Galati 6:4-5
“Na bơ̆n athei pơlong lăng tơdrong jang bơ̆n tơ lăm tơdrong jang ‘Bok Kei-Dei, wă kơ băt bơ̆n jang ‘lơ̆ng dah ưh. Dah bơ̆n băt kơdih bơ̆n jang ‘lơ̆ng, bơ̆n gô lăp đon hiôk chơt kơdih bơ̆n. Bơ̆n ‘nĕ pơang akâu bơ̆n kơdih khan bơ̆n lui hloh kơ đe.” (Galati 6:4)
Nơ̆r jet tơchĕng pơwao:
– Tơdrong hiơ̆k pŭ iŏk lăm bơngai “mă lui kơjăp” kăl kơ đei noh kiơ?
– Yua kơ kiơ athei pơm keh tơdrong hiơ̆k pŭ iŏk ‘nâu?
– Đei athei lăng ming kơdih akâu thoi yơ?
Pơang ‘noh tơdrong yoch trăp dêh pơm kơ lu linh jang ‘lơ̆ng rŏ iung blah plơ̆ păng jing bơngai ayăt kơ Kră Yang ‘Bok Kei-Dei (Êsai 14:12-15; Êsêkiên 28:12-17). Tơdrong pơang kư̆m pơm kơ ‘bok Ađam păng yă Êwơ ‘maih thoi Kră Yang ‘Bok Kei-Dei” (Blŭng a 3:5). Mălei bơngai “mă lui kơjăp” đei jơhngơ̆m đon ‘nao; ‘noh bơih tơdrong iŏk đon ala thoi Kră Yang Yêsu.
Minh ‘nu bơngai “mă lui kơjăp” ‘noh bơngai ‘mêm mơnat kơ bơngai nai păng wă “gơh tơgŭm dih băl”, kư̆m bơngai mă ling lang gơnang kơ Kră Yang, băt “kơdih ưh kơ lui kơjăp” păng ling lang “pơlong lăm tơdrong jang kơdih”. Kơplah minh ‘nu bơngai arih ưh kơ kiơ̆ Yang Bơhngol ‘Lơ̆ng bơtho tơ’bôh păng lăm tơdrong hơdah đơ̆ng Nơ̆r Kră Yang ‘Bok Kei-Dei, bơngai ‘noh gô jing pơang, gô “pơang akâu kơdih. Bơ̆n ‘nĕ chă tơdrong wă tơhil dih băl păng ‘nĕ kơ ‘nhĕng dih băl” (Galati 5:26). Mălei minh ‘nu bơngai iŏk đon ala ling lang băt kơ lăng ming akâu kơdih “Dah bơ̆n băt kơdih bơ̆n jang ‘lơ̆ng, bơ̆n gô lăp đon hiôk chơt kơdih bơ̆n”.
Kră Yang krao iŏk lu bơ̆n wă kơ bơ̆n băt “tơdrong pơlong lăng tơdrong jang kơdih”, pơma pha ‘biơ̆, bơ̆n ưh kơ gơh pơtŏ pơting bơ̆n kơdih hăm bơngai nai, ưh kơ pơting bơ̆n hăm bơngai pơm yoch (trong 1), mălei ‘noh “lăng ming tơdrong jang kơdih… thoi Kră Yang Yêsu Krist pơkă”, noh bơih khôi juăt ‘mêm mơnat, păng kư̆m “lăng ming tơdrong jang kơdih” băt gah tơdrong Kră Yang ‘Bok Kei-Dei mơnat ăn đĕch kơ bơ̆n. Jơ ‘noh bơ̆n ưh pă pơang dơ̆ng bơih, ưh pă sek tơlang bơngai nai kư̆ kă dơ̆ng, ưh pă bơngơ̆t tơdrong bơ̆n hloh kơ bơngai nai lăm tơdrong arih gah bơhngol ding dang yơ bơih, păng kư̆m ưh pă tơchĕng “pơang akâu kơdih. Bơ̆n ‘nĕ chă tơdrong wă tơhil dih băl păng ‘nĕ kơ ‘nhĕng dih băl”. Kơplah bơ̆n lăng ming akâu bơ̆n kơdih bơih thoi noh đei tơdrong kiơ trŏ kơ pơư kơdih noh gô mơ̆ng kơ Kră Yang pơư pơang (II Kôrintô 10:12-18) păng gah dôm tơdrong kiơ ‘Bok Kei-Dei oei bơ̆jang lăm bơ̆n hăm tơdrong mơsêh Yang Bơhngol ‘Lơ̆ng.
Hloh kơ noh dơ̆ng, ‘bok Pôl kư̆m đei tơbăt kơ lu kon Kră Yang thoi âu: “Păng bơ̆n athei wei tơdrong jang bơ̆n kơdih” (trong 5). Nơ̆r tobăt ‘nâu ưh kơ lei lăi hăm trong 2, “gơh tơgŭm dih băl”. Gah tơdrong tơm sư “gơh” (trong 2). Păng trong 5 pơma ‘bơm mă tơmam kiơ đei pŭ iŏk dah tôi, mălei ưh kơ đei pơma khan gah tơdrong pơmat na pơma gah dôm tơdrong arih lu bơ̆n hiơ̆k pŭ iŏk kơdih. Bơ̆n athei ‘mêm mơnat păng tơgŭm dôm tơdrong pơmat, mă kăl loi pơmat gah bơhngol, lu ‘nhŏng oh bơ̆n. Mălei ưh kơ yua kơ đơ̆ng tơdrong noh na hiơt “wei tơdrong” Kră Yang pơjao kơ bơ̆n kơkuh kơ Kră Yang, yak lăm tơdrong hơdah, pơnam pơm tơdrong ‘lơ̆ng, pơm keh dôm tơdrong athei păng tơdrong jang Kră Yang pơjao.v.v…
Ơ Kră Yang, apinh Ih ăn kơ inh ‘bônh kơ hlôh hăm tơdrong bơtho păng Yang Bơhngol ‘Lơ̆ng tơ’blŏk ăn wă kơ ling lang băt lăng ming akâu kơdih păng arih ‘mêm mơnat, tơpăt pơm kơ Kră Yang lăp đon. Krao khan yua anăn Kră Yang Yêsu Krist, Amen.
Bơ̆n ngăl lăng ming akâu bơ̆n kơdih ‘bơ̆t anăp Kră Yang thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Mika 4
Kênh Youtube BHKTHN:
