Teev Npe 11:24-30
Nqe cim:
“Tus uas cog thiab tus uas ywg dej, nkawd tes haujlwm zoo ib yam nkaus; Vajtswv yuav muab nqi zog rau nkawd raws li tes haujlwm uas nkawd ua” (I Kauleethaus 3:8)
Lug nug rau sawvdaws xav:
– Muaj teebmeem dabtsi tshwmsim hauv cov txwjlaug?
– Yausuas ua licas?
– Mauxes tau qhia rau nws yam dabtsi?
– Peb yuav tsum ua dabtsi kom kovyeej kev yws taus thaum ua tus Tswv haujlwm?
Rov muaj teebmeem tshwmsim thaum ob tug txwjlaug uas yog Edas thiab Medas tsis tuaj raws li Mauxes tej lus hu, nkawd nyob hauv lub yeej xwb tiamsis nkawd kuj qw tau ib yam li cov cev Vajtswv lus. Peb tsis paub hais tias vim licas ob tug txwjlaug tsis tuaj tiamsis vim tsis muaj lus cem txog qhov uas nkawd tsis tuaj thiab Vajtswv kuj koob zeem nkawd tes haujlwm los ntawm qhov uas tshoov nkawd siab cev tau Vajtswv lus, qhov ntawd qhia tau hais tias nkawd yeej tsis tau ua txhaum dabtsi li.
Thaum hnov neeg tuaj qhia zaj ntawd, Yausuas tau thov Mauxes txwv ob tug txwjlaug no cevlus. “Mauxes teb hais tias: Koj pab kuv mob siab thiab los?” Lo lus no qhia pom tias Yausuas khib nkawd. Yog tus uas “ibtxwm ua tus pab Mauxes” tej zaug Yausuas tsis xav kom Edas thiab Medas – cov uas “nyob hauv tsev” xwb – kuj tau lub hwjchim uas tus Tswv muab pub, nws thiaj xav tsis zoo thiab yws rau Mauxes. Qhov no kuj tshwm muaj nyob hauv cov Timthawj thaum lawv txwv cov neeg uas tsis yog lawv pab tuav Tswv Yexus lub npe ntiab dab (Malakaus 9:38).
Txhob hnov qab hais tias peb tsis yog ua haujlwm rau tibneeg, kuj tsis yog ua haujlwm rau tus kheej, tiamsis yog ua haujlwm rau Vajtswv, yog li ntawd txhob muab cej ciam rau Vajtswv tes haujlwm (Filipis 1:15-21). Niaj hnub nimno, qee zaug peb kuj poob mus rau Yausuas qhov kev txhaum nyob hauv kev ua haujlwm thaum xav hais tias peb thiaj yog, lossis tsis txais cov uas tsis yog peb “pab”, lossis khib vim pom yus cov kwvtij tau tus Tswv siv ua haujlwm tawg paj txi txiv.
“Mauxes teb hais tias: Koj pab kuv mob siab thiab los? Kuv yeej xav kom tus TSWV pub nws tus ntsujplig rau nws haivneeg txhua tus huv tibsi, kom lawv hais tau li cov cev Vajtswv lus hais ntag!” (nqe 29). Mauxes tau qhia rau Yausuas pom nws qhov txhaum thiab pab nws zeem paub meej txog kev ua tus Tswv haujlwm. Yog tsis paub qhov tseeb no tej zaug yuav ua rau muaj tej kev sib faib, thiab tej lus sib yws ua rau muaj kev ntsawv siab nyob hauv kev ua haujlwm.
Niaj hnub nimno, peb cia li nthuav dav tus Tswv tes haujlwm pub rau ntau tug ua, thiab yim coob neeg ua tus Tswv haujlwm yim zoo, txawm yog lawv yuav tsis zoo thooj peb. Yuav tsum nco ntsoov hais tias kev nqua hu thiab txoj koob hmoov yog Vajtswv li haujlwm, tsis yog peb li haujlwm. Tus thawjcoj sab ntsujplig tsis txhob xav hais tias yus “pub cai” rau lwm tus kwvtij ua tus Tswv haujlwm, thiab yog lawv tsis ua raws yus siabnyiam ces cia li muab lawv tes haujlwm txiav, tiamsis yuav tsum txo hwjchim, sib koom tes, sib txhawb zog thiab pub rau sawvdaws tau ua tus Tswv tes haujlwm.
Thov Vajtswv,
Tus Tswv, thov ua Koj tsaug vim Koj pub nyuam yaus muaj Pawg Ntseeg, muaj cov kwvtij koom ua Koj tes haujlwm. Thov pub nyuam yaus paub ua rau Koj tau koob meej, tas siab ntsws txhim kho Pawg Ntseeg, paub txo hwjchim tabmeeg Koj thiab lwm tus. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb tabtom txhawb zog lossis tav lwm tus kev ua tus Tswv haujlwm?
Nyeem Vajluskub hauv peb lub xyoos: Cov Thawjtswj 21
Kênh Youtube BHKTHN:
