Chivkeeb 9:8-17
Nqe cim:
“Thaum tus duab zaj sawv tshwm saum cov huab, kuv pom tus duab zaj ntawd, kuv yuav nco txog tej lus uas kuv tau cog tseg mus ibtxhis rau nej thiab txhua yam uas muaj sia nyob hauv ntiajteb no lawm” (Chivkeeb 9:16)
Lus nug xav:
– Vajtswv tau coglus li cas rau ntiajteb?
– Vajtswv muab tus duab zaj los ua dabtsi?
– Txhua zaus uas ntsia tus duab zaj, peb tau qhuab ntuas li cas?
Vim ua phem ua qias thiab txojkev txhaum loj kawg nkaus ntawm neeg ntiajteb, Vajtswv thiaj tso dej los nyab ntiajteb tua txhua yam uas muaj sia, tiamsis Nws pub rau Nau-es tsevneeg thiab cov tsiaj uas nce mus hauv nkoj muaj sia nyob. Lub sijhawm uas tawm hauv lub nkoj los yog lub cim pib ib qhov tshiab rau lub ntiajteb no. Thiab qhov no kuj yog lub sijhawm Vajtswv npaj coglus tseg, Vajtswv Txojlus hais tias: “Kuv coglus tseg rau nej hais tias: kuv yuav tsis tso dej los nyab txhua yam uas muaj sia kom puastsuaj li zaum no, thiab dej yuav tsis nyab lub ntiajteb kom puastsuaj li no ib zaug ntxiv lawm” (nqe 11). Nov yog cov lus cog tseg kaj siab uas Vajtswv ua rau ntiajteb, qhia hais tias Nws yog tus uas pub txojsia, tuav thiab tswj txojsia. Tseeb tiag, txawm yog lub ntiajteb no yuav muaj ntau kob dej nyab ntiajteb, los yeej tsis muaj ib kob dej nyab uas tua tau tas lub ntiajteb zoo li tiam Nau-es nyob li.
Cia kom ua tau li cov lus cog tseg no, yoojyim ntsia pom thiab nco tau, Vajtswv muab tus duab zaj los ua cim qhia: “kuv yuav ua kom muaj ib tug duab zaj sawv rau saum cov huab. Tus duab zaj ntawd yog lub cim uas kuv coglus tseg nrog neeg ntiajteb ntag” (nqe 13). Tus Tswv hais tias thaum ntsia tus duab zaj, Nws yuav nco txog cov lus cog tseg kaj siab uas Nws hais (nqe 14-16). Qhov tseeb Vajtswv yeej tsis hnov qab li. Nws yog tus ua raws li Nws hais tseg, Nws yeej yuav ua kom tiav cov lus ntawd raws li Nws tau coglus. Qhov uas Vajtswv ua tus duab zaj no yog cia kom tibneeg paub hais tias Vajtswv nco ntsoov ua li Nws hais. Tibneeg yuav tsum nco ntsoov Vajtswv yog tus uas tuav lawv txojsia thiab tuav tagnrho lub ntiajteb no.
Tom qab uas los nag tas, muaj tus duab zaj tshwm tuaj. Dej nyab ntiajteb yog qhov tua kom lub ntiajteb puastsuaj, tiamsis tus duab zaj yog lub cim thiab kev tabpov tias lub ntiajteb no yuav nyob kaj siab. Txawm yog tibneeg tseem pheej ua txhaum thiab kev txhaum yim hnub yim loj ntxiv, tiamsis los ntawm txojkev ncajncees rau tej lus cog tseg thiab kev hlub tshua, Vajtswv yeej tseem saib xyuas tswj tuav tibneeg. Nws tsis yog tsuas theem tsis rau txim xwb, tiamsis Nws tseem yog tus uas los ris kev txhaum hloov tibneeg. Qhov no yog qhov uas Tswv Yexus tau ua saum ntoo khaublig. Yog tias tus duab zaj yog lub cim Vajtswv nres tsis rau txim, ces ntoo khaublig yog lub cim Tswv Yexus ris tibneeg txojkev txhaum. Txawm yog peb tabtom nyob rau lub tebchaws Nyablaj lossis nyob lub tebchaws twg hauv ntiajte no, thaum pom tus duab zaj tshwm saum nruab ntug, peb nco tias Vajtswv yog tus uas ua raws li Nws hais, hlub thiab nco ntsoov peb.
Thov Vajtswv,
Vajtswv, thov qhuas Koj vim Koj yog tus uas coglus pub kev kaj siab rau neeg ntiajteb, thiab Koj yog tus uas ua raws li Koj hais. Txawm yog tibneeg ua txhaum, los tus Tswv tseem hlub. Thov Koj pab kom nyuam yaus paub ua neej tsimnyog Koj txoj koob hmoov thiab txojkev hlub. Thov qhia kom nyuam yaus nco ntsoov thiab ua raws li txhua yam Vajtswv hais. Nyuam yaus tuav Tswv Yexus Khetos lub npe thov, Amees.
Vajtswv ncajncees thiab ua raws li Nws cog lus, tshuav peb yuav ua li cas? Peb puas nco tej uas yus tau coglus rau tus Tswv lawm?
Nyeem Vajluskub hauv peb lub xyoo: Mikhas 6
Kênh Youtube BHKTHN:
