Klei Aê Diê Blŭ: Klei Yap 11:24-30
Êlan kliăng: “Pô pla leh anăn pô krih êa jing msĕ, leh anăn grăp čô srăng mă tŭ klei mưn tui si bruă ñu ngă leh.” (I Kôrantô 3:8)
Klei êmuh ksiêm mĭn: Ya mâo klei truh ti krah phung khua mduôn? Si Y-Yôsuê lŏ wĭt ngă hŏng klei anăn? Ya klei Y-Môis mtô leh kơ ñu? Ya drei ngă čiăng dưi hĭn hŏng klei blŭ dŭñ dŭñ êjai mă bruă kơ Aê Diê?
Klei dleh dlan ăt lŏ truh mơh tơdah dua čô khua mduôn Y-Êldat leh anăn Y-Mêdat amâo hmư̆ ôh klei Y-Môis iêô nao bi kƀĭn, ƀiădah ăt dôk hlăm wăl leh anăn blŭ klei hưn êlâo. Drei amâo thâo ôh ya ngă dua čô khua mduôn anei amâo nao bi kƀĭn, ƀiădah amâo mâo klei ƀuah ôh kơ klei diñu dua êkŭt hlăm klei bi kƀĭn, leh anăn Aê Diê ăt bi klă bruă klam diñu hŏng klei kčŭt ai tiê diñu blŭ klei hưn êlâo, jing klei bi knăl sĭt kơ bruă diñu ngă amâo soh ôh.
Hlăk hmư̆ hưn mthâo klei snăn, Y-Yôsuê akâo kơ Y-Môis ghă dua čô anei blŭ klei hưn êlâo. “ƀiădah Y-Môis lač kơ ñu: Ih nač kyua kâo hĕ?” Klei êmuh anei brei ƀuh Y-Yôsuê mâo klei nač. Jing “dĭng buăl Y-Môis” kyuanăn năng ai Y-Yôsuê amâo čiăng ôh dua čô Y-Êldat leh anăn Y-Mêdat – phung “dôk hlăm sang” – dưi mă tŭ klei ktang myang mơ̆ng Aê Diê brei, snăn ñu lŏ wĭt ngă hŏng klei amâo mơak ôh leh anăn blŭ dŭñ dŭñ hŏng Y-Môis. Klei msĕ snăn ăt tuôm truh mơh ti krah phung khua ƀĭng kna, hlăk diñu ghă phung amâo djŏ hlăm êpul diñu ôh yua Anăn Khua Yang Yêsu suôt yang jhat (Y-Markôs 9:38).
Đăm wơr bĭt ôh, drei amâo mă bruă kơ mnuih ôh, kăn mă bruă kơ drei pô rei, ƀiădah mă bruă kơ Aê Diê, snăn đăm drei bi kdriêl knhal hĕ ôh bruă Ñu (Philip 1:15-21). Hruê anei, năng ai drei êlưih lĕ hlăm klei čhuai msĕ si Y-Yôsuê mơh hlăm klei mă bruă, mĭndah knŏng klei drei pô yơh jing djŏ, amâodah amâo tŭ ư ôh hŏng phung mdê “êpul” hŏng drei, amâodah nač kyuadah ƀuh ayŏng amai adei pô Aê Diê yua bruă mâo klei tŭ dưn.
“Y-Môis lač kơ ñu, ‘Ih nač kyua kâo hĕ? Kâo čiăng kơ jih jang phung ƀuôn sang Yêhôwa jing phung khua pô hưn êlâo, čiăng kơ Yêhôwa dưm Mngăt Myang Ñu ti digơ̆.’ ” (êlan 29). Y-Môis mtô leh kơ Y-Yôsuê ƀuh klă klei soh čhuai ñu, leh anăn đru ñu thâo săng djŏ si klei mă bruă kơ Aê Diê jing. Tơdah kƀah klei thâo săng djŏ anei năng ai srăng atăt truh kơ klei bi kah phung, leh anăn wăt klei blŭ dŭñ dŭñ ngă bi êka ai tiê hdơ̆ng pô hlăm klei mă bruă kơ Aê Diê.
Hruê anei, brei drei pŏk êhai bruă Aê Diê kơ lu mnuih, leh anăn ktang lu mnuih mă bruă kơ Aê Diê ktang jăk hĭn êjai, wăt tơdah lu klei mdê hŏng drei pô. Brei hdơr nanao snei, klei iêô leh anăn klei pap hlăm bruă klam jing bruă Aê Diê, amâo djŏ bruă drei ôh. Khua kiă kriê đăm mâo ôh klei mĭn, kâo yơh “brei klei dưi” kơ ayŏng amai adei mă bruă kơ Aê Diê, leh anăn tơdah digơ̆ amâo ngă ôh tui si klei mĭn drei pô, snăn khăt lui hĕ yơh bruă digơ̆, ƀiădah brei drei luă gŭ hrăm mbĭt ngă bruă kơ Aê Diê, hŏng jih ai tiê bi mđĭ ai hdơ̆ng găp leh anăn brei mông găl kơ jih jang mnuih ngă bruă mbĭt.
Si ngă drei dôk bi mđĭ ai amâodah bi kgăn mnuih mkăn ngă bruă kơ Aê Diê?
Wah lač: Ơ Khua Yang, bi mni kơ Khua Yang kơ Phung Sang Aê Diê Ih, kơ phung ayŏng amai adei mă bruă kơ Khua Yang mbĭt hŏng kâo. Brei kâo tui duah klei guh kơang Khua Yang, hŏng jih ai tiê rŭ Phung Sang Aê Diê čiăng kơ kâo luă gŭ nanao ti anăp Khua Yang leh anăn ti anăp phung ayŏng amai adei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
