Klei Aê Diê Blŭ: Y‑Tit 2:1-3
Êlan Kliăng: “Mtă kơ phung êkei mduôn dôk djŏ hnơ̆ng, ênuah ênô, thâo răng, dôk kjăp hlăm klei đăo, hlăm klei khăp, leh anăn hlăm klei gĭr” (Y‑Tit 2:2)
Klei êmuh ksiêm mĭn: Mơ̆ng ya tur klei Y‑Tit mtă? Ya knuih phung êkei mduôn, mniê mduôn brei mâo? Ya klei brei phung mda asei hlăm Sang Aê Diê ngă čiăng mđĭ ai phung mduôn?
Čiăng bi kdơ̆ng hŏng klei mtô soh hŏng klei sĭt nik mơ̆ng phung khua pô mtô soh, Khua ƀĭng kna Y‑Pôl mñă kơ Y‑Tit mtô kơ phung đăo brei “mtô mta klei đăo djŏ sĭt”, jing mtô klei djŏ hŏng klei kpă ênô mơ̆ng Klei Aê Diê Blŭ, amâo djŏ ôh hlue si klei pô čiăng amâodah yua klei dưi gĭt gai mgô̆ arăng. Hŏng phung êkei mduôn, diñu jing phung aê, phung ama, amiêt, awa, dưi dlăng jing phung khua mduôn hlăm Sang Aê Diê. Hlăm bruă klam phung nao êlâo leh anăn bi hmô kơ phung mda asei, hrô kơ “ƀơ̆ng ră mă bruă alah” msĕ si phung Kret, brei diñu hdĭp djŏ hnơ̆ng hrô kơ klei hdĭp “amâo thâo gưt asăp ôh, boh nik nak hlăm phung khăt klĭt, phung blŭ klei amâo yuôm, leh anăn phung mplư” (Y‑Tit 1:10-12), brei diñu “dôk djŏ hnơ̆ng, ênuah ênô, thâo răng, dôk kjăp hlăm klei đăo, hlăm klei khăp, leh anăn hlăm klei gĭr”, thâo ư̆ ăn leh anăn răng klei mĭn, klei blŭ, ai tiê pô. Phung êkei mduôn brei mâo klei đăo sĭt leh anăn klei khăp čiăng răng kriê klei hdĭp gŏ sang leh anăn ktrâo atăt Phung Sang Aê Diê. Đăm ôh bi hmô jhat msĕ si blŭ luar leh anăn “bi rŭng jih găp djuê hlăm lu boh sang hŏng klei mtô amâo bhiăn mtô ôh kyua diñu čiăng ƀơ̆ng ngăn” (Y‑Tit 1:11).
Hŏng phung mniê mduôn, Khua ƀĭng kna Y‑Pôl mtô, “brei dôk dơ̆ng ƀơ̆ng huă hŏng klei doh jăk,…” (êlan 3). Phung mniê mduôn msĕ si amĭ, aduôn, neh, amĭ mda… snăn knuih, klei blŭ, bruă ngă, knhuah hdĭp ăt brei “doh jăk”, knuih hdĭp snăn srăng jing klei hriăm yuôm bhăn, ênưih thâo săng čiăng bi hmô jăk kơ anak čô leh anăn phung mniê hlăm Phung Sang Aê Diê tui hriăm leh anăn hlue gưt. Mdê hŏng klei dôk dơ̆ng ƀơ̆ng huă phung mniê Kret, phung mniê hlăm Sang Aê Diê “amâo jing mnuih mčeh luar amâodah jing hlŭn kơ kpiê ôh. Brei diñu mtô ya jing jăk…” (êlan 3). Brei mđing mtô anak čô klei jăk êlan djŏ, leh anăn klei yuôm bhăn amâo djŏ knŏng hjăn phung mniê ôh khăng ngă soh ƀiădah wăt phung êkei ăt soh mơh jing mčeh luar kơ pô mkăn! Akâo kơ Aê Diê đru brei thâo răng ƀăng êgei pô.
Phung Sang Aê Diê mâo djăp phung hŏng lu gưl thŭn mdê mdê kyuanăn ăt ênưih mâo klei amâo thâo bi djŏ plah wah dŭm gưl ênuk. Khua ƀĭng kna Y‑Pôl mtô Y‑Tit brei yua Klei Aê Diê Blŭ čiăng mtô kơ ênuk mdê mdê hdĭp djŏ hlue si Klei Aê Diê Blŭ Tơdah phung khua mduôn hdĭp hlue si klei mtă anei snăn Anăn Aê Diê dưi mpŭ, phung mduôn srăng jing msĕ si Khua Yang hĭn, leh anăn jing klei bi hmô jăk kơ anak čô leh anăn phung hđeh mrâo hlăm Phung Sang Aê Diê tui hlue. Čiăng mđĭ ai phung khua mduôn hdĭp hlue si Klei Aê Diê Blŭ mtô, brei phung mda asei bi êdah ai tiê mpŭ, khăp, jih ai tiê kriê dlăng phung khua thŭn čiăng kơ Sang Aê Diê dưi mkŏ mjing leh anăn sa ai.
Ya klei brei drei bi mlih, leh hriăm klei hriăm hruê anei?
Wah lač: Ơ Khua Yang khăp hơiêng, akâo kơ Ih đru kâo thâo wăt hlăm ya gưl thŭn, kâo ăt hriăm kơ knuih hdĭp klei đăo, djŏ hnơ̆ng, kpă ênuah, thâo mĭn, thâo khăp leh anăn thâo gĭr. Akâo kơ Ih yua klei hdĭp kâo čiăng bi hmô jăk kơ phung riêng gah. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
