Klei Aê Diê Blŭ: Klei Bi Hriêng 28:14a
Êlan kliăng: “Jăk mơak yơh hlei pô huĭ mpŭ kơ Yêhôwa nanao, …” (Klei Bi Hriêng 28:14a)
Klei êmuh ksiêm mĭn: Ya mta klei ba hriê klei jăk mơak kơ sa čô mnuih? Si klei mblang kơ klei iêô mthưr anei? Si drei mă yua êlan Klei Bi Hriêng anei kơ drei pô?
Leh mtô kơ knuih brei mâo hĕ leh ngă klei soh (Klei Bi Hriêng 28:13), Mtao Y-Salômôn lŏ mtô anak kơ knhuah hdĭp kiă kriê pô amâo ngă soh ôh leh anăn kyua klei anăn yơh Khua Yang hơêč hmưi. Mtao lač snei, čiăng bi knal klei hdĭp bŏ dlai klei jăk mơak, sa čô mnuih brei “huĭ mpŭ kơ Yêhôwa nanao”. “Huĭ mpŭ” hlăm klei blŭ phŭn jing ktư̆ yơ̆ng, ngă bi ktư̆ yơ̆ng, amâodah huĭ krưp. Leh anăn yuôm hĭn jing klei ktư̆ anei amâo knŏng hlăm hbĭl hruê mmông ôh ƀiădah brei ktư̆ yơ̆ng nanao hlăm klei hdĭp.
Kna ti êlan 13 leh anăn êlan 14b, klei mtô tinei jing “ktư̆ yơ̆ng” ti anăp klei doh jăk, amâodah “ktư̆ yơ̆ng” ti anăp klei jing mnuih soh jhat pô, jing klei bi knal kơ sa čô mnuih nao giăm Khua Yang, čiăng bi mơak kơ Khua Yang, kyuanăn hmăr pral thâo kral klei soh. Anei jing klei khua ƀĭng kna Y-Pôl bi knal tơdah ñu ur krao hlăm klei ruă: “Snăn kâo ƀuh sa mta klei bhiăn snei: tơdah kâo čiăng ngă klei jăk, klei jhat đuôm ti kâo. … Knap mñai yơh kâo! Hlei pô srăng bi mtlaih kâo mơ̆ng asei mlei thâo djiê anei?” (Rôm 7:21, 24). Anei ăt jing klei bi knal sa čô pô čih mkra klei mmuñ mpŭ mni kơ Aê Diê: Ơ Khua Yang, Pô Kâo Čiăng Mâo Nanao, “Ơ Khua Yang, Pô kâo čiăng mâo nanao, êjai hơ̆k mơak amâodah ênguôt hnĭng. Klei hdĭp kâo tơdah dôk ti êngao Khua Yang, jhat ƀai, hơăi mang”. Mâo phung đăo hưn ktưn kơ diñu pô lač snei: “Ƀrư̆ dôk sui hlăm Sang Aê Diê ƀrư̆ ƀuh drei pô jing jăk hĭn kơ mnuih mkăn”, ƀiădah sa čô đăo myang srăng thâo kral sa klei sĭt nik: “Ƀrư̆ dôk giăm Khua Yang hĭn ƀrư̆ hmăr pral thâo kral klei soh hĭn, ƀrư̆ ƀuh drei pô jing soh jhat hĭn”.
Thiăm kơ klei anăn, “ktư̆ yơ̆ng nanao” čiăng lač kơ knuih sa čô mnuih tơdah dôk dơ̆ng ti anăp Khua Yang msĕ mơh, kyuanăn êlan Klei Bi Hriêng anei mtô brei hdơr nanao grăp mnĭt grăp mmông hlăm klei hdĭp grăp hruê. Tơdah hdơr kơ Khua Yang, drei srăng djă pioh klei doh jăk hlăm klei hdĭp leh anăn amâo ngă soh hŏng Khua Yang ôh, leh anăn tơdah hdơr kơ Khua Yang, drei hdĭp hŏng klei khăp, klei pap mơh. Hlăm klei bi hriêng kơ Dĭng Buăl Amâo Pap Brei Ôh (Y-Mathiơ 18:23-35), dĭng buăl anei amâo bi êngiê brei nư kơ găp ñu ôh, kyuadah ñu amâo hdơr ôh kơ klei khua ñu pap brei leh kơ ñu, khua ñu bi êngiê leh jih nư kơ ñu. Grăp blư̆ drei čiăng ăl ngêñ kơ mnuih mkăn, tơdah drei dôk hdĭp mâo Khua Yang, hdơr klei Khua Yang săn asei mlei ti kyâo bi kal kyua drei, snăn sĭt nik drei dưi pap brei kơ ayŏng amai adei drei leh anăn hŏng klei anăn amâo ngă soh hŏng Khua Yang ôh.
Mtao Y-Đawit čih leh, “Kâo pioh Yêhôwa ti anăp kâo nanao; kyuadah Ñu dôk tĭng hnuă kâo, kâo amâo srăng mgei ôh.” (Klei Mmuñ Hđăp 16:8). Tơdah drei ktư̆ yơ̆ng dôk dơ̆ng ti anăp Khua Yang, drei srăng dôk răng kơ klei hdĭp drei, dôk hdĭp mâo klei thâo khăp thâo pap, hlăk anăn amâo lŏ mâo mta klei dưi bi mgei drei ôh.
Si ngă drei bi knal mơ̆ klei jăk mơak tơdah dôk hdĭp hŏng klei khăp leh anăn klei pap?
Wah lač: Ơ Khua Yang, bi mni lač jăk kơ Khua Yang kyua tuh leh êrah čiăng bi mtlaih kâo, brei kâo jing anak Ih. Brei kâo thâo mpŭ kơ klei hdĭp mrâo Khua Yang brei kơ kâo, “mă bruă bĕ kyua klei bi mtlaih diih hŏng klei huĭ leh anăn klei ktư̆ yơ̆ng.” nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y-Yôhan 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
