Luka 22:39-43
Kơkuh kơ đĭ đăng bơngai mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: Krao Khan Wă Kơ Kĕ Jei Đơ̆ng Pơhlŭ Pơlung kiơ̆ kơ Sơ̆p Hla bơar ‘Bok Kei-Dei Luka 22:39-43.
39 Yêsu yak đơ̆ng ei năm tơ kông Ôliwơ kư̆m thoi brei mơsơ̆ mơ̆n. Lu bơngai pơhrăm păng Sư kư̆m kiơ̆ hơdai Sư. 40 Lăp lu sư truh tơ ei, Yêsu khan kơ lu sư: “Iĕm athei krao khan kơ ‘Bok Kei-Dei wă kơ iĕm huay kơ lui kơ yang Satan pơhlŭ.” 41 Đơ̆ng noh na Yêsu năm ataih ataih ‘biơ̆ kơ lu đe noh na Sư sơtơ̆p kŭl tăng krao khan kơ ‘Bă Sư ‘Bok Kei-Dei. 42 Sư khan: “Ơ ‘Bă, dah gơh, lei ăn kơ Inh gơh klaih đơ̆ng tơdrong gleh âu. Mă-lei Ih ‘nĕ pơm kiơ̆ kơ Inh, pơm kiơ̆ kơ Ih đĕch.” 43 Na đơ̆ng noh blư kơ minh ‘nu linh jang ‘lơ̆ng đơ̆ng plĕnh jur tơ Sư wă tơgŭm Sư.
Trong tơm ‘bai pơhrăm ‘nâu:
“Inh wă kơ iĕm kral ngôi hơpong kơ Inh păng wă kơ iĕm krao khan kơdih wă kơ iĕm huay kơ lui kơ yang Satan pơhlŭ. Inh băt kơ jơhngơ̆m đon iĕm wă ră, mă-lei akâu iĕm ưh kơ kĕ.” (Mathiơ 26:41)
Nơ̆r jet tơchĕng pơwao:
– Pơhlŭ pơlung wă khan kiơ?
– Yang kơnê̆ pơhlŭ Kră Yang Yêsu liơ liơ?
– Pơm thoi yơ wă kơ lu bơ̆n huay kơ pơ̆k huŏng lăm tơdrong pơhlŭ pơlung?
Kơkuh kơ đĭ đăng,
Tơdrong pơhlŭ pơlung jơ̆ tơdrong Khul Bơngai Lui gô tơ’bơ̆p rim năr: “Tơdrong hưch ham kiơ̆ kơ sĕch akar, hưch ham kiơ̆ kơ măt lăng, păng pơang lăm chăl arih (I Yôhan 2:16). Tơdrong pơhlŭ pơlung blŭng a đơ̆ng dôm tơdrong tơchĕng ‘blŏk đơ̆ng tơdrong mơn đei thoi kơ ‘bâu phu, sa ‘lơ̆ng, lăng lăp măt, đơ̆ng noh truh kơ tơdrong tơchĕng gah tơdrong lơi yua mă ưh kơ trŏ mă đei mong lê̆ lăm kơ̆l ‘ngok kư̆m đơ̆ng tơdrong tơchĕng ba truh tơdrong pơm yoch. Mă đơ̆ng lu bơngai pơhrăm păng Kră Yang, ‘bok Juđa Ikariôt kư̆m đei đơ̆ng yang satan pơhlŭ pơm yoch hăm Kră Yang (Luka 22:3). Tơm sư yang kơnê̆ kư̆m pơhlŭ Kră Yang Yêsu. Kơplah sư pơtơm bơ̆jang, yang kơnê̆ yua tơmam sa, tơdrong ưang kư̆m yua lăm Nơ̆r ‘Bok Kei-Dei wă pơhlŭ pơlung, mălei kĕ jei Kră Yang lăm tôm tơdrong. Lăm pơgar Gêtsêmanê, pă ‘măng dơ̆ng, yang kơnê̆ adrin chă đon wă pơhlŭ Kră Yang wă kơ achăng lê̆ trong dŏng pơklaih. Kră Yang krao khan đĭ jơhngơ̆m, ôr re tuh bơuh bơang dang pham păng Sư gơh kĕ jei. Kră Yang tơblah hăm tơdrong gleh lap akâu akar hăm tơdrong krao khan lơ wơ̆t lơ ‘măng, trŏ thoi Sư đei bơtho lu bơngai pơhrăm păng Sư: Apinh tơdrong tơchĕng Ih gơh jing, ‘nĕ pơm kiơ̆ kơ Inh! (trong 42). Tơmam tơblah pran kơtang Kră Yang Yêsu ‘noh bơih krao khan đĭ jơhngơ̆m kiơ̆ thoi ‘Bă wă.
Wă kơ kĕ hlôi đơ̆ng pơhlŭ pơlung, Khul Bơngai Lui athei kral kơchăng krao khan păng weh ataih đơ̆ng tơdrong pơhlŭ pơlung, athei pơm mă tơpă hăm tơdrong yoch thoi Nơ̆r Kră Yang Yêsu đei bơtho: “Dah minh pah ti iĕm gah ‘ma pơm kơ iĕm yoch, chơ̆ng lê̆ minh pah ti iĕm noh, na oei pă minh pah ti, ‘noh ‘lơ̆ng hloh kơ iĕm oei tôm ‘bar pah ti mă-lei wă huŏng pơđĭ hăm akâu tơ lăm dơnâu ŭnh ‘Bok Kei-Dei phak.” (Mathiơ 5:30).
Ưh kơ kĕ đơ̆ng pơhlŭ pơlung gô ba lu bơ̆n truh kơ pơm yoch, hiong tơdrong pŭn hiôk, hiôk hian tơ ala teh âu. Tơdah oei pơm yoch hơnơ̆ng ưh kơ wă tơbral lei hiong gah bơhngol oei tơ lăm dơnâu ŭnh ling lang. Lu bơ̆n athei băt, hăm jơhngơ̆m bơ̆n kơdih, ưh kơ đei bu gơh kĕ jei hăm dôm tơdrong yoch, yua kơ thoi noh lu bơ̆n athei đĭ jơhngơ̆m krao khan, apinh Yang Bơhngol ‘Lơ̆ng tơgŭm đei jơhngơ̆m pran wă kĕ hlôi đơ̆ng pơhlŭ pơlung. Kăl kơ ‘blŏk lu bơ̆n âu ưh kơ hloh kơ lu bơngai pơhrăm păng Kră Yang ôh, “Jơhngơ̆m đon iĕm ‘maih ră, mălei akâu iĕm ưh kơ kĕ” (Mathiơ 26:41). Yua kơ thoi noh, Kră Yang Yêsu đei bơtho lu bơ̆n athei krao khan wă tơblah hăm tơdrong pơhlŭ pơlung adrol kơ tơdrong yoch pơhlŭ pơlung bơ̆n pơm yoch. “Apinh Ih ‘nĕ ăn lu nhôn lui kơ đe pơhlŭ pơlung, mălei apinh Ih dŏng pơklaih nhôn đơ̆ng tơdrong kơnê̆.” (Mathiơ 6:13 BTTHĐ). Apinh Kră Yang tơgŭm lu bơ̆n kĕ bơwei kơdih akâu gah bơhngol, đĭ jơhngơ̆m krao khan wă kơ kĕ jei đơ̆ng tơdrong pơhlŭ pơlung lăm chăl arih rim năr.
Lu bơ̆n wang pôm đon lăm nơ̆r krao khan,
Ơ ‘Bă mă ‘mêm kơeng! Inh băt kơdih kâu rơdu, ưh kơ kĕ, ling lang oei tơ’bơ̆p tơdrong pơhlŭ pơlung tăp dăr, apinh tơgŭm inh gơh weh ataih đơ̆ng pơhlŭ pơlung păng đĭ jơhngơ̆m krao khan, lui gơnang kơ Ih gơh kĕ jei đơ̆ng hưch ham kiơ̆ kơ sĕch akar, tơdrong hơlĕnh pơdăr đơ̆ng yang kơnê̆, wă kơ ăn tơdrong tơchĕng Ih gơh jing lăm chăl arih inh. Yua anăn Kră Yang Yêsu Krist, Amen.
Ơ lu bơngai mơ̆ng mă ‘mêm kơeng,
Lu bơ̆n krao khan apinh Kră Yang ăn bơ̆n kĕ hŭt lê̆, weh ataih đơ̆ng tơdrong yoch, pơhrăm pơtơ̆p jơhngơ̆m đon, krao khan thoi yơ noh wă kơ kĕ jei đơ̆ng pơhlŭ pơlung?
Kral kơchăng krao khan mă pơnam
Kră Yang ăn jơhngơ̆m pran jơhngơ̆m hiôk hơđơ̆ng
Weh ataih đơ̆ng tơdrong yang kơnê̆ chă đon
Arih kiơ̆ thoi Kră Yang wă đon lui kơjăp
Đŏk Sơ̆p Hla bơar ‘Bok Kei-Dei lăm pêng sơnăm: Êsai 62
Kênh Youtube BHKTHN:
