I Petus 2:4-6
Nqe cim:
“Nej cia li los cuag peb tus Tswv uas muaj sia nyob, nws yog lub pobzeb uas neeg muab povtseg, rau qhov lawv hais tias lub ntawd tsis muaj nqis; tiamsis Vajtswv xaiv lub ntawd, rau qhov Vajtswv pom hais tias lub ntawd yog lub uas muaj nqis heev.” (I Petus 2:4).
Lus nug rau sawvdaws xav:
– Timthawj Petus siv tus duab “pobzeb” los qhia txog yam dabtsi?
– Yuav ua li cas kom Pawg Ntseeg koom siab tau li Vajtswv nyiam?
– Peb cheemtsum ua dabtsi kom pab tau kev txhim kho Pawg Ntseeg sib koom?
Pawg Ntseeg yog cov neeg ntseeg Tswv Yexus, tau muab tshem tawm tshwjxeeb tawm hauv lub ntiajteb, los koom ua ke pehawm Vajtswv thiab ua Vajtswv Vaj Peb Leeg tes haujlwm. Timthawj Petus siv tus duab “lub pobzeb uas muaj txoj sia” yog Tswv Yexus, thiab Vajtswv cov menyuam txhua tus yog cov pobzeb koom txhim ua ib lub tsev uas yog Vajtswv lub tuamtsev. Petus ntuas cov neeg uas tau saj tus Tswv qab zib (I Petus 2:3), ces cia li los cuag Tswv Yexus. Lo lus “los cuag” hais txog txojkev sib raug zoo. “Nej cia li los cuag peb tus Tswv” yog rhais ruam mus rau hauv Tswv Yexus, nrog nraim Nws zoo ib yam li tus ceg hmab thiab tsob txiv hmab.
Yog li ntawd, Pawg Ntseeg yog cov neeg uas muaj ntau lub siab, cwjpwm, kev nyiam sib txawv los koom ua ke, koom ntseeg ib tug Tswv Yexus, zeem paub Nws yog “lub pobzeb uas neeg muab tso tseg, tiamsis Vajtswv xaiv lub ntawd, rau qhov Vajtswv pom hais tias lub ntawd yog lub uas muaj nqis heev” (nqe 4). Pawg Ntseeg yog ib lub “tuamtsev ntawm sab ntsujplig”, txhais tau tias yog lub tsev sab ntsujplig, muaj Tswv Yexus ua lub plag, txhua tus ntseeg yog cov thwvcib koom txhim txojkev ntseeg, sib koom hauv tus Tswv lub tuamtsev.
Ntau leej totaub yuam kev lub ntsiab sib koom yog koom ib lub siab, ib txoj kev xav nrog lwm tus, yog tsis ua li ces yuav raug suav tias “tsis sib koom siab”, yog li thiaj tshwm muaj qhov kev tsis sib koom raws li tus Tswv lub siab nyiam. Vajtswv Txojlus qhia sib koom hauv Pawg Ntseeg yog koom nrog tus Tswv, tsis yog ib leeg koom nrog ib leeg zoo li tus duab lub pobzeb hauv lub tsev sab ntsujplig. Cia kom Pawg Ntseeg muaj kev sib koom yog, txhua tus neeg yuav tsum yog lub pobzeb ciaj sia, muaj Vaj Ntsujplig nyob hauv siab. Yuav tsum ua tib zoo saib vim Vajtswv Txojlus qhia paub Pawg Ntseeg hauv ntiajteb muaj yaj thiab tshis, muaj txhauv thiab nplej, muaj cov xibhwb cuav thiab tseeb. Peb yuav koom tsis tau cov neeg hauv Pawg Ntseeg yog hais tias peb tsis ua “lub pobzeb” ciaj sia. Txhua tus uas ntseeg Vajtswv tiag, txawm yog ua tes haujlwm twg, ib leeg yuav tsum txo hwjchim rau ib leeg “txhim tsa lub tsev sab ntsujplig”, tsis yog txhim tsa ib pab pawg neeg. Txhua tus uas ntseeg tus Tswv tiag “Nej yog cov povthawj uas dawbhuv uas ua haujlwm hauv lub tuamtsev, tej haujlwm uas nej ua haum Vajtswv siab, rau qhov nej yog cov uas ntseeg Yexus Khetos.” (nqe 5). Thov Vajtswv pab kom peb paub caw Nws los ua peb tus Tswv, tej lus hais mus txog kev ua haujlwm tawm yuav tsum qhia tawm Vaj Ntsujplig cov cim, kom fij tau lub neej dawbhuv thiab haum Vajtswv siab.
Thov Vajtswv,
Tus Tswv, thov caw Koj los ua tus Tswv kav nyuam yaus lub neej. Thov Koj pab kom nyuam yaus qhia tawm lub neej dawbhuv, sib koom nrog cov ntseeg kom txhim tsa tau lub neej sab ntsujplig, ua rau Vajtswv tau ntsejmuag hauv ntiajteb no. Nyuam yaus tuav Tswv Yexus lub npe thov. Amees.
Peb puas yog lub pobzeb ciaj sia nyob hauv Vajtswv lub tsev sab ntsujplig?
Nyeem Vajluskub hauv peb lub xyoo: Yelemis 6
Kênh Youtube BHKTHN:
