang doh jăk, čiăng myơr mnơ̆ng ngă yang myang bi mơak kơ Aê Diê” hŏng klei hdĭp doh jăk, thâo khăp mơ̆ng klei blŭ hlŏng kơ bruă ngă hŏng Khua Yang leh anăn hŏng ayŏng adei hlăm klei đăo. Jih jang klei Phung Sang Aê Diê mă bruă, bi kƀĭn srăng ngă ti dlông atur čiăng “bi mơak kơ Aê Diê hlăm Yêsu Krist” sơăi (êlan 5). Akâo Khua Yang đru drei jum Ñu jing Khua kơ klei hdĭp drei nanao, mơ̆ng klei blŭ hlŏng kơ bruă ngă srăng bi êdah boh mơ̆ng Yang Mngăt Jăk, čiăng myơr kơ Aê Diê mnơ̆ng ngă yang hdĭp, doh jăk leh anăn bi mơak kơ Ñu.
Si ngă drei jing boh tâo hdĭp hlăm sang myang Aê Diê mơ̆?
Wah lač: Ơ Khua Yang, kâo akâo kơ Ih jing Khua kơ klei hdĭp kâo. Đru kâo bi êdah nanao klei hdĭp doh jăk, bi mguôp jing sa hŏng phung ayŏng adei hlăm klei đăo čiăng mdơ̆ng sa boh sang myang, bi guh kơang kơ Anăn Ih ti krah lăn ala anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
