Pajlug 28:14a
Nqe cim:
“Niaj hnub mloog tus TSWV tej lus koj thiaj ua neej kaj siab lug…” (Pajlug 28:14a)
Lus nug rau sawvdaws xav:
– Yam dab tsi coj kev kaj siab los rau ib tug tibneeg?
– Lo lus nqua hu no muaj lub ntsiab li cas?
– Peb siv nqe Pajlug no rau yus li cas?
Tom qab qhia txog tus cwj pwm uas yuav tsum muaj thaum ua txhaum lawm (Pajlug 28:13), Vajntxwv Xalumoos rov qhia ntxiv rau nws tus tub txog yuav ua li cas kom ceev tau tsis ua txhaum thiab tau Vajtswv foom koob hmoov. Vajntxwv hais tias cia kom tau txais koob hmoov kaj siab npluamias, mas ib tug tibneeg yuav tsum “Niaj hnub mloog tus TSWV tej lus”. Lo lus “ntshai” hauv lub ntsiab thaud yog tshee hnyo, ua rau tshee hnyo, lossis ntshai. Thiab qhov tseemceeb tshaj, hauv kev tshee hnyo no tsis yog nyob rau qee lub sijhawm xwb tiamsis yuav tsum muaj nyob hauv lub neej tsis tu li.
Raws li nqe 13 thiab 14b, cov lus qhia ntawm no yog “tshee hnyo” ntawm txoj kev dawbhuv, lossis “tshee hnyo” ntawm yus tus kheej uas yog ib tug neeg phem, no yog qhov kev paub ntawm tus neeg uas nyob ze Vajtswv, ib txwm xav ua kom haum Vajtswv siab, yog li ntawd nws thiaj zeem paub thaum twg yog kev txhaum. Nov kuj yog kev paub ntawm timthawj Paulus, nws hais nyuaj siab ntsuav hais tias: “Yog li ntawd kuv thiaj pom muaj ib txoj kevcai hais tias yog thaum twg kuv xav ua qhov zoo, qhov phem kuj nyob ze… Ua li cas kuv yuav nyuaj siab ua luaj li no? Leejtwg yuav tso kuv dim hauv lub cev uas coj mus txog kev tuag no?” (Loos 7:21, 24). Ntawm no kuj yog kev paub ntawm tus sau zaj nkauj Au tus Tswv, Kuv Pheej Xav Tau Koj: “Au tus Tswv, kuv pheej xav tau koj, thaum zoo siab lossis nyuaj siab. Kuv lub neej tsis muaj Vajtswv tsis tsim txiaj, puastsuaj”. Cov ntseeg uas pom tus kheej zoo xwb hais tias “Yim nyob ntev hauv tuamtsev yim pom yus zoo dua lwm tus” tiamsis ib tug ntseeg tseeb sab ntsujplig yuav zeem paub ib qhov tseeb hais tias: “Yim nyob ze Vajtswv npaum twg yim pom yus kev txhaum, yim pom yus phem npaum ntawd”.
Tsis tas li ntawd xwb, “pheej tshee hnyo” kuj hais txog ib tug neeg tus cwjpwm thaum sawv ntawm Vajtswv lub xubntiag, yog li ntawd nqe Pajlug no qhia kom pheej nco ntsoov txog muaj Vajtswv nyob nrog txhua lub sijhawm hauv lub neej txhua hnub. Thaum nco txog Vajtswv, peb yuav ceev lub neej dawbhuv thiab tsis ua txhaum rau Vajtswv, thiab thaum nco txog Vajtswv, peb kuj yuav ua lub neej muaj kev hlub, kev zam txim. Hauv zaj lus piv txwv txog tus tub qhe uas tsis muaj kev hlub tshua (Mathais 18:23-35), nws tsis zam rau nws tus phoojywg vim nws tsis nco txog nws tus Tswv kev hlub tshua twb zam rau nws lawm. Tej thaum peb xav chim rau lwm tus, yog peb ua neej muaj Vajtswv nyob nrog, nco txog tus Tswv tau tuag saum ntoo khaublig vim peb, ces paub tseeb hais tias peb yuav zam txim rau peb cov kwvtij nkauj muam, thiab los ntawm qhov ntawd peb tsis ua txhaum rau Vajtswv.
Vajntxwv Daviv sau hais tias, “Kuv yeej nco ntsoov hais tias tus TSWV nrog nraim kuv nyob, yeej tsis muaj ib yam dabtsi ua rau kuv ntshai, rau qhov nws nyob ze kuv” (Ntawv Nkauj 16:8). Thaum peb tshee hnyo sawv ntawm Vajtswv lub xubntiag, peb yuav ua lub neej xyuamxim, ua neej tshwm muaj kev hlub, zam txim, thaum ntawd yuav tsis muaj ib yam dab tsi ua tau rau peb tshee hnyo.
Thov Vajtswv,
Tus Tswv, nyuam yaus ua Koj tsaug vim koj cov ntshav tau ntws los cawm nyuam yaus ua Koj menyuam. Vajtswv thov pab kom nyuam yaus saib lub neej tshiab Koj pub kom muaj nqis, li Koj Txojlus qhia “Nej yuav tsum paub ntshai Vajtswv ua ibce tshee hnyo, nej thiaj yuav dim nej lub txim”. Nyuam yaus tuav Tswv Yexus Khetos lub npe thov, Amees.
Peb puas tau saj tej koob hmoov thaum uas ua neej muaj kev hlub, thiab zam txim lawm tau?
Nyeem Vajluskub hauv peb lub xyoos: 1 Yauhas 3
Kênh Youtube BHKTHN:
