Klei Aê Diê Blŭ: II Klei Yăl Dliê 19:5-11
Êlan kliăng: “Ară anei, Ơ Israel, ya klei Yêhôwa Aê Diê ih čiăng brei ih ngă, knŏng huĭ mpŭ kơ Yêhôwa Aê Diê ih, êbat hlăm jih jang êlan ñu, khăp kơ ñu, leh anăn mă bruă kơ Yêhôwa Aê Diê ih hŏng jih ai tiê leh anăn hŏng jih mngăt ih, djă pioh klei mtă leh anăn klei bhiăn Yêhôwa kâo mtă kơ ih hruê anei, jing klei jăk mơak kơ ih. (Klei Mtô Mñă Klei Bhiăn 10:12-13)
Klei êmuh ksiêm mĭn: Si Mtao Jôsaphat ngă hlăm kluôm ala čar leh anăn ya klei mtao mtô? Klei mtao mtô mñă kơ ya klei? Si drei bi êdah ai tiê huĭ mpŭ kơ Aê Diê?
Mtao Jôsaphat mkra mlih klei bhiăn hŏng bruă ruah mdưm phung khua phat kđi hlăm phung mă bruă mơ̆ng Yuđa. Ñu mtô digơ̆ brei răng kyua digơ̆ amâo djŏ knŏng phat kđi kyua anak mnuih ôh ƀiădah lŏ jing kyua Aê Diê. Snăn mơ̆ng ară anei brei diñu “răng bĕ kơ ya diih ngă”, diñu ngă djăp mta bruă hŏng ai tiê huĭ mpŭ kơ Aê Diê, kyua “Snăn brei diih mâo klei huĭ kơ Yêhôwa; răng bĕ kơ ya diih ngă, kyuadah amâo dưi bi msoh ôh kơ klei kpă ti anăp Yêhôwa Aê Diê drei, kăn dôk tĭng kơ sa nah, amâodah mă ngăn sun rei” (êlan 7)
Mtao Jôsaphat ăt ruah mdưm phung khua phat kđi ti ƀuôn prŏng phŭn Yêrusalem. Sang phat kđi ti Yêrusalem ăt jing sang phat kđi čiăng msir mgaih klei dleh dlan mơ̆ng sang phat kđi ti dŭm ƀuôn điêt hĭn ba nao. Tinei, mtao ăt mtô diñu brei huĭ mpŭ kơ Yêhôwa Aê Diê, sĭt suôr leh anăn jih ai tiê hlăm bruă Aê Diê jao. Diñu ăt mtô bi hriăm kơ phung ƀuôn sang Aê Diê đăm ngă soh hŏng Yêhôwa Aê Diê ôh čiăng amâo tŭ klei Aê Diê ngêñ. Mtao iêô mthưr phung khua phat kđi brei jhŏng mă bruă kơ Aê Diê hlue si klei mtao mtô, leh anăn Aê Diê srăng dôk mbĭt hŏng phung mâo ai tiê jăk.
Mơ̆ng bruă ruah mdưm phung khua phat kđi leh anăn klei Mtao Jôsaphat mtô, dưi ƀuh ară anei hŏng Mtao, snăn Yêhôwa Aê Diê jing boh phŭn mơ̆ng klei hdĭp leh anăn djăp bruă mtao ngă. Mtao čiăng Aê Diê ăt jing boh phŭn hlăm klei hdĭp leh anăn bruă ngă phung khua phat kđi kyua ñu ruah mdưm. Trăn Klei Aê Diê Blŭ anei bi êdah klei mĭn leh anăn ai tiê Mtao Jôsaphat hŏng Aê Diê tơdah lač kơ Anăn Yêhôwa Aê Diê hlăm djăp êlan. Mtao mñă kơ Anăn Aê Diê, bi mĭn kơ Ñu hlăm klei blŭ leh anăn bruă mtao ngă. Mtao mtô phung phat kđi brei ngă djăp mta kyua Yêhôwa Aê Diê leh anăn boh phŭn mơ̆ng jih bruă diñu ngă brei ngă kyua ai tiê “huĭ mpŭ kơ Yêhôwa Aê Diê”.
Jing phung mâo Khua Yang Yêsu bi tui hŏng klei hdĭp Ñu pô, drei mơ̆ng klei jing hlŭn kơ yang jhat jing dĭng buăl Ñu anăn Aê Diê brei jing boh phŭn klei hdĭp, klei blŭ leh anăn bruă drei ngă. Ăt brei “thâo răng” kriê pioh ai tiê huĭ mpŭ kơ Aê Diê hlăm klei hdĭp, mă klei kluôm ênŭm, sĭt suôr mă bruă kơ Ñu. Klei brei hdơr jing “đăm ngă soh” hŏng Aê Diê ôh kyua Ñu jing Pô doh jăk, čiăng ñĕ kơ klei Aê Diê ngêñ. Boh nik, brei drei thâo săng tơdah mă ya mta bruă Aê Diê jao snăn ăt brei ngă hŏng ai tiê “kyua Yêhôwa Aê Diê”, klă sĭt Ñu srăng dôk mbĭt, brei klei tŭ jing hlue si klei Ñu čiăng leh anăn klei jăk mơak hlăm jih bruă.
Klei blŭ leh anăn bruă drei ngă bi êdah ai tiê huĭ mpŭ kơ Aê Diê mơ̆?
Wah lač: Ơ Khua Yang, akâo kơ Ih brei kâo hdĭp leh anăn mă bruă kơ Ih hŏng ai tiê huĭ mpŭ, kluôm ênŭm, sĭt suôr čiăng kâo amâo ngă soh hŏng Ih ôh leh anăn Ih srăng dôk mbĭt nanao atăt kâo hlăm djăp mta bruă.
Dlăng Klei Aê Diê Blŭ hlăm tlâo thŭn: Y‑Mathiơ 1:1-2:6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
