Klei Aê Diê Blŭ: Klei Mtô Mñă Klei Bhiăn 11:18-24
Êlan kliăng: “Brei diih mtô klei anei kơ phung anak diih, blŭ kơ klei anei êjai ih dôk gŭ hlăm sang, êjai êbat ti êlan, êjai dôk đih, leh anăn êjai diih kgŭ.” (Klei Mtô Mñă Klei Bhiăn 11:19)
Klei êmuh ksiêm mĭn: Ya klei Y‑Môis mtô kơ phung ƀuôn sang Israel? Ya klei brei diñu ngă hŏng Klei Aê Diê Blŭ leh anăn si hdră êlan mtô lač kơ phung anak pô? Si bruă klam phung amĭ ama đăo kơ Krist hŏng phung anak čô pô?
Hlăm lu mta klei mtă mtăn, mtô lač kơ phung ƀuôn sang Israel êlâo kơ mŭt hlăm Lăn Aê Diê Ƀuăn, anăn jing klei mtô Klei Aê Diê Blŭ kơ phung ênuk lŏ čuê. Y‑Môis lŏ mtrŭn Klei Aê Diê Blŭ ktrâo atăt klă mngač snei, brei diñu “sĭt suôr mtô lač” kơ phung anak čô pô brei khăp kơ Yêhôwa Aê Diê hŏng jih ai tiê, hŏng jih mngăt, hŏng jih ai ktang (Klei Mtô Mñă Klei Bhiăn 6:5-6). Ƀiădah lĕ, čiăng dưi mtô lač phung anak čô Klei Aê Diê Blŭ, brei amĭ ama yơh êlâo hĭn djă pioh kjăp hlăm mngăt ai tiê Klei Blŭ anăn. “Snăn brei diih pioh klei blŭ kâo anei hlăm ai tiê leh anăn hlăm mngăt diih”; kdlưn hĭn mơh, wăt “brei diih kă diñu jing mnơ̆ng bi knăl ti kngan diih, leh anăn diñu srăng jing mnơ̆ng kă ti adhei diih ” (êlan 18).
Tơdah djă pioh leh, leh anăn đăo kjăp kơ Klei Aê Diê Blŭ, brei amĭ ama mâo bruă klam mtô lač Klei Blŭ anăn kơ phung anak čô pô. Amâo djŏ knŏng êjai mmông dôk gŭ pioh bi hriăm Klei Aê Diê Blŭ, ƀiădah mtô lač grăp mmông, grăp anôk (êlan 19). Mtô anak klei đăo kơ Khua Yang jing klei mtô nanao amâo mâo mdei hlăm jih jang boh klei găn. Grăp hruê, êjai kbiă ti êngao, êjai dôk hlăm êdeh jing mmông găl amĭ ama mñă kơ anak Klei Aê Diê ƀuăn. Grăp mmăt jih gŏ sang dôk hgŭm mbĭt pioh bi mni Khua Yang kơ sa hruê êgao leh anăn wah lač hrăm mbĭt. Grăp aguah mdih pĭt, êlâo kơ dơ̆ng sa hruê mrâo, amĭ ama ăt mñă phung anak hŏng Klei Aê Diê Blŭ čiăng kơ anak hdơr pioh leh anăn hdĭp bi mơak kơ Khua Yang.
Tui si dhar kreh phung Israel, êngao kơ kă Klei Aê Diê Blŭ ti kngan, ti adhei, wăt diñu čih Klei Blŭ anăn “ti msơ̆ng ƀăng bhă sang, ti ƀăng jang” mơh (êlan 20). Klei Aê Diê Blŭ brei dưi ƀuh leh anăn mñă nanao hlăm tar jih jang anôk, snăn kơh diñu dưi hdơr nanao leh anăn gưt ngă hlue. Tơdah phung ƀuôn sang Israel ƀuăn rơ̆ng gưt ngă hlue Klei Aê Diê Blŭ snăn Ñu ƀuăn srăng kiă kriê răng mgang diñu, dôk mbĭt hŏng diñu leh anăn brei kơ diñu lăn čar prŏng êhai (êlan 21-24).
Jing klei ênguôt êdi kyuadah mâo lu phung amĭ ama ênuk anei kpăk gun đei hŏng klei duah ƀơ̆ng huă lui hĕ mnĭt mmông leh anăn klei myun mtô lač kơ anak pô Klei Aê Diê Blŭ. Diñu bi mĭn klei anăn jing bruă Phung Sang Aê Diê. Kjham hĭn mơh, wăt diñu pô ăt ka pioh mơh Klei Aê Diê Blŭ hlăm ai tiê, snăn si thâo mtô lač kơ phung anak čô drei pô! Bruă klam mtô lač Klei Aê Diê Blŭ kơ phung hđeh hlăk ai amâo djŏ ôh jing bruă klam hjăn khua pô mtô amâodah phung nai mtô Sang Hriăm Hruê Kjuh, ƀiădah brei êlâo hĭn jing phung amĭ ama. Amĭ ama yơh jing pô tŭ bruă klam tlă anăp leh anăn tal êlâo hĭn kơ klei hdĭp mngăt phung anak. Gŏ sang yơh jing anôk čiêm rông phung hđeh hŏng Klei Aê Diê Blŭ năm hruê hlăm hruê kăm. Kyuanăn, brei amĭ ama mjĕ giăm leh anăn thâo săng si klei jing klei đăo phung anak pô, snăn kơh thâo mtô lač phung anak drei grăp hruê.
Si ngă drei sĭt suôr ngă bruă klam mtô lač leh anăn mñă nanao Klei Aê Diê Blŭ kơ phung anak čô drei mơ̆?
Wah lač: Ơ Khua Yang, akâo Ih pap brei kyua klei kƀah kâo hlăm klei mtô lač kơ phung anak. Akâo Khua Yang đru kâo thâo yua mmông klei myun bi jăk, čiăng mtô Klei Aê Diê Blŭ kơ phung anak čô kâo hlăm grăp mmông, hlăm grăp anôk.
Dlăng Klei Aê Diê Blŭ hlăm tlâo thŭn: Y‑Luk 13:1-30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
