Klei Aê Diê Blŭ: II Klei Yăl Dliê 24:23-27
Êlan kliăng: “Klei huĭ mpŭ kơ Yêhôwa bi sui hruê arăng dôk hdĭp, ƀiădah thŭn phung soh dôk hdĭp jing ƀiă.” (Klei Bi Hriêng 10:27)
Klei êmuh ksiêm mĭn: Ya boh tŭ mtao Y‑Jôas mă tŭ mơ̆ng knhuah hdĭp ñu amâo thâo hdơr knga (dlăng thiăm II Bruă Mtao 12:17-18)? Ya klei mñă kơ drei mơ̆ng klei hriăm ruă ênguôt mtao Y‑Jôas?
Hlăk Aê Diê lui mtao Y‑Jôas snăn klei êđăp ênang kbiă đuĕ mơ̆ng mtao leh anăn ƀuôn sang Yuđa mơh. Phung kahan Siri mblah bi rai jih dua ƀuôn ala mtao Israel leh anăn Yuđa. Jing klei ênguôt prŏng tơdah Klei Aê Diê Blŭ čih: “Wăt tơdah phung kahan Siri hriê knŏng hŏng ƀiă kahan dưn, Yêhôwa jao leh hlăm kngan diñu sa phung kahan prŏng, kyuadah digơ̆ lui wir leh Yêhôwa Aê Diê phung aê digơ̆. Snăn diñu bi truh klei phat kđi kơ Y‑Jôas” (êlan 24). Wăt tơdah hlăm kngan mtao Y‑Jôas jing “sa phung kahan prŏng”, ƀiădah klei ngă soh, klei amâo thâo hdơr knga leh anăn klei khăng ai tiê ngă kơ Aê Diê lui mtao, leh anăn klei mtao dluh lĕ ti anăp phung roh wăt tơdah điêt hĭn dưn, jing klei amâo dưi tlaih ôh.
Čiăng kơ Yêrusalem tlaih đăm plah mă, mtao Y‑Jôas mă ba mnơ̆ng ngăn doh jăk hlăm Sang Yang ba mơĭt kơ mtao Siri (II Bruă Mtao 12:17-18). Mtao Y‑Jôas mơ̆ng klei hngah hmư̆ klei brei răng, truh kơ klei bliư̆ blêč bi mdjiê Y‑Sakari, leh anăn tuč kơ klei ngă soh jing bi hêñ Aê Diê hŏng bruă myơr mnơ̆ng ngăn doh jăk phung tue. Ti knhal tuč, mtao Y‑Jôas djiê mơ̆ng kngan phung dĭng buăl ñu pô leh anăn amâo dưi dơr mbĭt hlăm msat phung mtao ôh (êlan 25-26). Êgao hĭn kơnăn, hră ktuê djuê Khua Yang Yêsu hlăm Y‑Mathiơ kdrêč 1 kƀah êkŭt anăn tlâo čô mtao Yuđa, leh anăn mtao Y‑Jôas jing sa čô hlăm tlâo anăn kƀah (bi dua anăn adôk jing Y‑Ahasia, leh anăn Y‑Amasia).
Đrông hƀuê mtao Y‑Jôas jing sa klei yăl dliê mâo tuč ruê̆ ênguôt êưn. Mtao tuôm mă tŭ leh klei bi mtlaih hŏng klei yuôm bhăn, wăt jing sa čô hjăn ñu yơh mâo klei ruah mdưm bruă klam yuôm pioh čuê ênuê djuê ana Y‑Đawit leh anăn bi leh hdră bruă Aê Diê. Mtao Y‑Jôas ăt jing sa čô mâo klei khăp, klei mtô bi hriăm leh anăn ktrâo atăt mơ̆ng phung huĭ mpŭ kơ Aê Diê msĕ si khua ngă yang Y‑Jêhôida. Blŭ klah čŭn, mtao Y‑Jôas jing sa čô mnuih mă tŭ êbeh dlai klei pap mơ̆ng Aê Diê leh anăn mơ̆ng phung mkăn. ƀiădah lĕ, hrô kơ klei hdĭp thâo hdơr knga leh anăn tŭ dưn, bi mtao Y‑Jôas bi rai klei hdĭp ñu pô, leh anăn ngă kơ klei hdĭp atăt truh kơ anôk tuč ruê̆ ênguôt êưn leh anăn hêñ mlâo. Ya ngă mtao Y‑Jôas hdĭp hĕ sa klei hdĭp năng hơưi msĕ snăn? Năng ai mtao amâo thâo ôh klei hdĭp ñu ti lăn ala anei jing kyua mơ̆ng klei pap leh anăn klei sĭt suôr Aê Diê leh anăn phung riêng gah. Mtao Y‑Jôas hdĭp amâo thâo hdơr knga – amâo thâo hdơr knga kơ Aê Diê leh anăn wăt hŏng phung khăp hơiêng kơ mtao mơh.
Klei hdĭp grăp čô drei ăt msĕ si mtao Y‑Jôas mơh, drei năng djiê leh sơăi, ƀiădah kyua klei pap Aê Diê bi mtlaih drei leh anăn brei kơ drei sa klei hdĭp mrâo. Brei thâo răng kơ klei hdĭp drei, hdĭp hŏng klei thâo hdơr knga kơ Aê Diê, hŏng jih ai tiê kkuh mpŭ leh anăn mă bruă kơ Ñu.
Si ngă drei thâo hdơr knga kơ Khua Yang kơ klei Ñu pap leh anăn klei phung mkăn đru klei hdĭp drei mơ̆?
Wah lač: Ơ Khua Yang, bi mni kơ Khua Yang êdimima kơ klei hdĭp, klei bi mtlaih, gŏ sang, leh anăn Phung Sang Aê Diê Khua Yang brei kơ kâo. Kâo myơr klei hdĭp kâo čuăn hdĭp kkuh mpŭ leh anăn mă bruă kơ Khua Yang.
Dlăng Klei Aê Diê Blŭ hlăm tlâo thŭn: Y‑Êsai 66:5-24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
