Tơdrong Pơđơ̆k 22:26-27
Trong tơm: “’Nĕ pơgơ̆p hơdai lu bơngai pơkă rôp ti, Dah wă pơkă chă mơng hre kơ đe,”
(Tơdrong Pơđơ̆k 22:26).
Lu bơ̆n lăng thim lăm hla bơar ‘Nao Tơblang (Bản Dịch Mới)
Nơ̆r jet tơchĕng pơwao:
– Chă mơng hre kơ đe wă khan kiơ?
– Tơdrong jang chă mơng hre kơ đe pơm ăn jing pŭ iŏk tơdrong kiơ?
– Lu bơ̆n kăl kơ pơm thoi yơ wă huay kơ puh pơk lăm tơdrong jang chă mơng hre kơ đe?
Chă mơng hre kơ đe noh kăl dêh lăm tơdrong jang bơwei jên. Pơtao Salômôn lơ wơ̆t tơ’blŏk kơ kon hơ’lơ̆p gah tơdrong jang chă mơng hre kơ đe (Tơdrong pơđơ̆k 6: 1-5; 11: 15; 17: 18; 20: 6) wă tơgŭm kon hơ’lơ̆p đei đon tơchĕng gơh hơgei, pơm trŏ ‘blep. Lăm “ hơdai lu bơngai pơkă rôp ti ” dah “pơkă rôp ti” wă pơma gah tơdrong jang pơkă pơsĭt. dah bơngai bu dơ̆ng anăn chă mơng hre kơ đe bơngai noh athei pŭ iŏk lăm tơdrong jang pơm pơkeh pơdrơ̆ng chă mơng. Pơma mă tơpă dơ̆ng thoi âu bơngai noh jing bơngai hre kơ đe.
Pŭ iŏk đơ̆ng jang chă mơng hre kơ đe noh dang bơngai mơng oei hre ưh kơ ‘mong ăn, bơngai chă mơng hre kơ đe kăl kơ ăn tang hloi, dah ưh kơ ăn mă “giơng tep” tơ’ngla mă đe hre kư̆m oei iŏk mơ̆i wă kơ keh hre. Mă khan bơngai chă mơng gơh kĕ băt gah jên kơplah dơ̆ng anăn chă mơng hre kơ đe, mă-lei đơ̆ng tơdrong jang ưh kơ jing, anat anot gah jên tơmam pơm ăn kơ bơngai ‘noh ưh pă kĕ ‘mong đêl sư chă mơng hre kơ đe, “giơng tep” wă pơtih kơ tơmam pă đei bơih mă tơngla đe hre kơ sư iŏk hloi bơih “giơng tep” wă khan bơngai mă oei hre noh bĭch tơ hơnă hnam, kư̆m nhen thoi sư pă đei kiơ bơih, kơplah jang wei jên ưh kơ keh jing ‘lơ̆ng, mă akâu jăn sư kơdih ưh kơ kĕ bơwei, pơma gah hiơ̆k tơtăm kơ mĕ ‘bă, kon akăn dah bơngai nai, thoi noh kon pơlei Kră Yang kăl kơ krăng kơchăng lăm tơdrong jang chă mơng hre kơ đe.
Pơtao Salômôn pơma tơ’blŏk pơlơ̆k pơle lăm tơdrong hli krê gah jang chă mơng hre kơ đe, yua kơ sư băt lu bơngai oei hơmuh hơmŏng ‘bônh kơ glăi lăm tơdrong wei jên. Chăl dang ei, tơdrong jang chă mơng rai hlơp păng rai dêh. Lơ bơngai hơmuh hơmŏng ngăl yua hla bơar mong jên (thẻ tín dụng), tơdrong jang, dah mŭk tơmam đơ̆ng mĕ ‘bă wă mơng hre kơ đe dah dŏng tơgŭm bôl buăl, pơyô. Lơ bơngai oei pơhlŭ bôl buăl mơ̆ng păng puh pơ̆k kơ bơngai hơlĕnh, ‘leh lăm tơdrong hre đom đơ̆ng wă tơiung (chứng khoán) dah ăn mơng wă kơ đei lơi, đơ̆ng noh pơtăl dơ̆ng hre đom, pă kĕ hlôi, hli krê hloh noh lơ bơngai yua iŏk đơ̆ng ‘nhŏng mai oh lăm khul bơngai lui wă hơlĕnh pơdăr gah jên, lơ bơngai gơnang kơ lu hơmuh hơmŏng, dah lu drŏ-kăn wă lui ngeh tơgŭm lu sư gơh mơng, Pôl tơ’blŏk kơ kon pơlei Kră Yang lăm Rôm 13: 8-10 Tơdrong bơ̆n hre kơ đe, bơ̆n athei jah ăn na jah tôch. Mă gah tơdrong ‘mêm kơ bôl buăl ưh kơ tôch ôh, păng sư kư̆m tơ’blŏk dơ̆ng “ ih athei ‘mêm kơ bôl buăl thoi ih ‘mêm kơ akâu kơdih” kơplah bơ̆n ‘mêm kơ akâu bơ̆n kơdih trŏ ‘mơ̆i na gơh ‘mêm kơ bơngai nai trŏ mơ̆n păng pơchrang hơdah anăn Kră Yang, ‘nĕ ăn tơdrong hre đom chô̆ lu bơ̆n păng kư̆m kăl kơ mă hơlen lăm tơdrong wă chă mơng tơgŭm bơngai nai.
Lu bơ̆n kăl kơ arih gơh hơgei, ‘mêm mơnat thoi yơ đơ̆ng chă mơng hre kơ đe?
Kơkuh kơ Ih ơ Kră Yang, Tơ’ngla ‘mêm mơnat păng Tơ’ngla ‘lơ̆ng tơpăt, gơh hơgei. Apĭnh ih ăn kơ inh gơh hơgei lăm tơdrong bơwei jên tơmam, mă kăl hloh noh lăm tơdrong jang chă mơng hre kơ đe wă kơ tơdrong arih inh ling lang pơchrang hơdah anăn Kră Yang, yua anăn Kră Yang Yêsu Krist, Amen.
Đŏk Sơ̆p hla bơar ‘Bok Kei-Dei lăm pêng sơnăm: I Samuel 29
Kênh Youtube BHKTHN:
