Klei Aê Diê Blŭ: Y-Mathiơ 21:33-41
Êlan kliăng: “Snăn diñu mă gơ̆, dlăm gơ̆ ti êngao đang boh kriăk ƀâo leh anăn bi mdjiê hĕ gơ̆” (Y-Mathiơ 21:39)
Klei êmuh ksiêm mĭn: Si phung mưn đang boh kriăk ƀâo ngă kơ pô đang boh kriăk ƀâo leh anăn kơ anak êkei gơ̆? Boh knhal tuč si jing? Ya klei Khua Yang čiăng kơ phung Israel ngă? Si klei Khua Yang yăl dliê bi hriăm drei?
Khua Yang Yêsu lŏ yăl dliê sa klei bi hriêng mkăn čiăng bi êdah klei phung Israel ƀai leh anăn amâo thâo hdơr knga ôh. Sa čô êkei êlâo kơ đuĕ hiu kbưi, prăp êmiêt hĕ bi jăk đang boh kriăk ƀâo ñu, leh anăn brei arăng mưn đang boh kriăk ƀâo anăn. Truh yan pĕ boh, dua blư̆ ñu tiŏ nao phung dĭng buăl ñu kơ phung mưn, čiăng mă kdrêč boh kriăk ƀâo ñu. Phung mưn amâo brei boh kriăk ƀâo kơ pô đang boh kriăk ƀâo ôh ƀiădah “čăm pô anei, bi mdjiê pô adih, leh anăn bhĭr boh tâo kơ sa čô mkăn” (êlan 35). Knhal tuč ñu tiŏ nao anak êkei ñu pô kơ phung mưn kyuadah mĭn: “Diñu srăng mpŭ kơ anak êkei kâo” (êlan 37), ƀiădah phung mưn đang boh kriăk ƀâo lĕ mĭn snei: “Anei yơh pô dưn ngăn; bơ drei bi mdjiê hĕ ñu leh anăn drei srăng mă ngăn dưn ñu”, snăn diñu mă leh anăn bi mdjiê hĕ anak êkei anăn (êlan 38-39). Khua Yang Yêsu êmuh phung knơ̆ng khua ngă yang leh anăn phung Pharisi si pô đang boh kriăk ƀâo srăng ngă kơ phung mưn ƀai anăn, diñu wĭt lač mtam djŏ snăk hŏng klei bhiăn kơ klei kpă ênô: “Ñu srăng bi rai phung ƀai anăn hŏng klei djiê knap mñai, leh anăn brei phung mkăn mưn đang boh kriăk ƀâo ñu, phung srăng brei boh kơ ñu djŏ yan” (êlan 41). Năng ai diñu bi mni snăk kơ klei diñu lŏ wĭt lač, ƀiădah hŏng klei lŏ wĭt lač anăn diñu dôk phat kđi kơ diñu pô ƀiădah diñu amâo thâo ôh.
Phung Israel wơr bĭt hĕ kơ diñu amâo mdê ôh hŏng phung găp djuê mkăn, ƀiădah Aê Diê khăp leh anăn ruah leh diñu mjing sa phung ƀuôn sang kơ Aê Diê pô (Klei Mtô Mñă Klei Bhiăn 7:7-8). Wăt snăn dưn mơh, mâo lu blư̆ diñu hngah kơ Aê Diê čiăng tui hlue phung rup yang. Hlăm jih klei hƀuê ênuk phung Israel, Aê Diê yua lu phung khua pô hưn êlâo nao hưn brei diñu răng, bi hdơr kơ diñu klei diñu khăng ai tiê leh anăn amâo đăo ôh. Ƀiădah diñu ngă jhat leh kơ phung khua pô hưn êlâo Aê Diê bŏ hŏng klei ƀai snăk, čăm pô anei, bi mdjiê pô adih, leh anăn bhĭr boh tâo kơ sa čô mkăn…Knhal tuč, Aê Diê tiŏ hriê Anak Ñu pô jing Yêsu Krist trŭn hriê ti lăn ala, “Ñu hriê leh kơ čar Ñu pô, ƀiădah phung ƀuôn sang Ñu pô amâo jum Ñu ôh” (Y-Yôhan 1:11).
Jing phung tui hlue Khua Yang, brei drei ksiêm dlăng kơ drei pô thâodah drei dôk bi khăng ai tiê hŏng klei Khua Yang mtô mñă kơ drei mơ̆. Răng bĕ, huĭdah drei amâo čiăng hmư̆ Klei Aê Diê Blŭ leh anăn amâo brei Klei Aê Diê Blŭ mkra mjuăt klei hdĭp drei ôh. Brei drei hdơr nanao kơ drei jing mnuih soh leh anăn srăng rai tuč hlăm klei soh, ƀiădah Aê Diê bi êdah leh klei Ñu pap kơ drei, leh anăn brei kơ drei klei dưi jing anak Ñu. Bi mni bĕ kơ Khua Yang leh anăn myơr jih klei hdĭp kơ Ñu. Tơdah drei ăt dôk bi khăng ai tiê, amâo thâo kral ôh klei Khua Yang mtă brei răng, tơdah Khua Yang lŏ hriê Ñu srăng yap drei jing phung “ƀai” leh anăn drei srăng tŭ klei bi rai.
Si drei srăng ngă hŏng klei pap prŏng Aê Diê brei leh kơ drei?
Wah lač: Ơ Khua Yang khăp ơi, lač jăk kơ Ih khăp kơ kâo leh anăn bi mtlaih kâo. Đru kâo thâo hdơr knga bi mni kơ Ih, mă bruă kơ Ih sĭt suôr, bi mơak kơ Ih nanao čiăng kơ hruê bi tuôm hŏng Ih kâo dưi dôk mbĭt hŏng Ih nanao hlŏng lar. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
