Klei Aê Diê Blŭ: Rôm 10:18-21
Êlan kliăng: “Kâo bi êdah Kâo pô kơ phung amâo tuôm duah êmuh kơ Kâo ôh; phung amâo tuôm duah Kâo ôh ƀuh Kâo leh. Kâo lač, ‘Nĕ tinei Kâo, nĕ tinei Kâo,’ kơ sa găp djuê mnuih amâo tuôm iêô wah lač kơ anăn Kâo ôh” (Y‑Êsai 65:1)
Klei êmuh ksiêm mĭn: Khua ƀĭng kna Y‑Pôl bi êdah si klei jing phung Israel jing? Ya drei ƀuh kơ ai tiê Aê Diê hŏng phung Israel leh anăn hŏng phung tue? Si drei srăng ngă hŏng klei khăp Ama drei hlăm adiê?
Hlăm êlan 17, Khua ƀĭng kna Y‑Pôl klah čŭn: “Snăn klei đăo kbiă hriê mơ̆ng klei arăng hmư̆, leh anăn klei arăng hmư̆ kbiă hriê mơ̆ng klei mtô klei Krist.” Boh sĭt gơ̆, phung Israel ăt kăn đăo rei. Diñu amâo tuôm hmư̆ hĕ? (êlan 18). Hơăi! Diñu tuôm hmư̆ leh, leh anăn hmư̆ lu blư̆. Kyuadah asăp phung hưn klei mrâo mrang jăk arăng hmư̆ leh tar ƀar lăn ala, leh anăn klei diñu blŭ truh leh ti knhal lăn ala, ƀiădah phung Israel ăt kăn thâo rei. Klei anei hưn bi sĭt kơ klei sĭt nik: “Ƀiădah amâo djŏ jih jang diñu ôh gưt kơ klei mrâo mrang jăk” (êlan 16).
Kdlưn hĭn kơ phung găp djuê mkăn, Aê Diê tuôm hưn êlâo leh kơ Yang Mêsi kơ phung Israel. Diñu dôk čang guôn Yang Mêsi, ƀiădah tơdah arăng kkiêng kơ Yang Mêsi leh anăn Gơ̆ prŏng ti krah diñu, diñu amâo mâo thâo ôh. Wăt tơdah klei bhiăn leh anăn klei hưn êlâo kơ Yang Mêsi mâo klei bi sĭt leh sơăi hlăm klei hdĭp leh anăn bruă mă Khua Yang Yêsu, diñu pô tuôm ƀuh leh lu klei yuôm bhăn leh anăn klei bi knăl mdê Khua Yang Yêsu ngă leh ƀiădah diñu ăt hngah mơh kơ Gơ̆. Khua Yang pô lač leh diñu jing sa phung ƀuôn sang amâo thâo gưt asăp leh anăn khăng kŏ (êlan 21). Ƀiădah lĕ, wăt tơdah phung Israel gao asăp Aê Diê, amâo ngă klei bi hmô jăk kơ phung găp djuê mkăn dưn, Aê Diê ăt pap leh anăn gĭr dôk guôn diñu. “Ƀiădah djŏ kơ phung Israel ñu lač, “Jih hruê Kâo pưi leh kngan kơ sa phung ƀuôn sang amâo thâo gưt asăp leh anăn bi kdơ̆ng” (êlan 21). Klei pap Aê Diê prŏng êdimima!
Amâo djŏ knŏng kơ phung Israel ôh, klei Aê Diê khăp leh anăn pap kơ phung găp djuê mkăn ăt prŏng msĕ si kơ phung Israel mơh. Mơ̆ng hruê anak mnuih lĕ hlăm klei soh, ƀrư̆ hruê ƀrư̆ anak mnuih đuĕ kbưi hĭn mơ̆ng Aê Diê leh anăn bi kdơ̆ng hŏng Ñu, ƀiădah Aê Diê mkra leh hdră bi mtlaih lăn ala. Êjai phung Israel “amâo tuôm thâo ôh” snăn klei pap Aê Diê arăng hmư̆ leh tar ƀar lăn ala. (êlan 18). Aê Diê ruah leh phung găp djuê tue, hlăm anăn mâo wăt drei mơh brei jing phung ƀuôn sang Ñu hlăm mngăt. Brei drei thâo, amâo mâo sa čô ti lăn ala čŏng čiăng duah Aê Diê ôh. Ƀiădah Aê Diê pô yơh bi êdah leh Ñu pô kơ drei, ngă klei bi mguôp sĭt suôr hŏng drei, răng kriê drei msĕ si amĭ ama răng kriê phung anak điêt digơ̆. “Nĕ tinei Kâo, nĕ tinei Kâo” (Y‑Êsai 65:1). Bi mni kơ Aê Diê kyua klei pap Ñu. Brei grăp čô drei hruê anei thâo kral klei Aê Diê khăp leh anăn pap kơ drei čiăng kơ drei tui hlue Ñu sĭt suôr tơl truh ti knhal tuč.
Ya drei srăng lŏ wĭt ngă hŏng klei Khua Yang khăp leh anăn pap kơ drei?
Wah lač: Ơ Khua Yang, kâo bi mni kơ Ih kyua klei Ih pap kơ jih jang găp djuê mnuih. Bi mni kơ Ih kyua Ih duah leh anăn bi mtlaih kâo, brei kơ kâo klei dưi jing anak Ih. Klei khăp Ih prŏng êdimima! Đru kâo bi mguôp sĭt suôr hŏng Ih leh anăn khăp kơ Ih hŏng jih ai tiê nanao. Kâo wah lač hlăm Anăn Khua Yang Yêsu Krist. Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 8
Kênh Youtube BHKTHN:
