Hơriso 33:6-12
“Pŭn dêh char ayơ đei Kră Yang pơm ‘Bok Kei-Dei sư. Adrĕch adrung ayơ mă Sư rơih pơm thoi tơmam Sư!” (Hơriso 33:12)
Nơ̆r jet tơchĕng pơwao:
– Bơngai chih hla ar đei tơbăt tơdrong mơsêh mơyang Kră Yang ‘Bok Kei-Dei tơ kơpal rơwơ̆ng thoi yơ?
– Pơm liơ wă kơ dêh char wă kơ đei Kră Yang ăn pŭn hiôk noh kiơ?
– Lu bơ̆n krao khan tơdrong kiơ ăn kơ teh đak bơ̆n kơdih?
Bơngai chih Hơriso đei tơbăt đĭ-đăng plĕnh teh păng đĭ-đăng lu sơ nglŏng hơdah rang đei pơjing “hăm Nơ̆r sơkat đơ̆ng Kră Yang Yêhôwa”, păng “tơhlu hơyuh đơ̆ng ‘bơ̆r Sư” (tr.6). ‘Nâu jơ̆ nơ̆r pơma kiơ̆ kơ nơ̆r hơri pơma kơ tơdrong mơsêh mơyang đei pơjing đơ̆ng Kră Yang. Tơpă, Kră Yang pơjing plĕnh teh âu hăm ‘bơ̆r Sư sơkat đĕch(Blung a 1). “Sư kư̆m gơh pơjing tôm tơdrong. Ưh kơ đei bu nai pơjing ôh, ‘Bă Sư pơjao ăn kơ Sư pơjing tôm tơdrong” (Yôhan 1:3). Yua thoi ei, Kră Yang gơh pơm tơ jơ̆p kơ plĕnh teh mă Sư đei pơjing.
Pơtrơp dơ̆ng, bơngai chih hla ar pơma tơpăt đơ̆ng Kră Yang pơpôi akŭm đak dơsĭ păng bơwei anih đak jrŭ (tr.7). Tơdrong âu pơma kơ tơdrong mơsêh wei lăng pơgơ̆r đơ̆ng Kră Yang hăm dêh char đei pơjing păng tơdrong mơsêh mơyang bơwei dôm tơdrong tơmam ‘lơ̆ng rŏ bơ̆jang kơpal rơwơ̆ng (tr.9). Kră Yang wei pơgơ̆r plĕnh teh kiơ̆ thoi Sư lăp đon (Hơriso147:15-18).
Hăm tơdrong mơsêh mơyang Kră Yang kơjung hloh, bơngai chih hla ar krao pơtơm đĭ-đăng kon bơngai athei “hli yom kơ Kră Yang Yêhôwa”, păng athei “ hli tơtơ̆ ‘bơ̆t anăp Sư” (tr. 8 BTTHĐ). Pơma pha ‘biơ̆,kon bơngai bơ̆n kăl kơ băt tơdrong mơsêh Kră Yang kơjung hloh păng chu yom pơm kiơ̆ thoi Sư wă. Kră Yang ‘BokKei-Dei hăm tơdrong mơsêh Sư akhan athei đei na đĭ-đăng tơmam đei hloi kiơ̆ thoi Sư wă (tr.9). Kră Yang kư̆m gơh pơm pơrăm lê̆ tơdrong kon bơngai chă đon păng pơgăn lê̆ tơdrong kơnhăm đơ̆ng rim adrĕch adrŭng (tr.10). Tơdrong âu pơm tơ’bôh kơ tơdrong mơsêh Kră Yang kơjung hloh hăm dôm tơdrong gah kon bơngai bơ̆n păng tơdrong Sư gơh pơm mă Sư kơnhăm lăm kơdih Sư đĕch, mă khan tơplơ̆ hăm tơdrong kon bơngai chă đon thoi yơ hĭ. Sư gơh hơgăt lê̆,proh hơmet lê̆ kiơ̆ thoi Sư wă, mă khan kon bơngai đei tơdrong gơh hơgei păng gơh chă đon thoi yơ (Tơdrong Pơđơ̆k 16:9). Tơdrong Kră Yang chă đon gơh oei oei ling-lang păng jơhngơ̆m đon tơchĕng Sư mă đơ̆ng sơ̆ khơ̆ dang ei (tr.11). Dôm tơdrong tơchĕng Kră Yang ưh kơ đei la-yơ tơplih. Kră Yang ling-lang tơpăt, yua thoi noh athei apinh Sư mơ̆t pơgơ̆r lăm jơhngơ̆m bơ̆n.
Bơngai chih hla ar tơlĕch nơ̆r pơma tơpăt păng kư̆m pơm thoi yơ ă kơ đĭ teh đak gơh đei pŭn hiôk noh jơ̆ teh đak đei Kră Yang pơgơ̆r păng đơ̆ng Kră Yang rơih jing kon pơlei pơla Sư jing thoi tơmam Sư(tr.12). Tơpă, dêh char ayơ băt kơ Kră Yang pơm Tơ’ngla păng yak kiơ̆ trong Sư đei kơnhăm lei đei tơdrong pŭn hiôk dêh! Kiơ̆ thoi yan âu, dêh char âu ‘noh jơ̆ Isơrael, adrĕch adrung mă Kră Yang rơih iŏk. Kiơ̆ thoi nơ̆r jrŭ ‘biơ̆, đĭ-đăng kon bơngai mă Kră Yang rơih iŏk, thoi tơmam Sư kơdih kư̆m đei tơdrong pŭn hiôk.
Rim ‘nu Bơngai Lui athei pơm ‘noh athei krao khan kơ dêh char bơ̆n kơdih gơh đei pŭn hiôk. Krao khan kơ lu bơngai pơgơ̆r teh đak lu bơ̆n gơh băt kơ Kră Yang păng sơng iŏk Sư pơm Tơ’ngla wă kơ teh đak lu bơ̆n đei pŭn hiôk. Rim ‘nu lu bơ̆n kăl kơ bơtho akhan gah tơdrong mơsêh mơyang Kră Yang wei-lăng pơgơ̆r păng pơdrŭt jơhngơ̆m krao khan kơ dêh char bơ̆n kơdih.
Ơ Kră Yang, inh kơkuh kơ Ih păng tơdrong mơsêh mơyang Ih kơjung hloh. Apinh tơ’blŏk ăn kơ inh ‘blŏk kơ dêh char mă inh oei arih wă kơ krao khan tơgŭm. Apinh Ih tuh ăn pŭn hiôk kơ teh đak inh kơdih! Yua anăn Kră Yang Yêsu Krist, Amen.
Lu bơ̆n hăm ‘măn jơ’năr krao khan kơ teh đak ưh?
Đŏk Sơ̆p Hla ar’Bok Kei-Dei lăm pêng sơnăm: II Hơ’mon 36
Kênh Youtube BHKTHN:
