Mathais 15:1-3
Nqe cim:
“Yexus teb hais tias: Ua li cas nej ua raws li tej kevcai, tiamsis nej tsis ua raws li Vajtswv Txojlus qhia?” (Mathais 15:3).
Lus nug rau sawvdaws xav:
– Cov xibhwb uas qhia Vajtswv txoj Kevcai thiab cov Falixais nkaug Tswv Yexus cov thwjtim ua txhaum cov yawgkoob nqe kevcai twg?
– Tswv Yexus tau qhia tawm lawv kev ntsejmuag ncaj siab nkhaus licas?
– Peb siv zaj kawm no licas rau lubneej tiam no?
Nyob rau Tswv Yexus tiam, cov yawgkoob tej lus qhia thiab tej kevcai twb muaj hwjchim loj heev nyob hauv kev xav thiab kev ua neej ntawm cov neeg Yudais lawm. Lawv saib hlob kev ntxuav tes thiab muab qhov ntawd ua ib txojcai muaj lub ntsiab tsis yog tsuas ntxuav tes kom huv xwb, tiamsis tseem yog tes haujlwm pab kom tau txojsia ibtxhis thiab. Cov neeg no tau nkaug Tswv Yexus cov thwjtim hais tias, “Ua li cas koj cov thwjtim tsis ua raws li tej kevcai uas peb cov yawgkoob ibtxwm qhia rau peb? Koj cov thwjtim tsis xub ntxuav tes raws li kevcai tso mam li noj mov!” (nqe 2). Lawv saib cov yawgkoob tej kevcai loj dua Vajtswv tej kevcai!
Tswv Yexus thiaj teb cov xibhwb uas qhia Vajtswv txoj Kevcai thiab cov Falixais hais tias, “Ua li cas nej ua raws li tej kevcai, tiamsis nej tsis ua raws li Vajtswv Txojlus qhia?” (nqe 3). Peb nco ntsoov hais tias Tswv Yexus tsis yog txhob txwm tsav cov thwjtim cai lossis txhob txwm txo qis cov yawgkoob tej kevcai, tiamsis Nws tsuas xav kom cov xibhwb uas qhia Vajtswv txoj Kevcai thiab cov Falixais zeem paub ntawm Vajtswv txojcai thiab lawv cov yawgkoob txojcai, qhov twg thiaj yog qhov tseeb yuav tsum coj thiab ua raws. Muaj tej txojcai ib txwm coj tsis yog phem, tiamsis txhob muab los xav hais tias vim coj ntau xyoo los lawm, ces dhau mus ua kevcai dawbhuv, tsis pub hloov pauv. Cov xibhwb uas qhia Vajtswv txoj Kevcai thiab cov Falixais saib sab nraud ces yog neeg zoo thiab hwm Vajtswv kawg tiamsis los ntawm lawv tes haujlwm thiab tej lus hais qhia pom hais tias lawv tsuas hwm tibneeg kom nrhiav tau yam muaj nqis rau lawv nyob hauv sab kev ntseeg xwb, lawv yog cov neeg ntsejmuag ncaj siab nkhaus.
Niaj hnub nimno, muaj cov ntseeg tsis quavntsej nyeem thiab kawm Vajtswv Txojlus, lossis tsis ua lubneej raws li Vajtswv Txojlus qhia, lawv tsuas quavntsej txog qhov uas yuav ua cas thiaj ua tau lubneej zoo, tivthaiv lawv cov yawgkoob tej kevcai kom lawv tau meejmom thiab siv hwjchim los ua tej yam tsis ncajncees xwb,… Thaum peb saib cov yawgkoob tej kevcai tseemceeb dua Vajtswv Txojlus, ces yog peb tabtom ua lubneej zoo li cov xibhwb uas qhia Vajtswv txoj Kevcai thiab cov Falixais thaum ub thiab ntag.
Tswv Yexus tsis qhia kom peb rhuav tibneeg tej kevcai ntawd thiab Nws kuj tsis ua li ntawd, tus Tswv tsuas xav kom peb paub saib Vajtswv Txojlus, Nws tej lus samhwm thiab tej kevcai tseemceeb dua tibneeg tej kevcai xwb. Yog hais tias Vajtswv Txojlus tsis yog lub hauvpaus kev ntseeg, Nws tej lus samhwm thiab tej kevcai tsis yog yam tseemceeb xubthawj hauv peb lubneej, ces txawm peb yuav mus nyob hauv tsev pehawm pestsawg zaug, ua haujlwm txog qib meejmom twg, los peb tsuas zoo li cov neeg ntsejmuag ncaj siab nkhaus tabmeeg tus Tswv xwb.
Thov Vajtswv
Tus Tswv, thov pab kom nyuam yaus nyiam Koj Txojlus tshaj txhua yam, kom nyuam yaus ua tau lubneej raws li Koj tej lus samhwm thiab Koj tej kevcai. Thov pab nyuam yaus txhob ua neeg ntsejmuag ncaj siab nkhaus tabmeeg Koj thiab lwm tus. Nyuam yaus tuav Yexus Khetos lub npe thov, Amees.
Peb puas tabtom ua neeg ntsejmuag ncaj siab nkhaus thiab tivthaiv cov yawgkoob txojcai tiamsis ua txhaum Vajtswv tej kevcai?
Nyeem Vajluskub hauv peb lub xyoo: Henplais 4:1-5:10
Kênh Youtube BHKTHN:
