II Kevcai 11:18-24
Nqe cim:
“Nej yuav tsum muab piav qhia rau nej tej menyuam, thiab niaj hnub hais txog tej lus no, tsis hais thaum nej nyob hauv tsev thiab thaum nej taug kev, thaum nej so thiab thaum nej ua haujlwm” (II Kevcai 11:19).
Lus nug rau sawvdaws xav:
– Mauxes qhia cov Yixalayees txog yam dabtsi?
– Lawv yuav tsum ua licas rau Vajtswv Txojlus thiab muab qhia lawv tej menyuam licas?
– Cov niam txiv ntseeg Yexus yuav tsum muaj feemxyuam licas rau lawv tej menyuam?
Nyob hauv tej lus qhuab ntuas, taw qhia cov Yixalayees ua ntej mus hauv Tebchaws Coglus Tseg, muaj ib yam tseemceeb uas lawv yuavtsum nco ntsoov, ntawd yog qhia Vajtswv Txojlus rau lwm phaum neeg. Mauxes tau piav qhia tus Tswv tej lus tseeb meej hais tias lawv yuav tsum “ua tib zoo qhia” lawv tej menyuam paub hlub tus Tswv kawg siab kawg ntsws, kawg plab kawg plawv thiab kawg lub dag lub zog (II Kevcai 6:5-6). Tiamsis, yuav qhia tau cov menyuam paub Vajtswv Txojlus, cov ua niam ua txiv yuav tsum xub khaws tej lus ntawd rau hauv nruab siab ua ntej. Lawv yuav tsum “nco ntsoov tej lus no cia rau nruab siab”; txog qib uas muab pav rau ntawm cajnpab thiab dai rau ntawm hauvpliaj, ua li ntawd thiaj yuav piav qhia thiab qhuab ntuas tau lawv tej menyuam (nqe 18).
Thaum paub tseeb thiab ntseeg ruaj khov rau Vajtswv Txojlus lawm, niam txiv yuav tsum qhuab qhia tej lus ntawd rau tej xeebleej xeebntxwv. Tsis yog tsuas qhia rau lawv thaum los zaum kawm Vajluskub xwb, tiamsis yuav tsum qhia txhua lub sijhawm, ntawm txhua qhov chaw (nqe 19). Cob qhia menyuam txog kev ntseeg Tswv Yexus ces yuav tsum ua tsis tu ncua txhua lub tsamthawj. Txhua hnub, thaum tawm mus nraum zoov, zaum saum tej tsheb taug kev ces yog zoo sijhawm rau niam txiv qhuab ntuas menyuam nco txog tus Tswv tej lus cogtseg. Thaum tsaus ntuj lub tsev neeg tsimnyog los nyob ua ke ua Vajtswv tsaug rau ib hnub dhau los thiab koom thov Vajtswv. Txhua taigkis sawv ntxov, ua ntej yuav pib ib hnub tshiab, niam txiv kuj yuav tsum siv Vajtswv Txojlus los qhuab ntuas kom menyuam nco ntsoov thiab ua neej haum tus Tswv siab.
Raws li cov neeg Yudais ibtxwm coj, tsis yog lawv tsuas sau Vajtswv Txojlus rau saum cajnpab, saum hauvpliaj xwb, lawv tseem yuav tsum sau tej lus ntawd rau ntawm “tej puab rooj hauv tsev thiab ntawm rooj loog” (nqe 20). Vajtswv Txojlus yuav tsum tau saib pom thiab hais txog txhua qhov chaw, vim ua li ntawd lawv thiaj yuav nco ntsoov thiab ua raws. Thaum cov Yixalayees coglus ua raws Vajtswv Txojlus ces tus Tswv coglus yuav tiv thaiv, nrog nraim thiab pub rau lawv lub tebchaws nthuav dav (nqe 21-24).
Tu siab heev vim tiam no muaj ntau nkawm niam txiv tsuas txhawj rau lub neej, thiaj tsis tseg sijhawm los qhia menyuam paub Vajtswv Txojlus. Lawv pheej xav hais tias ntawd yog Pawg Ntseeg haujlwm. Tej zaum lawv tus kheej twb tsis tau cim nco Vajtwv Txojlus rau hauv nruab siab, yog li ntawd yuav ua cas thiaj qhia tau lawv tej xeebleej xeebntxwv! Qhia Vajtswv Txojlus rau phaum hluas tsis yog feemxyuam ntawm Xibhwb lossis cov qhia menyuam yaus xwb, tiamsis cov ua niam ua txiv yuav tsum xub qhia ua ntej. Niam thiab txiv yog cov uas xub ris lub nra nyob hauv cov menyuam lub neej sab ntsujplig. Lub cuabyig yog qhov chaw rau cov menyuam tau loj hlob hauv Vajtswv Txojlus ntawm 6 hnub hauv ib lub asthiv. Vim li ntawd, niam txiv yuav tsum yog cov uas nrog nraim thiab paub meej txog lawv cov menyuam txojkev ntseeg txhua hnub.
Thov Vajtswv
Tus Tswv, thov zam txim rau nyuam yaus vim tsis tau qhia tej menyuam txog chaw. Thov pab nyuam yaus paub siv txhua sijhawm, txhua qhov chaw los qhia Vajtswv Txojlus rau tej menyuam paub Koj. Amees.
Peb puas tas siab tas ntsws ua tes haujlwm Cob qhia peb tej xeebleej xeebntxwv los ntawm Vajtswv txojlus lawm tau?
Nyeem Vajluskub hauv peb lub xyoos: Lukas 13:1-30
Kênh Youtube BHKTHN:
