Klei Aê Diê Blŭ: Galati 6:4-5
Êlan kliăng: “Ƀiădah brei grăp čô ksiêm dlăng bruă ñu pô, snăn ñu srăng mâo klei dưi bi mni knŏng hlăm ñu pô, amâo djŏ hlăm pô riêng gah ñu ôh.” (Galati 6:4)
Klei êmuh ksiêm mĭn: Ya bruă klam knhal tuč kơ mnuih “mâo Yang Mngăt Jăk” brei bi mâo? Ya ngă brei bi leh bruă klam anei? Si klei iêô mthưr brei drei ksiêm dlăng drei pô?
Klei mgao jing sa klei soh prŏng hĭn ngă kơ phung dĭng buăl jăk klei mngač jing phung bi kdơ̆ng hŏng Aê Diê (Y-Êsai 14:12-15; Y-Êsêkiêl 28:12-17). Mbĭt hŏng anăn, klei mgao ngă kơ Y-Ađam leh anăn H’Êwơ čiăng jing “msĕ si Aê Diê” (Klei Mphŭn Dơ̆ng 3:5). Ƀiădah mnuih “mâo Yang Mngăt Jăk” hơô sa knuih mrâo, anăn jing knuih luă gŭ msĕ si Khua Yang Yêsu.
Sa čô mnuih “mâo Yang Mngăt Jăk” jing sa čô mnuih thâo khăp kơ mnuih mkăn, leh anăn kăp “Đru bi gui klei ktrŏ hdơ̆ng diih”, mbĭt anăn, ăt jing sa čô mnuih knang kơ Khua Yang, thâo kral kơ ñu “pô jing mnuih hơăi mang” leh anăn “ksiêm dlăng bruă ñu pô” nanao. Tơdah sa čô mnuih amâo hdĭp ôh tui si klei Yang Mngăt Jăk atăt gai leh anăn hlăm klei mngač Klei Aê Diê Blŭ, snăn mnuih anăn srăng jing mgao, srăng “duah klei hing ang amâo sĭt bi nač hdơ̆ng găp leh anăn … čôñ ăl hdơ̆ng găp…” (Galati 5:26), ƀiădah sa čô mnuih luă gŭ ksiêm dlăng ñu pô nanao “snăn ñu srăng mâo klei dưi bi mni knŏng hlăm ñu pô”.
Drei mâo klei iêô mthưr brei “ksiêm dlăng bruă ñu pô”, blŭ mdê hĭn, drei amâo bi msĕ drei pô hŏng mnuih mkăn ôh, amâo bi msĕ drei hŏng mnuih lĕ hlăm klei soh ôh (êlan 1), ƀiădah brei “ksiêm dlăng bruă ñu pô … hlăm klei bhiăn Yang Krist”, anăn jing klei bhiăn klei khăp; leh anăn ăt “ksiêm dlăng bruă ñu pô” hlăm klei thâo săng klei pap Aê Diê brei kơ ñu pô. Hlăk anăn drei amâo srăng lŏ mgao ôh, amâo lŏ phat kđi mnuih mkăn hŏng klei amâo khăp ôh, amâo lŏ mđing mĭn ôh kơ hnơ̆ng bruă pô ngă kdlưn hĭn kơ mnuih mkăn hlăm klei hdĭp myang, leh anăn ăt kăn mđing “…duah klei hing ang amâo sĭt bi nač hdơ̆ng găp leh anăn … čôñ ăl hdơ̆ng găp…”. Tơdah drei sĭt ksiêm dlăng drei pô msĕ snăn, ya mta adôk năng bi mni knŏng jing klei bi mni hlăm Khua Yang yơh (II Kôrantô 10:12-18) leh anăn kơ jih jang bruă Aê Diê dôk ngă hlăm drei hŏng klei myang Yang Mngăt Jăk.
Hĭn mơh, khua ƀĭng kna Y-Pôl ăt lŏ hưn êlâo brei phung anak ƀuôn sang Aê Diê thâo snei: “Kyuadah grăp čô srăng gui klei ktrŏ ñu pô” (êlan 5). Klei hưn êlâo brei thâo anei amâo bi dră hŏng êlan 2 ôh, “Đru bi gui klei ktrŏ hdơ̆ng diih”. Klei phŭn jing “ktrŏ” (êlan 2) leh anăn “klei ktrŏ ñu pô” (êlan 5) mblang jing msĕ, ƀiădah mdê hlăm boh klei anei. “Klei ktrŏ ñu pô” hlăm êlan 5 čiăng lač djăp mta mnơ̆ng gui klam, amâo lač kơ kluôm jih klei dleh dlan ôh, ƀiădah čiăng lač kơ bruă klam grăp čô mâo sơăi hlăm klei hdĭp pô mdê mdê. Brei drei dôk hdĭp thâo bi khăp leh anăn đru bi gui klei ktrŏ, boh nik klei ktrŏ hlăm mngăt ai tiê, phung ayŏng amai adei pô, ƀiădah amâo djŏ ôh kyua klei anăn snăn drei lui hĕ “klei ktrŏ drei pô” Aê Diê jao leh kơ drei, jing klei kkuh mpŭ kơ Aê Diê, êbat hlăm klei mngač, kriăng ngă bruă jăk, bi leh jih bruă Aê Diê iêô mthưr leh anăn bruă Aê Diê jao, đa đa mkăn…
Si drei khăng ksiêm dlăng drei pô ti anăp Khua Yang?
Wah lač: Ơ Khua Yang, brei kâo djăl pral thâo kral klei mtô lač, klei ƀuah mkra mơ̆ng Yang Mngăt Jăk, čiăng kơ kâo ksiêm dlăng klei hdĭp kâo pô leh anăn dôk hdĭp thâo bi khăp, kpă ênô, bi mơak kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mika 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
