Klei Aê Diê Blŭ: II Têsalônik 2:5-
Êlan kliăng: “Leh anăn diih thâo hlei pô kơ̆ng ñu ară anei, čiăng kơ ñu dưi bi êdah djŏ ênuk ñu” (II Têsalônik 2:6)
Klei êmuh ksiêm mĭn: Ya klei Khua ƀĭng kna Y-Pôl lŏ bi hdơr kơ phung đăo ti ƀuôn Têsalônik kơ pô bi kdơ̆ng hŏng Yang Krist? Y-Pôl hưn bi êdah klei dưi pô soh ya klei ñu čiăng bi êrâo phung đăo? Mmông Khua Yang bi hriăm drei si ngă srăng hdĭp?
Hlăm êlan 5, Khua ƀĭng kna Y-Pôl lŏ bi hdơr kơ klei ñu tuôm hưn leh kơ phung đăo ti ƀuôn Têsalônik hlăm hră ñu mơĭt tal sa kơ jih jang klei srăng truh êdei anăp, msĕ si klei Khua Yang Yêsu srăng lŏ hriê leh anăn pŭ ba Phung Sang Aê Diê bi tuôm hŏng Ñu ti êwa (I Têsalônik 4:13-18); êdei tinăn, ñu brei thâo msĕ mơh kơ bruă pô bi kdơ̆ng hŏng Krist bi êdah leh anăn mă bruă hlăm lăn ala anôk drei dôk hdĭp (II Têsalônik 2:7), dưi lač pô bi kdơ̆ng anăn jing Anti – Christ (pô bi kdơ̆ng hŏng Yang Krist) srăng bi êdah djŏ tui si ênuk Aê Diê bi kčah leh kơ ñu.
Khua ƀĭng kna Y-Pôl bi hdơr kơ phung đăo ti ƀuôn Têsalônik, tal sa, Aê Diê dôk yua klei “kơ̆ng ñu ară anei, čiăng kơ ñu dưi bi êdah djŏ ênuk ñu” (êlan 6), anei jing klei phung đăo ƀuôn Têsalônik thâo klă leh kyuanăn Khua ƀĭng kna Y-Pôl amâo lŏ mblang ôh hlăm êlan anei. Tal dua, djŏ ênuk Aê Diê, hlăk hruê arăng bi kbiă đuĕ Pô kơ̆ng, hlăk anăn yơh Anti – Christ bi êdah hŏng klei klă, leh anăn ngă jih jang bruă soh (êlan 7b – 8a). Tal tlâo, hlăk Khua Yang Yêsu lŏ hriê, Ñu srăng bi kmhal Anti – Christ hŏng “êwa mơ̆ng ƀăng êgei Ñu”, čiăng lač hŏng Klei Ñu Blŭ leh anăn klei guh kơang Ñu, bi ruĕ jih jang bruă ti lăn ala (êlan 8).
Khua ƀĭng kna Y-Pôl mtă brei răng mơh kơ klei dưi pô soh, “srăng hriê hŏng bruă mơ̆ng Satan, ngă jih klei myang, klei bi knăl leh anăn klei yuôm bhăn luar, leh anăn ngă jih klei soh mplư phung srăng rai tuč, kyuadah diñu hngah amâo khăp ôh klei sĭt nik čiăng mâo klei bi mtlaih” (êlan 9-10). Klei anei čiăng bi êrâo hlei pô dôk hdĭp hlăm klei soh, amâo čiăng kmhal ôh srăng luč mmông myun mâo klei bi mtlaih. Aê Diê brei kơ anak mnuih klei êngiê čuăn ngă mă tui si klei diñu čiăng, ƀiădah lĕ, hlei pô yua klei êngiê diñu pô čuăn “amâo đăo ôh kơ klei sĭt nik” snăn diñu srăng lĕ hlăm klei mplư tui duah klei mkăn čiăng đăo, leh anăn diñu ruah “đăo kơ klei luar” leh anăn ti knhal tuč diñu srăng tŭ klei Aê Diê phat kđi bi kmhal.
Klei Aê Diê Blŭ mtă brei grăp čô phung drei hruê anei hdơr snei, hruê Khua Yang lŏ hriê giăm truh leh, “jih jang phung amâo đăo ôh kơ klei sĭt nik ƀiădah khăp kơ klei wê srăng tŭ klei phat kđi bi kmhal” (êlan 12). Khua Yang ăt brei kơ drei mâo mmông myun kmhal kơ klei soh kyuadah Ñu amâo čiăng sa čô srăng tŭ klei djiê ôh. Kmhal bĕ kơ klei soh êjai mâo mmông myun. Đăm ngă klei amâo uêñ ôh kơ klei Khua Yang mtă kơ drei răng, đăm ngă klei amâo đăo leh anăn bi kdơ̆ng hŏng klei sĭt nik ôh čiăng drei amâo srăng lĕ hlăm klei mplư brei đăo hĕ kơ klei luar. Boh knhal tuč kơ klei ruah klei đăo jing klei hdĭp hlŏng lar, mâo klei bi mtlaih amâodah srăng tŭ klei bi kmhal hlŏng lar.
Ya drei srăng čuăn ngă mơ̆ng klei bi hriăm hlăm klei hriăm hruê anei?
Wah lač: Ơ Khua Yang khăp ơi, kâo lač jăk kơ Ih kyuadah Klei Ih Blŭ brei kâo thâo kơ mmông Ih dăp leh čiăng kơ kâo dôk kjăp hlăm klei đăo leh anăn sĭt suôr tui hlue Ih. Akâo Khua Yang brei klei jăk jĭn leh anăn thiăm ai mrâo kơ kâo čiăng kơ kâo mâo klei hdĭp doh jăk bi mơak kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Yap 35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
