Titus 2:1-3
Nqe cim:
“Koj ntuas cov yawg laus kom lawv ua neeg xyuam xim, coj cai thiab paub tswj lawv lub siab; kom lawv muab siab rau ntseeg, muaj lub siab hlub thiab ua siab ntev.” (Titus 2:2)
Lus nug rau sawvdaws xav:
– Titus cov lus ntuas raws li qhov tseeb twg?
– Cov yawg laus, pog laus cheemtsum muaj tus mojyam dabtsi?
– Cov neeg hluas nyob hauv Pawg Ntseeg cheemtsum ua dabtsi kom txhawb tau cov laus zog?
Cia kom tsis raug cov xibhwb cuav tej lus qhia, Timthawj Paulus hais kom Titus qhia cov ntseeg paub tej uas “phim txojkev ntseeg”, txhais tau hais tias qhia tej uas phim txojkev ntseeg hauv Vajluskub qhia, tsis txhob qhia raws li kev xav lossis siv hwjchim los yuam kom ua. Cov laus, lawv yog pogyawg, niamtxiv, txiv hlob txiv ntxawm, hais tau hais tias lawv yog cov txwjlaug uas nyob hauv Pawg Ntseeg. Yog cov uas paub tab paub cai thiab ua qauv rau cov hluas xyaum, tsis txhob ua li cov neeg Kaletes “tub nkeeg uas noj ntau”, lawv yuav tsum tswj kev ua neej tsis txhob “ua neeg ntxeev siab thiab hais tej lus tsis muaj qabhau dag ntxias lwm tus kom yuam kev” (Titus 1:10-12), lawv yuav tsum “ua neeg xyuam xim, coj cai thiab paub tswj lawv lub siab”, paub tswj kev xav kev hais lus. Cov laus yuav tsum muaj tus mojyam hais tseeb thiab sib hlub kom tuav tau lub cuabyig zoo thiab coj tau Pawg Ntseeg. Tsis txhob xyaum tej neeg phem xws li hais lus dag thiab “qhia tej zaj uas tsis tsimnyog ua rau txhua tsev neeg muaj kev kub ntxhov.” (Titus 1:11).
Hais txog cov pog laus, Timthawj Paulus ntuas, “ua lawv lub neej dawbhuv rau Vajtswv tau ntsejmuag…” (nqe 3). Cov pojniam laus xws li cov ua niam, cov pog, cov ua phauj…tus cwjpwm, kev hais lus, ua haujlwm, kev coj kuj yuav tsum “dawbhuv rau Vajtswv tau ntsejmuag”, kev ua neej zoo li no yog tej zaj kawm zoo, yoojyim ua tau qauv zoo rau cov menyuam xyaum thiab cov pojniam hluas hauv Pawg Ntseeg kawm thiab ua raws. Txawv li qhov kev noj, kev ua neej ntawm cov pojniam Kaletes, cov pojniam ntseeg Yexus “tsis txhob ua neeg taug xaiv lossis ua neeg quav cawv; yuav tsum qhia tej zaj zoo rau cov pojniam hluas.” (nqe 3). Cheemtsum qhia tejmenyuam ua qhov zoo, thiab tseemceeb tsis yog cov pojniam xwb tiamsis cov txivneej kuj nyiam taug xaiv heev thiab! Thov Vajtswv pab kom peb paub tswj yus lub qhovncauj.
Pawg Ntseeg muaj txaus nkaus txhua homneeg, yog li yoojyim muaj kev tsis sib haum nyob hauv txhua tiam neeg. Timthawj Paulus qhia kom Titus yuav tsum siv Vajtswv Txojlus los ntuas sawvdaws kom ua neej raws li Vajtswv Txojlus qhia. Thaum cov pogyawg muaj hnubnyoog ua raws li cov lus ntuas no ces Vajtswv lub npe yuav tau qhuas, lawv yuav ua tau lub neej zoo li tus Tswv ua, thiab yuav ua tau qauv zoo rau tej xeebntxwv tom qab tau xyaum. Cia kom txhawb tau cov laus ua tau lub neej raws li Vajtswv Txojlus qhia, cov hluas yuav tsum hwm, hlub, saib xyuas cov laus kom Pawg Ntseeg vammeej thiab koom siab.
Thov Vajtswv,
Vajtswv, thov Koj pab kom nyuam yaus zeem paub txawm yuav nyob rau lub hnubnyoog twg, los nyuam yaus niaj hnub kawm xyaum kev ntseeg, kev tswj siab, xyuam xim, tswvyim, kev hlub thiab ua siab ntev. Thov Koj siv nyuam yaus lub neej ua qauv rau tej neeg ibncig xyaum. Nyuam yaus tuav Tswv Yexus lub npe thov, Amees.
Peb cheemtsum hloov yam dabtsi tomqab uas kawm tas zaj hnub no?
Nyeem Vajluskub hauv peb lub xyoo: I Xamuyees 30
Kênh Youtube BHKTHN:
