Klei Aê Diê Blŭ: Rôm 7:1-6
Êlan kliăng: “Ƀiădah ară anei hin drei êngiê leh mơ̆ng klei bhiăn anăn, drei djiê leh kơ klei bhiăn mjing leh drei mnă. Snăn drei amâo lŏ mă bruă ôh tui si klei bhiăn hđăp arăng čih leh, ƀiădah mă bruă tui si ai mĭn mrâo mơ̆ng Yang Mngăt Jăk” (Rôm 7:6)
Klei êmuh ksiêm mĭn: Ya klei Khua ƀĭng kna Y-Pôl blŭ kơ phung thâo leh klei bhiăn? Boh blŭ “klei bhiăn” Khua ƀĭng kna Y-Pôl lač anăn ya jing? Si ngă phung đăo kơ Krist mă bruă kơ Aê Diê tui si ai mrâo mơ̆ng Yang Mngăt Jăk?
Khua ƀĭng kna Y-Pôl dôk blŭ hŏng phung dlăng hră ñu čih mơĭt jing phung Yuđa tuôm thâo leh anăn gưt leh kơ klei bhiăn (êlan 1). Ñu mă klei bi hmô kơ sa čô mniê mâo ung srăng dôk sĭt suôr leh anăn gưt kơ ung gơ̆. Ƀiădah tơdah ung djiê hĕ, snăn jih jang klei bi đuôm hlăm klei bi dôk ung mô̆ hŏng ung anăn srăng ruê̆ yơh. Mniê anăn dưi dôk ung mkăn hŏng klei êngiê amâo yap gơ̆ mniê tlĕ piu ôh. Msĕ snăn mơh, klei bhiăn knŏng mâo klei dưi hlăm klei phat kđi mnuih hdĭp ƀiădah amâo dưi phat kđi mnuih djiê ôh. Phung đăo kơ Krist dưi dôk hlăm klei bi mguôp mrâo hlăm êrah Yêsu Krist, snăn amâo lŏ dôk ti gŭ klei kriê mơ̆ng klei bhiăn ôh.
Brei phung đăo kơ Krist bi klă hĕ klei bhiăn čih hlăm hră mơĭt anei diñu mâo leh klei êngiê jing klei bhiăn mgô̆ phung Israel tui hlue ngă čih leh hlăm êma pŏk hdruôm hră Y-Môis. Si tô hmô klei khăt klĭt čiăng thâo kral kơ digơ̆ jing anak čô Y-Abraham, klei bhiăn kkuh mpŭ kơ Aê Diê hlăm ênuk Klei Bi Mguôp Hđăp msĕ si mnơ̆ng myơr grăp hruê, djă pioh hruê knăm, hruê mlan yuôm bhăn hlăm thŭn, knăm bi doh klei soh, lu klei bhiăn mkăn đa đa…Jih jang klei bhiăn bi hmô kơ klei bi tui klei soh Khua Yang Yêsu ngă ênŭm leh snăn phung kơ Krist amâo lŏ djă pioh ôh.
Hŏng klei myang Yang Mngăt Jăk atăt gai, phung đăo kơ Krist hdĭp mâo boh tŭ dưn kơ Aê Diê (êlan 4). Bi kơ klei bhiăn djŏ kơ klei kpă ênô, phung đăo kơ Krist amâo dưi lui ôh kyuadah Khua Yang Yêsu hriê leh ti lăn ala amâo djŏ čiăng bi rai klei bhiăn ôh, ƀiădah čiăng bi sĭt klei bhiăn (Y-Mathiơ 5:17). Kyuanăn yơh, phung ƀĭng kna Khua Yang Yêsu srăng ngă kdlưn hĭn kơ klei bhiăn, si tô hmô Khua Yang Yêsu mtô: “Diih hmư̆ leh arăng lač đưm, ‘Brei ih khăp kơ pô riêng gah ih leh anăn bi êmut kơ pô roh ih.’ Ƀiădah Kâo lač kơ diih, khăp bĕ kơ phung roh diih, leh anăn wah lač brei kơ phung ngă jhat kơ diih” (Y-Mathiơ 5:43-44). Klei Khua Yang mtă yap jing klei bhiăn yuôm snei: “Snăn ya klei diih čiăng phung mnuih ngă kơ diih, brei diih ngă msĕ snăn mơh kơ digơ̆; kyuadah klei anăn jing djŏ tui si klei bhiăn leh anăn klei phung khua pô hưn êlâo čih leh” (Y-Mathiơ 7:12). Brei phung đăo kơ Krist hriăm leh ngă hlue klei Khua Yang mtô leh ti dlông čư̆ kơ klei kkuh mpŭ kơ Aê Diê leh anăn klei bi mguôp hŏng mnuih (Y-Mathiơ 5-7). Khua Yang Yêsu lač snei: “Kyuadah Kâo lač kơ diih, tơdah klei kpă ênô diih amâo jing kdlưn hĭn kơ klei kpă ênô phung khua čih hră leh anăn phung Pharisi, diih amâo srăng mŭt hlăm ƀuôn ala mtao adiê ôh” (Y-Mathiơ 5:20).
Si ngă thâo kơ ih êngiê leh mơ̆ng klei bhiăn čiăng mă bruă kơ Aê Diê tui si ai mrâo mơ̆ng Yang Mngăt Jăk mơ̆?
Wah lač: Ơ Khua Yang Yêsu, kâo bi mni kơ Ih kyuadah Ih ngă leh jih jang klei čih hlăm klei bhiăn hrô kơ kâo. Akâo Yang Mngăt Jăk kčŭt ai tiê kâo leh anăn brei klei myang čiăng kơ kâo hdĭp mâo boh tŭ dưn kơ Ih, bi guh kơang kơ Anăn Ih hŏng klei hdĭp mrâo Ih brei leh kơ kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Mathiơ 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
