Klei Aê Diê Blŭ: I Y-Timôthê 6:20-21
Êlan kliăng: “Ơ Y-Timôthê, mgang bĕ bruă Aê Diê jao leh kơ ih. Hngah kơ klei mtô hơăi mang leh anăn klei bi tăng tui si arăng soh pia jing klei thâo săng.” (I Y-Timôthê 6:20)
Klei êmuh ksiêm mĭn: Ya dua klei mtă Khua ƀĭng kna Y-Pôl klah čŭn hră mơĭt kơ anak hlăm klei đăo? Hlăm hră I Y-Timôthê, ya klei khua ƀĭng kna mtô Y-Timôthê brei ngă? Si drei yua klei bi hriăm anei?
Khua ƀĭng kna Y-Pôl klah čŭn hră mơĭt kơ Khua pô mtô mda hlăk ai Y-Timôthê hŏng sa klei brei ngă leh anăn sa klei brei hngah. Klei brei ngă jing “mgang bĕ bruă Aê Diê jao leh kơ ih” (êlan 20), jing “răng mgang klei jao leh kơ ih”. Y-Timôthê mâo jao Klei Mrâo Mrang Jăk kpă ênô, bruă brei ñu ngă jing mgang leh anăn jao kơ pô mkăn (II Y-Timôthê 2:2). Anei jing klei Aê Diê yua čiăng răng mgang leh anăn hiu hưn klei kpă ênô kluôm lăn ala. Tơdah đăo kơ Khua Yang Yêsu, drei ăt mâo jao klei kpă ênô, brei jing pô kriê dlăng kpă ênô, sĭt suôr hiu hưn klei kpă ênô.
Klei Khua ƀĭng kna Y-Pôl mtă kơ Y-Timôthê brei hngah jing “klei mtô hơăi mang leh anăn klei bi tăng tui si arăng pia bi msoh jing klei thâo săng” (êlan 20). Tăp năng msĕ si phung mtô soh čhuai mơ̆ng mphŭn pŏk hră Khua ƀĭng kna Y-Pôl lač leh jing phung kriăng mđing kơ “klei yăl dliê đưm amâo sĭt leh anăn kơ klei răk anăn aê aduôn amâo thâo tuč”, “klei anăn bi truh klei bi tăng” (I Y-Timôthê 1:4-5), drei čhuai jing brei pô ngă bruă kriê dlăng kơ klei kpă ênô hŏng klei bi tăng mgăl tơl truh knhal tuč tơdah lač kơ Klei Aê Diê Blŭ. Kyua anăn, drei ênưih lĕ hlăm klei bi tăng mgăl hơăi mang amâo thâo ruĕ, drei bi tăng kơ pruê̆ blŭ leh anăn dŭm bruă Klei Aê Diê Blŭ amâo lač êlam ôh, dŭm klei amâo hmăi ôh kơ klei bi mtlaih amâodah knuih hdĭp huĭ mpŭ. Năng ênguôt jing lu blư̆ dŭm klei bi tăng mgăl anăn “amâo ngă ôh hdră Aê Diê” (I Y-Timôthê 1:4), amâo ba klei mđĭ ai kơ hlei pô ôh, ƀiădah čiăng bi mklă drei mâo klei thâo săng êlam hĭn kơ pô mkăn!
Hlăm hră I Y-Timôthê kdrêč 4 truh 6, Khua ƀĭng kna Y-Pôl čih leh dŭm klei čiăng mtô kơ anak hlăm klei đăo pô snei, ngă pô kriê dlăng kơ klei mâo jao leh jing răng kriê klei đăo leh anăn ai tiê doh mngač, jing “bi êdah” klei đăo leh anăn knui hdĭp huĭ mpŭ kơ ayŏng adei, jing “hiu hưn leh anăn bi hriăm”; “mtô” kơ phung khua thŭn, mnuih djiê ung; jing “bi huĭ” mnuih mdrŏng,… jing pioh hruê mmông rah asăr mjeh jăk hĭn kơ luč hruê mmông hlăm klei bi tăng mgăl hơăi mang. Hlăm klei blŭ knhal tuč hră, Khua ƀĭng kna Y-Pôl lač leh klei blŭ hưn brei răng: “Kyuadah hŏng klei đa đa tŭ leh klei anăn, diñu lui wir leh klei đăo” (êlan 21). Lu blư̆ drei luč leh lu hruê mmông lu đei kơ klei bi lông kơ klei thâo tơl amâo lŏ mâo mmông rah mjeh kơ klei djŏ, klei jăk. Brei mđing pioh hruê mmông êlâo hĭn kơ dŭm bruă mơ̆ng Klei Mrâo Mrang kpă ênô.
Drei mđing mñă hdơ̆ng pô êlâo hĭn tui duah leh anăn kriê pioh klei kpă ênô Klei Mrâo Mrang Jăk bi mtlaih mơ̆?
Wah lač: Ơ Khua Yang, akâo kơ Ih đru kâo thâo răng kriê pioh klei Aê Diê jao, jing Klei Mrâo Mrang Jăk kpă ênô, hŏng klei đăo leh anăn knuih hdĭp djŏ. Akâo kơ Ih đru kâo hngah kơ klei bi tăng mgăl ƀiădah pioh hruê mmông rah mjeh klei jăk hlăm kâo pô, gŏ sang kâo leh anăn pô mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 116-118
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
