Tơdrong Pơđơ̆k 22:28-29
“Na yŏng sư khan: Ơ dăm, ih jang kơ inh ‘lơ̆ng tơpă, ih ưh kơ lê̆ ôh dôm tơdrong jang inh. Yua kơ ih jang ‘lơ̆ng, na mă khan tơdrong jang ih iĕ, inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm inh yŏng ih.” (Mathiơ 25:21)
Nơ̆r jet tơchĕng pơwao:
– Yua kơ kiơ ưh kơ gơh iŏk lê̆ ‘long pơ̆ng hơdral so?
– Bơngai pơnam gô đei yua iŏk thoi yơ?
– Lu bơ̆n đei yua tơdrong gơh hơgei đơ̆ng Kră Yang ăn thoi yơ, păng đei tơdrong ayơ kăl kơ tơplih?
Lăm dêh char tơ jê̆ gah hơlĕch sơ̆, lu kon pơlei lăng pơyom kơ hơdral teh bơngai bu ‘noh kư̆m thoi hơdral teh kiơ̆ kơ adrĕch adrung, tơdrong âu kăl dêh lăm tơdrong arih hnam dơnŏ păng lăm kon pơlei. Hơdral teh mă đei tơdra hăm lu hơdrơ̆ng tơmo dah pơdơ̆ng tơmo tih wă kơ hơđăl đei tơ’ngla teh mŭk tơmam mă ‘blep kiơ̆ tơdrong juăt. Tơdah ưh kơ hlôh băt păng wei răk tơdrong juăt âu, tơdrong truh tơgar tơhil băl gô đei truh tơpă. Tơdrong jang rĭ lê̆ ‘long pơ̆ng hơdai (trong 28). ‘Noh tơdrong yoch kơnê̆ kơ lu bơngai khan pran, hơgei pơjăm pơjuă lu bơngai dơnuh hin, lu bơngai ưh kơ pơ̆n oei tơ lăm kon pơlei. Khôi juăt Kră Yang đei chih tơtă kơ ‘bok Môis bơtho kon pơlei Israel: “’Nĕ kơ rĭ ‘long pơ̆ng hơdral mă đơ̆ng lu kră sơ̆ đei pơ̆ng wă klah asong teh jang sa, lăm dêh char mă Kră Yang ‘Bok Kei-Dei ăn kơ iĕm iŏk.” (Bơtho khôi juăt 19:14). Kon pơlei Kră Yang athei băt hơđăl bri seh teh choh, mŭk tơmam đơ̆ng Kră Yang ăn, yua kơ thoi noh athei pơm kiơ̆ khôi juăt Kră Yang bơtho, ưh kơ gơh hưch ham tơmam na pơgŏ pơđep, tơgar iŏk mŭk tơmam lu bơngai dơnuh hin pơmat tat, ưh kơ pơ̆n na wă tơgar iŏk kơ bơ̆n kơdih.
Pơtao Sôlômôn bơtho kon sư ưh kơ wă yua gơh hơgei hơlĕnh pơdăr na tơgar iŏk bri seh teh choh bơngai dơnuh hin pơmat tat, chă wă kơ đei lơi yua ưh kơ tơpăt, na sư khan kơ Kon Sư athei jang mă pơnam (trong 29). Ih athei pôk hơtŏk tơ lăm tơdrong jing tih hloh, ư-ang hloh. Đơ̆ng tơdrong jang hmă đĕch lăm hnam dơnŏ, ih gô awih awăn kơ pơtao, kơ kon pơlei pơla lăm teh đak. Tơdrong ‘net ‘net, pơkeh jing kơjăp athei dơ̆ng gơh kĕ pran păng đei jơhngơ̆m đon tơpăt, ưh kơ đơ̆ng hơlĕnh pơdăr ôh.
Lăm tơdrong hơ’mon hăm ‘bơ̆r tơ gah Dêh char ‘Bok Kei-Dei (Mathiơ 25:14-30). Kră Yang Yêsu bơtho gah lu bơngai mă băt lui gơnang lăm tơdrong jang mă iĕ hloh tơ ala teh âu, gô pơjao ăn tơdrong mă tih hloh tơ lăm Dêh Char Sư mă gô đei tơ anăp. Lăm năr Kră Yang jur dơ̆ng, rim ‘nu lu bơ̆n jơ̆ đĭch đam Kră Yang gô dơ̆ng ‘bơ̆t anăp Kră Yang păng roi pơdah dôm tơdrong jang mă đêl bơ̆n jang. Apinh Kră Yang tơgŭm lu bơ̆n ‘blŏk lu bơ̆n jơ̆ đĭch đam Kră Yang gơh đei đơ̆ng Sư pơjao ăn tơdrong gơh hơgei gơh jang đei lơi yua ăn tơdrong Sư. Truh năr Kră Yang jur dơ̆ng, hơpơi rim ‘nu lu bơ̆n gơh đei tơdrong apah. “Ơ dăm ih jang kơ Inh tơnăp tơpă, ih ưh kơ lê̆ ôh dôm tơdrong jang Ih. Yua kơ ih jang ‘lơ̆ng, na mă khan tơdrong jang ih iĕ, Inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm Inh Yŏng ih.”
Lu bơ̆n pơm tơ’bôh tơdrong Kră Yang mơnat ăn kơ bơ̆n thoi yơ?
Ơ Kră Yang, ‘Bă mă oei tơ plĕnh ti, inh bơnê kơ Ih ‘mêm mơnat păng ăn kơ inh gơh tơgŭm tơdrong jang lăm hnam Kră Yang. Đơ̆ng ‘bai pơhrăm năr ‘nâu, apinh ‘Bă tơ’blŏk kơ inh arih tơpăt, pơm‘lơ̆ng păng tơnăp lăm tôm tơdrong jang mă Ih pơjao. Yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 7.
Kênh Youtube BHKTHN:
