I Timôthê 6:20-21
“Ơ Timôthê, ih athei wei dôm lu nơ̆r inh pơkă kơ ih âu hŏ păng ih ‘nĕ ăn kơ đe tơplih nơ̆r pơma âu. Păng ih ‘nĕ kơ năm mơ̆ng lu bơngai năm bơtho tơdrong ‘Bok Kei-Dei mơ̆n mă ưh kơ trŏ yua kơ sư bơtho ưh kơ trŏ thoi bơ̆n ôh. Lu sư bơtho ưh kơ lei-lăi, sư bơtho kư̆ kă đĕch, mă-lei sư khan sư bơtho trŏ tơpă.”
(I Timôhê 6:20)
Nơ̆r jet tơchĕng pơwao:
– ‘Bok Pôl jơ̆ng ‘bang Kră Yang, pơtôch nơ̆r lăm kơthơ mă sư chih ăn kơ kon sư gah tơdrong lui, sư pơtôch hăm ‘bar nơ̆r bơtho khan tơdrong kiơ?
– Đơ̆ng kơthơ I Timôthê, ‘bok Pôl jơ̆ng ‘bang Kră Yang bơtho ‘bok Timôthê athei pơm lu tơdrong kiơ?
– Bơ̆n yua iŏk tơdrong bơtho ‘nâu thoi yơ?
‘Bok Pôl jơ̆ng’bang Kră Yang, pơtôch ‘bar nơ̆r lăm kơthơ sư chih ăn kơ ‘bok bơtho oei moh anăn Timôthê, tơdrong mă minh noh athei pơm, tơdrong mă ‘bar noh athei weh wer.Tơdrong mă kăl kơ pơm noh “tơdrong Kră Yang pơjao bơih kơ ih” (trong 20). ‘Bok Timôthê, Kră Yang pơjao bơih kơ sư Tơdrong ‘Nao ‘Lơ̆ng sĭt tơpă. Gah Timôthê noh athei khŏm bơwei ăn kơ sư kơdih păng pơjao pơioi ăn kơ bơngai nai dơ̆ng (II Timôthê 2:2). ‘Nâu bơih Kră Yang ‘Bok Kei-Dei đei đon sư yua tơdrong noh wă bơwei păng bơtho dơ̆ng tơdrong sĭt noh tơ jơ̆p jang teh đak. Kơplah lu bơ̆n lui sơng iŏk Kră Yang Yêsu, Kră Yang kư̆m pơjao ăn kơ bơ̆n tơdrong sĭt Sư, bơ̆n athei jing thoi lu bơngai wei tơmam, wei tơpăt,bơtho kơ bơngai nai tơdrong sĭt noh mă tơnăp tơnen.
Tơdrong mă ‘bok Pôl bơtho athei ‘bok Timôthê weh wer noh “đơ̆ng lu nơ̆r pơma kư̆ kă ưh kơ yua kiơ”, noh lu tơdrong kư̆ kă ưh kơ tơpă, ưh kơ đei yua păng lu tơdrong pơjah pơjăng jô̆ khan hlôh wao (trong 20). Phŏ phŏ kơnh nhen thoi lu bơngai bơtho chroih glăi mă ‘bok Pôl đei chih đơ̆ng blŭng a lăm kơthơ noh,’bok Pôl khan lu đe ‘maih mơ̆ng dêh “tơdrong hơ’mon gah adrĕch adrung” “lu tơdrong mă pơm ăn tơdrong pơjah pơjăng dih băl” (I Timô 1:4-5), phŏ bơ̆n ngeh kơ bơ̆n ‘nâu kăl kơ jang tơdrong jang bơwei nơ̆r sĭt noh bơwei hăm tơdrong pơjah pơjăng ưh kơ tôch mưh đe hơtŭt kơ nơ̆r lăm Sơ̆p hla bơar ‘Bok Ke-Dei. Kơlih kơ thoi noh bơih na bơ̆n ‘bônh dêh kơ huŏng lăm tơdrong pơjah pơjăng ưh kơ đei yua kiơ, mă-lei pơjah ưh kơ tôch; bơ̆n pơjah nơ̆r, chư, păng lu tơdrong mă Hla bơar ‘Bok Kei-Dei ưh kơ pơma hlom jrŭ, lu tơdrong mă huay kơ ‘bơm kơ tơdrong dŏng pơklaih, kư̆m huay kơ ‘bơm kơ tơdrong arih lui kơkuh. Trŏ kơ sơ’ngon dêh, lơ wơ̆t lu tơdrong bơ̆n pơjah pơjăng noh “ưh kơ tơgŭm pơyua tơdrong pơih să tơdrong jang ‘Bok Kei-Dei” (I Timôthê 1:4), ưh kơ ba ăn tơdrong pơlung tơiung kơ bu, mă-lei pôm pơsĭt tơ’bôh bơ̆n bơngai hlôh nơ̆r Kră Yang hloh kơ lu bơngai nai ‘noh đĕch!
Lăm kơthơ I Timôthê chăl 4 truh tơ chăl 6, ‘bok Pôl jơ̆ng ‘bang Kră Yang hlôi chih lu tơdrong bơtho ăn kơ kon sư gah bơhngol khan, jing bơngai bơwei dôm lu tơdrong Kră Yang pơjao noh đon lui sư păng jơhngơ̆m sư lăm to rơgoh ‘lơ̆ng, noh “bơtho tơ’bôh” dôm tơdrong Kră Yang păng bơtho dôm tơdrong arih, bơtho tơdrong lui kơkuh kơ ‘Bok Kei-Dei, ‘noh “ră roi păng bơtho pơhrăm”, “bơtho pơlung” lu bơngai ‘lŏ kră, lu yă adro; noh kư̆m bơtho lu bơngai mơdrŏng.v.v.., păng noh kư̆m‘măn jơ rei lu găr adrĕch ‘lơ̆ng, bơ̆n pơm dôm tơdrong noh hei ‘lơ̆ng hloh kơ bơ̆n hiong ngôi jơ năr hrăn nŏng kơ pơjah pơjăng dih băl ưh kơ đei tơgŭm pơyua kiơ. Lăm nơ̆r tuch luch lăm kơthơ,’bok Pôl jơ̆ng ‘bang Kră Yang hlôi pơma tơbăt wă kơ kơchăng, mưh pơm kơnh răm, sư khan thoi âu: “yua kơ hăt dêh chơchă tơdrong hlôh băt na đei lu mơ’nah tơhiong lê̆ đon lui” (trong 21). Phŏ kơnh bơ̆n hiong lơ jơ năr dêh lăm tơdrong pơma pơjah pơjăng, bơ̆n wă kơ jei bơ̆n, đe wă kơ jei đe gah tơdrong hlôh wao noh dĭng mah pă đei jơ wă rei lu adrĕch tơdrong ‘lơ̆ng, tơdrong trŏ wă kơ chăt, bluh. Adrol hloh, tơm hloh, bơ̆n athei ‘măn jơ năr jang bơtho Tơdrong ‘Nao ‘Lơ̆ng sĭt tơpă noh.
Ơ Kră Yang, apinh Ih tơgŭm inh kơchăng pơ’lơ̆ng bơwei dôm tơdrong đơ̆ng Ih pơjao ăn, noh Tơdrong ‘Nao ‘Lơ̆ng sĭt tơpă,bơwei đon lui, păng arih trŏ ‘blep thoi Ih wă. Apinh Ih tơgŭm inh weh wer đơ̆ng tơdrong pơjah pơjăng dih băl, ăn kơ inh ‘măn jơ rei pơtăm dôm tơdrong trŏ, tơdrong ‘lơ̆ng Ih lăm jơhngơ̆m tơdrong arih inh, rei pơtăm lăm jơhngơ̆m tơdrong arih hnam dơnŏ inh, rei pơtăm lăm jơhngơ̆m tơdrong arih bơngai nai. Inh krao khan yua anăn Kră Yang Yêsu Krist, Amen!
Tơdrong bơtho tơ’blŏk dih băl wă kơ hlôh păng bơwei tơdrong sĭt tơpă lăm Tơdrong ‘Nao ‘Lơ̆ng dŏng pơklaih, bơ̆n hăm ‘măn tơdrong noh adrol hloh, tơm hloh kơ đĭ-đăng tơdrong nai ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 116-118
Kênh Youtube BHKTHN:
