Mathais 21:33-41
Nqe cim:
“Lawv txawm ntes kiag nws, muab nws thawb mus rau sab ntug vaj nraud thiab muab nws tua povtseg.” (Mathais 21:39)
Lus nug rau sawvdaws xav:
– Cov neeg tau ntiav zog mus ua haujlwm hauv lub vaj txiv hmab ua rau tus tswv vaj thiab nws cov tub zoo li cas?
– Nqi zog zoo li cas? Tus Tswv xav qhia cov Yixalayees yam dabtsi?
– Zaj lus uas tus Tswv hais no qhia peb dabtsi?
Tswv Yexus rov tham ib zaj lus pivtxwv hais txog cov Yixalayees txojkev phem kev qias thiab tsis nco Vajtswv txiaj ntsig. Ib tug tswv vaj thaum yuav taug kev mus deb, nws muaj ib lub vaj txiv hmab, nws muab rau lwm tus tu. Txog lub sijhawm sau txiv hmab tus tswv vaj tau txib cov neeg mus sau tej txiv hmab ob zaug, tiamsis cov neeg uas tu lub vaj txiv hmab tsis muab tej txiv hmab los faib rau tus tswv vaj, lawv “txawm muab tus tswv cov tubtxib ntes, muab ib tug ntaus, muab ib tug tua thiab muab pobzeb ntaus ib tug” (nqe 35). Thaum kawg tus tswv vaj thiaj txib nws tus tub mus saib, rau qhov nws xav hais tias “Lawv yuav hwm kuv tus tub” (nqe 37), tiamsis cov neeg tu vaj txiv hmab ho xav hais tias “tus no yog tus tswv vaj tus tub, peb cia li muab nws tua povtseg, peb thiaj tau nws lub vaj!” ces lawv txawm ntes kiag thiab muab tus tub ntawd tua povtseg (nqe 38-39). Tswv Yexus thiaj nug cov povthawj thiab cov txwjlaug hais tias leej txiv yuav ua li cas rau cov neeg tu lub vaj txiv hmab ntawd, lawv teb muaj qab muaj haus ntsig txog kev ua zoo li no: “Nws yuav muab cov neeg siab phem uas tu lub vaj ntawd tua povtseg huv tibsi, thiab muab lub vaj ntawd rau lwm cov tu. Thaum txog lub caij faib txiv hmab, lawv yuav faib cov uas yog nws tug rau nws.” (nqe 41). Tej zaum lawv txaus siab heev rau lawv lo lus teb, tiamsis dhau los ntawm cov lus teb no, lawv tabtom liam txim rau lawv tus kheej los lawv twb tsis paub.
Cov neeg Yixalayees twb hnov qab lawm hais tias lawv zoo tsis tshaj lwm haivneeg, tiamsis yog Vajtswv hlub thiab xaiv lawv los ua Nws haivneeg xwb (II Kevcai 7:7-8). Txawm yog li ntawd los lawv twb tsis lees yuav tus Tswv ntau zaus, lawv mus pe tej mlom. Nyob hauv keebkwm cov Yixalayees, Vajtswv tau txib ntau tus cevlus mus ntuas, ceebtoom txog lawv lub siab tawv thiab qhov lawv tsis ntseeg. Lawv tau ua phem heev rau cov cevlus, cov neeg uas raug ntes, ntaus, raug txawb pobzeb thiab tua povtseg… thaum kawg Vajtswv txib Nws Leej Tub uas yog Tswv Yexus los yug hauv ntiajteb, tiamsis “Nws los rau hauv nws lub tebchaws, tiamsis nws haivneeg tsis lees yuav nws.” (Yauhas 1:11).
Yog cov neeg uas nrog tus Tswv mus, peb yuav tau tshuaj saib tus kheej lub siab saib yus puas yog tus neeg tawvnyom Vajtswv tej lus qhia. Cia li ua tib zoo saib, tej zaum peb yuav tsis nyiam mloog Vajtswv Txojlus thiab tsis kam cia Vajtswv Txojlus kho peb lub neej. Cheemtsum nco ntsoov hais tias peb yog neeg txhaum thiab tuag rau txojkev txhaum; tiamsis Vajtswv qhia tshwm Nws txoj koob hmoov hlub rau peb, peb thiaj tau los ua Nws cov menyuam. Cia li ua tus Tswv tsaug thiab ua neej pub rau Nws. Yog peb tseem ua neej tawv ncauj tsis zeem paub tej lus uas tus Tswv qhia, thaum txog lub sijhawm tus Tswv los peb yuav raug suav hais tias “neeg phem” thiab yuav raug puastsuaj.
Thov Vajtswv,
Vajtswv tus muaj kev hlub, ua tsaug qhov Koj hlub thiab cawm nyuam yaus. Thov Koj pab kom nyuam nco ntsoov Koj txojkev hlub, ncaj ncees ua Koj tes haujlwm, ua haum Koj siab mus txog thaum ntsib Koj. Nyuam yaus tuav Yexus Khetos lub npe thov, Amees.
Peb ua li cas rau Vajtswv txoj koob hmoov hlub uas Nws muab pub rau peb?
Nyeem Vajluskub hauv peb lub xyoo: II Xwmtxheej Vajntxwv 19
Kênh Youtube BHKTHN:
