II Xwmtxheej Vajntxwv 24:23-27
Nqe cim:
“Ua lub neej fwm tus Tswv, koj thiaj yuav muaj txojsia ua neej nyob ntev. Cov neeg siab phem tuag ua ntej lawv lub caij nyoog” (Pajlug 10:27).
Lus nug rau sawvdaws xav:
- Vajntxwv Yau-ases raug dabtsi thaum nws tsis paub nco txiajntsig? (saib ntxiv II Vajntxwv 12:17-18).
- Tej xwm txheej uas Yau-ases raug qhia peb txog yam dabtsi?
Thaum Vajtswv tsis nrog Yau-ases nyob lawm, ces vajntxwv thiab haiv neeg Yudais tsis muaj kev kaj siab li. Xilias cov tub rog tuaj tua lub tebchaws Yixalayees thiab tebchaws Yudas. Ib qhov txaus ntshai uas Vajtswv Txojlus hais tias: “Txawm yog cov tub rog Xilias tsis coob los tus Tswv cia lawv tua yeej cov tub rog Yudas uas coob heev, rau qhov cov Yudas tso tus Tswv uas yog lawv cov yawg koob tus Vajtswv tseg lawm. Qhov no yog Vajtswv rau txim rau Yau-ases” (nqe 24). Txawm hais tias vajntxwv Yau-ases muaj “ib pab tub rog coob heev”, tiamsis tej kev txhaum uas tsis nco tus Tswv txiajntsig ua rau Vajtswv tso nws tseg, ces thaum ntawd yuav kov tsis yeej cov yeebncuab uas tub rog tsawg heev.
Tsis xav kom lub nroog Yeluxalees raug puastsuaj, vajntxwv Yau-ases muab tagnnrho tej khoom dawbhuv hauv lub tuamtsev coj mus pub rau tus vajntxwv Xilias (II Vajntxwv 12:17-18). Vajntxwv Yau-ases tsis mloog lus ceebtoom, mus txog qhov uas muab Xakhaliyas tua pov tseg thiab thaum kawg yog ua saib tsis taus Vajtswv los ntawm muab tej cuabyeej dawbhuv hauv lub tuamtsev mus rau lwm haiv neeg. Thaum kawg, Yau-as raug nws cov tub txib muab tua tuag, luag tsis coj nws mus faus nrog nws cov yawg koob lub roob toj ntxas (nqe 25-26). Dhau ntawd, hauv phau Mathais tshooj ib ces peb tsis pom nws lub npe tshwm hauv Yexus cov yawg koob tej npe.
Vajntxwv Yau-as lub neej yog ib zaj lus uas xaus mus rau qhov tsis zoo. Vajntxwv yog tus uas Vajtswv pab cawm txawv heev, thiab kuj yog tus uas Vajtswv xaiv los txuas Daviv cajces kom ua tiav Vajtswv kev npaj tseg. Vajntxwv Yau-as kuj yog tus uas tau txais kev hlub, kev cob qhia thiab kev coj ua haujlwm zoo los ntawm cov neeg fwm Vajtswv uas yog tus povthawj Yehauyadas. Hais tau hais tias, vajntxwv Yau-as yog tus tau txais Vajtswv thiab tibneeg kev hlub ntau heev. Txawm li ntawd los vajntxwv Yau-as tsis ua lub neej kom muaj nqis tiamsis vajntxwv rov ua lub neej tsis paub txuag siav mus txog thaum raug luag tua tuag tsis muaj qab hau. Vim li cas vajntxwv Yau-as thiaj xaiv ua lub neej zoo li ntawd? Tej zaum vajntxwv tsis zeem paub nws lub neej thiab txojsia yog Vajtswv muab pub rau nws. Vajntxwv Yau-as tau ua lub neej tsis nco Vajtswv thiab tej neeg uas hlub vajntxwv txiajntsig.
Peb txhua tus tibneeg yeej zoo ib yam li vajntxwv Yau-as uas tsimnyog raug tuag lawm, tiamsis tau Vajtswv hlub Nws thiaj pab cawm thiab pub peb muaj lub neej tshiab. Peb cia li paub txuag peb lub neej thiab txojsia, ua neej nco Vajtswv txiajntsig los ntawm kev pehawm thiab ua Vajtswv haujlwm.
Thov Vajtswv,
Tus Tswv, ua tsaug uas Koj pab cawm nyuam yaus thiab pub yuam yaus muaj lub neej tshiab, muaj tsev neeg thiab tau los koom pawg ntseeg. Nyuam yaus zoo siab fij lub neej pehawm thiab ua Koj tes haujlwm mus li. Amees.
Peb puas paub nco Vajtswv txiajntsig thiab lwm tus txiajntsig lawm tau?
Nyeem Vajluskub hauv peb lub xyoo: Yaxayas 66:5-24
Kênh Youtube BHKTHN:
