Klei Aê Diê Blŭ: Klei Mmuñ Hđăp 33:6-12
Êlan kliăng: “Jăk mơak yơh găp djuê mâo Yêhôwa jing Aê Diê diñu, jăk mơak yơh phung ƀuôn sang Ñu ruah leh jing ngăn dưn Ñu pô!” (Klei Mmuñ Hđăp 33:12)
Klei êmuh ksiêm mĭn: Si klei pô čih hưn kơ klei myang Aê Diê ti dlông jih jang mnơ̆ng hlăm adiê leh anăn lăn ala? Ya jing êlan phŭn čiăng kơ Khua Yang hơêč hmưi kơ lăn čar? Kơ ya mta klei drei wah lač brei kơ lăn čar drei?
Pô čih Klei Mmuñ Hđăp hưn brei thâo jih phung adiê leh anăn phung mtŭ mlan hlăm adiê Yêhôwa hrih mjing hŏng “klei Ñu blŭ”, leh anăn “hŏng êwa mơ̆ng ƀăng êgei Ñu” (êlan 6). Anei jing klei blŭ hlue si klei duê kñăm kơ klei myang Khua Yang hrih mjing jih jang mnơ̆ng. Sĭt nik, Khua Yang hrih mjing jih lăn adiê anei knŏng hŏng klei Ñu blŭ (Klei Mphŭn Dơ̆ng 1). “Hŏng Ñu Aê Diê hrih jih jang mnơ̆ng, leh anăn amâo mâo sa mta mnơ̆ng hlăm jih mnơ̆ng hrih leh jing ôh tơdah amâo mâo Ñu mbĭt.” (Y-Yôhan 1:3). Kyuanăn, mâo klei dưi kơ kluôm jih jang mnơ̆ng Ñu hrih mjing.
Lŏ tui čuê, pô čih kñăm Khua Yang yơh Pô bi kƀĭn êa ksĭ leh anăn bi bŏ êa hlăm anôk pioh êa êlam (êlan 7). Klei anei kñăm kơ klei Khua Yang dôk kiă kriê ksiêm dlăng jih lăn ala phung adiê, leh anăn klei ktang myang Ñu krơ̆ng jih jang mnơ̆ng jing kjăp tui si pruê̆ êlan diñu (êlan 9). Khua Yang gĭt gai kluôm jih phung adiê lăn ala tui si klei Ñu čiăng (Klei Mmuñ Hđăp 147:15-18).
Dôk ti anăp klei ktang myang yuôm bhăn dlông hĭn mơ̆ng Khua Yang, pô čih iêô mthưr jih jang mnuih dôk hlăm lăn ala brei “huĭ mpŭ bĕ kơ Yêhôwa”, leh anăn “ktư̆ yơ̆ng ti anăp Ñu” (êlan 8). Blŭ mdê, brei anak mnuih thâo kral klei dưi ktang myang dlông hĭn mơ̆ng Khua Yang leh anăn đup gưt tui si klei Ñu čiăng. Aê Diê mâo klei dưi mtă kơ jih jang mnơ̆ng tui hlue si klei Ñu čiăng (êlan 9). Khua Yang dưi bi luč klei phung găp djuê mnuih kčĕ leh anăn amâo brei truh ôh klei phung ƀuôn sang mĭn čiăng ngă (êlan 10). Klei anei bi êdah klei ktang myang Khua Yang jing dlông hĭn kơ jih jang bruă anak mnuih čiăng ngă leh anăn klei Khua Yang dưi bi truh tui si hdră Ñu pô kñăm čiăng, wăt tơdah bi mklăk hŏng klei mĭn phung mnuih dưn. Ñu mâo klei dưi čuăn ngă bi kčah, mprăp mkra tui si klei mĭn Ñu, wăt tơdah anak mnuih mkra hdră tui si klei thâo mĭn diñu dưn (Klei Bi Hriêng 16:9). Klei Khua Yang čuăn dôk nanao hlŏng lar, leh anăn ai tiê Ñu mĭn dôk hlăm jih jang ênuk (êlan 11). Jih jang klei Khua Yang čuăn amâo tuôm mlih ôh. Khua Yang jing sĭt suôr, kyuanăn brei drei jum Ñu kiă kriê klei hdĭp drei.
Klei pô čih kñăm ăt jing êlan phŭn čiăng kơ lăn čar mâo klei jăk mơak mơh, anăn jing lăn čar brei Khua Yang jing Aê Diê diñu leh anăn Khua Yang ruah diñu jing ngăn dưn kơ Ñu (êlan 12). Sĭt nik, lăn čar brei Khua Yang jing Khua, leh anăn êbat tui hlue klei Ñu kñăm čiăng mâo klei jăk mơak êdi! Blŭ klă hĭn, lăn čar anei jing Israel, phung găp djuê Khua Yang ruah. Blŭ kluôm hĭn, jih jang phung mnuih Aê Diê ruah, yap diñu jing ngăn dưn pioh hjăn kơ Ñu ăt mâo klei jăk mơak msĕ mơh.
Bruă klam kơ grăp pô đăo kơ Krist jing wah lač brei kơ lăn čar pô dưi mâo klei jăk mơak. Wah lač brei kơ phung khua kiă kriê lăn čar drei thâo kral Khua Yang leh anăn brei Ñu jing Khua čiăng kơ lăn čar dưi mâo klei jăk mơak. Grăp čô drei brei hưn klei myang Khua Yang dôk kiă kriê leh anăn hŏng jih ai tiê wah lač brei kơ lăn čar pô.
Si ngă drei pioh mmông wah lač brei kơ lăn čar drei mơ̆?
Wah lač: Ơ Khua Yang, mpŭ mni kơ Ih leh anăn klei ktang myang Khua Yang ti dlông hĭn. Akâo Khua Yang mñă brei kâo hdơr wah lač brei nanao kơ lăn čar anôk kâo dôk hdĭp. Akâo kơ Khua Yang brei klei jăk mơak kơ lăn čar kâo! Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 36
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
