II Xwmtxheej 19:5-11
Nqe cim:
“Ib tsoom Yixalayees, nej cia li ua tib zoo mloog saib tus Tswv uas yog nej tus Vajtswv hais kom nej ua dabtsi: nws xav kom nej hwm thiab ua raws li nws tej lus txhua lo. Nws kom nej muab siab npuab thiab ua nws tes haujlwm kawg siab kawg ntsws, thiab coj raws li nws tej kevcai txhua nqe. Tej kevcai uas hnub no kuv muab cob rau nej yuav muaj nqis rau nej” (II Kevcai 10:12-13).
Lus nug rau sawvdaws xav:
– Vajntxwv Yehausafas ua dabtsi thoob plaws lub tebchaws, nws qhuab qhia txog yam dabtsi?
– Vajntxwv tej lus qhia hais hnyav rau yam dabtsi?
– Peb ua qhia tshwm lub siab hwm tus Tswv licas?
Vajntxwv Yehausafas txhim kho tej kevcai tswj los ntawm qhov uas tsa ib cov txiav txim nyob rau hauv txhua lub nroog uas muaj ntsayeej thaiv hauv tebchaws Yudas. Nws qhia lawv yuav tsum ua tib zoo saib thaum txiav txim vim tsis yog yuav txiav txim raws li neeg lub siab nyiam, tiamsis yog raws li tus Tswv lub siab nyiam. Vim li ntawd txij thaum pib lawv yuav tsum “ua tib zoo saib”, yuav tsum ua txhua yam los ntawm lub siab hwm tus Tswv, vim “tus Tswv uas yog peb tus Vajtswv yog tus ncaj ncees, nws tsis xaiv leej twg ntsej muag thiab yuav luag tej nyiaj xiab” (nqe 7).
Vajntxwv Yehausafas kuj tsa cov Levis, cov povthawj thiab cov thawjcoj qee leej ntawm tej cuab los ua cov txiav txim hauv tuamceeb nroog Yeluxalees. Rooj txiav txim hauv Yeluxalees kuj yog lub rooj rov txiav txim rau tej plaub ntug uas cov neeg nyob hauv tej nroog me coj tuaj. Nyob ntawm no, vajntxwv kuj qhia kom lawv yuav tsum hwm tus Tswv, ncaj ncees thiab mob siab ua tes haujlwm tus Tswv muab cob. Lawv kuj yuav tsum qhuab qhia tus Tswv haivneeg txhob ua txhaum rau tus Tswv thiaj tsis raug tus Tswv txojkev chim. Vajntxwv nqua hu cov txiav txim yuav tsum txhob qaug zog ua tus Tswv tej haujlwm, thiab tus Tswv yuav nrog nraim tus uas ua ncaj nyob.
Dhau ntawm kev tsa cov txiav txim thiab Vajntxwv Yehausafas tej lus qhia, peb pom hais tias raws li vajntxwv, ces tus Tswv yog tus tseemceeb ntawm nws lub neej thiab nws tes haujlwm. Vajntxwv kuj xav kom tus Tswv yog tus tseemceeb nyob hauv nws cov nomtswv lub neej thiab tes haujlwm. Ntu Vajluskub no qhia tshwm kev xav thiab nplooj siab ntawm Vajntxwv Yehausafas rau tus Tswv thaum nws hais txog tus Tswv lub npe hauv txhua nqe. Vajntxwv hais txog tus Tswv lub npe, xav txog tus Tswv nyob hauv nws tej lus hais thiab tes haujlwm. Vajntxwv qhia cov txiav txim yuav tsum ua txhua yam rau tus Tswv thiab ua los ntawm lub siab “hwm tus Tswv”.
Yog cov uas tau Tswv Yexus siv txojsia los tuag txhiv, peb tau hloov ntawm kev ua tub txib rau dab ntxwsnyoog los ua tub txib rau tus Tswv, yog li ntawd tus Tswv yuav tsum yog tus tseemceeb ntawm peb lub neej, tej lus hais thiab tes hauj lwm. Kuj yuav tsum “ua tib zoo” ceev tus kheej kom hwm tus Tswv hauv lub neej, muab siab npuab Nws thiab ua tej haujlwm kom ncaj ncees. Yam yuav tsum nco ntsoov yog “txhob ua txhaum rau tus Tswv” vim Nws yog tus dawbhuv, thiaj yuav tsis raug Nws txojkev chim. Tshwjxeeb, peb yuav tsum paub hais tias thaum ua tes haujlwm twg tus Tswv muab cob, yuav tsum ua “raws li tus Tswv lub siab nyiam”, yog ua li ntawd paub tseeb hais tias peb yuav tau Nws nyob nrog nraim, pub rau ua tiav haujlwm raws li Nws siab nyiam thiab tau koob hmoov hauv tes haujlwm.
Thov Vajtswv,
Tus Tswv, thov qhia rau nyuam yaus paub ua lub neej thiab ua Koj tes haujlwm los ntawm nplooj siab hwm, muab siab npuab thiab ua ncaj ncees nyuam yaus thiaj tsis ua txhaum rau Koj thiab tau Koj nyob nrog nraim, coj kev txhua sijhawm. Amees.
Peb tej lus hais thiab tes haujlwm puas yog ua hwm tus Tswv?
Nyeem Vajluskub hauv peb lub xyoo: Mathais 1:1-2:6
Kênh Youtube BHKTHN:
