Loos 10:18-21
Nqe cim:
“Tus TSWV hais tias, “Kuv tos rawv yuav teb kuv haivneeg tej lus thov, tiamsis lawv tsis thov kuv li. Kuv tos rawv lawv los cuag kuv, tiamsis lawv tsis kam los li thiab. Txawm yog kuv hais tias, ‘Kuv nyob ntawm no yuav pab nej los lawv tsis kam thov kuv li” (Yaxayas 65:1)
Lus nug rau sawvdaws xav:
– Cov Yixalayees lub tsamthawj tau muab los piav zoo li cas?
– Peb pom yam dab tsi hauv Vajtswv lub siab pub rau cov Yixalayees thiab lwm haivneeg?
– Peb txais yuav Leej Txiv saum ntuj lub siab li cas?
Hauv nqe 17, timthawj Paulus xaus lus: “Yog li ntawd, twb yog lawv hnov txojmoo zoo, lawv thiaj ntseeg, thiab txojmoo zoo uas lawv hnov ntawd yog Yexus Khetos tej lus”. Qhov tseeb cov Yixalayees yeej tsis ntseeg “cov Yixalayees tsis tau hnov txojmoo zoo los?” tsis yog li ntawd, lawv twb hnov thiab hnov ntau kawg nkaus lawm(nqe 18). Cov qhia txoj Moo Zoo lub suab twb nrov mus thoob txhua qhov chaw thiab lawv tej lus twb muab xa mus thoob plaws ntiajteb lawm, tiamsis cov Yixalayees yeej tsab tsis paub. Qhov no ua tau tim khawv hais tias “tsis yog txhua tus yuav ntseeg txojmoo zoo” (nqe 16).
Heev dua lwm haivneeg, cov Yixalayees tau Vajtswv qhia ua ntej txog tus Mexiyas. Lawv tos rawv tus Mexiyas tiamsis thaum tus Mexiyas ntawd yug los loj hlob hauv lawv, lawv haj tseem tsis paub Nws. Txawm yog Mauxes txoj kevcai thiab cov cev lus tej lus twb muaj tiav txhua lo hauv Tswv Yexus lub neej thiab lub luag haujlwm, thiab lawv qhovmuag twb pom tej txujci tseemceeb uas Tswv Yexus ua, tiamsis lawv yeej tsis txais yuav thiab tsis ntseeg. Vajtswv hu lawv hais tias lawv yog ib haivneeg tsis mloog lus thiab tawv ncauj (nqe 21).Tiamsis txawm haivneeg Yixalayees ntxeev siab, tsis ua qauv zoo rau lwm haivneeg los Leej Txiv saum ntuj yeej ua siab ntev thiab tos rawv lawv. “Vajtswv hais tias, ‘Kuv tsa kuv ob txhais tes tas hnub tos cov neeg uas tsis mloog lus thiab cov neeg uas ntxeev siab” (nqe 21). Vajtswv lub siab hlub tshua loj dav heev!
Tsis yog haivneeg Yixalayees xwb, Leej Txiv saum ntuj tseem pub Nws txoj kev hlub thiab txoj koob hmoov rau txhua haivneeg loj ib yam li Nws pub rau cov Yixalayees thiab. Txij thaum poob kev txhaum lawd, tibneeg yim hnub yim khiav deb Vajtswv, tawmtsam Vajtswv tiamsis Nws npaj tseg kev cawmdim rau tibneeg. Thaum Vajtswv haivneeg tsis paub dab tsi, ces Vajtswv txoj kev hlub twb nrov ncha moo lug mus thoob txhua qhov txhia chaw lawm (nqe18). Vajtswv xaiv lwm haivneeg thiab hauv lwm haivneeg ntawd muaj peb, ua Vajtswv haivneeg ntawm sab ntsujplig. Peb paub hais tias yeej tsis muaj ib tug tibneeg twg hauv ntiajteb no cia li mus nrhiav Vajtswv tiamsis yog Vajtswv cimciv qhia Nws rau peb paub, sib raug zoo nrog peb, tu peb yug peb li leej niam leej txiv tu lawv tus menyuam mos, “…Kuv tos, Kuv tos” (Yaxayas 65:1). Ua Vajtswv tsaug rau Nws lub siab hlub tshua. Peb txhua tus yuavtsum zeem paub Vajtswv kev hlub thiab tej koob hmoov uas Nws pub rau peb kom peb ncaj ncees nrog tus Tswv mus txog qhov kawg.
Thov Vajtswv,
Vajtswv, nyuam yaus ua Koj tsaug uas Koj txoj kev hlub muaj pub rau txhua haivneeg! Ua tsaug uas Koj tau los nrhiav thiab cawm nyuam yaus, pub lub meej mom rau nyuam yaus tau ua Koj ib tus menyuam hauv Koj tsevneeg! Aub Txiv cas Koj txoj kev hlub yuav zoo ua luaj! Thov pab kom nyuam yaus yuav nyob hauv Koj thiab muaj txoj kev nrog Koj sib raug zoo mus li. Nyuam yaus tuav Yexus Khetos lub npe thov, Amees.
Peb ua dabtsi rau Vajtswv txoj kev hlub thiab Nws txoj koobhmoov uas pub rau yus?
Nyeem Vajluskub hauv peb lub xyoo: 2 Xamuyees 8
Kênh Youtube BHKTHN:
