II Kôrintô 12:7-10
Kơkuh kơ lu bơngai mă mơ̆ng,
Năr âu lu bơ̆n gô tơchĕng pơwao ‘bai pơhrăm đei kơ̆l bai: Krao Apinh & Drơ̆ng Iŏk kiơ̆ kơ lăm Sơ̆p hla bơar Nơ̆r ‘Bok Kei-Dei II Kôrintô 12:7-10.
7 Yua kơ ‘Bok Kei-Dei kuă ăn inh pơang kơ iĕm tơdrong noh, na dang ei inh đei tơdrong nhek nhek dang jơla trŏ akar, yang Satan pơm kơ inh. 8 Pêng ‘măng boih inh apinh Kră Yang pơklaih inh đơ̆ng tơdrong âu. 9 Mă-lei Sư khan: “Huay ôh, ih kư̆ kơ jang tơdrong Inh mă tơpă đĕch, tơdrong ih jang ưh kơ kĕ ưh kơ pran noh lê̆ kơ Inh tơgŭm ih, ih ‘nĕ hiơ̆k kơ tơdrong ih pơmat-tat noh, thoi noh na đe băt kơ tơdrong mơsêh mơyang Inh tih tơpă, ih pơmat-tat dang noh mă oei jang khŏm khŏm.” Thoi noh na dang ei inh kuă boih pơang kơ iĕm tơdrong noh, pơang pơăi tơdrong inh kơtul tơrăn đĕch na Sư ăn kơ inh hiôk gơh jang tơdrong Sư khŏm khŏm. 10 Yua kơ inh wă pơư pơang anăn Yêsu Krist, na inh đei tơdrong rơdu tơrăn, đei tơdrong đe pơjăm, đei tơdrong gleh truh, tơdrong đe pơm pơmat inh, tơdrong anat anot, mă-lei jơhngơ̆m inh hiôk rai pran.
Trong tơm ‘bai pơhrăm ‘nâu:
“Pêng ‘măng boih inh apinh Kră Yang pơklaih inh đơ̆ng tơdrong âu.” (II Kôrintô 12:8)
Nơ̆r jet tơchĕng pơwao:
– Kơplah đei tơ ‘bơ̆p tơdrong hơnat, ‘‘Bok Pôl đei apinh Kră Yang thoi yơ?
– Jơhngơ̆m đon sư thoi yơ kơ plah mơ̆ng Kră Yang đei tơl khan kơ sư?
– Ih đei jơhngơ̆m đon thoi yơ kơplah ‘Bok Kei-Dei tơl ưh kơ trŏ thoi ih tơchĕng?
Kơkuh kơ đĭ đăng,
‘Bok Pôl sư jơ̆ bơngai đei tơdrong tơbơ̆p hơnat lăm tơdrong bơ̆jang kơ ‘Bok Kei-Dei (II Kôrintô 11:23-29). Mă lei jơ âu tơdrong anat noh jơ̆ ‘bơm kơ lăm akâu jăn sư kơ dih. Noh nhen thoi đei jrŭm ‘bet lăm akâu sư. Mă khan sư ưh kơ tơbăt kơ bơ̆n tơdrong kiơ noh ră mă lei lu bơ̆n đei hlôh tơdrong jĭ noh pơm ăn kơ sư jĭ sot đunh dêh, lơ wơ̆t sư ưh kơ gơh bơ̆ jang. Lơ wơ̆t “jĭ noh” đei ‘bet lăm pơm kơ sư đei jĭ, tơdrong hơpơi wă sư noh jơ̆ apinh Kră Yang puh tơweh ataih tơdrong jĭ noh đơ̆ng sư. Thoi noh sư đei krao khan apinh pêng wơ̆t wă kơ tơdrong jĭ noh weh ataih đơ̆ng sư. Mă lei Kră Yang đei khan kơ sư “tơdrong mơnat Inh tôm mah kơ ih bơih”. Ưh kơ trŏ Kră Yang ưh kơ wă lăng păng ưh kơ gơh pơklaih ôh mă lei Kră Yang wă kơ sư đei tơdrong băt mơn tơdrong mơsêh Kră Yang lăm sư. Kră Yang đei khan thoi âu: “tơdrong pran inh kĕ jei lăm tơdrong rơdu ih” (trong 9) tơdrong noh wă khan tơdrong rơdu lăm akâu jăn Bok Pôl na mơn kơ tơdrong pran đơ̆ng Kră Yang” ‘nâu kŭm tơdrong kơnhăm lăm rim chăl arih bơ̆n, băt mơn kơ akâu bơ̆n rơdu tơrăn na băt kơ tơdrong pran đơ̆ng Kră Yang, lu bơ̆n gô băt mơn kơ tơdrong pran đơ̆ng Kră Yang lơ hloh.
‘Bok Pôl đei jơhngơ̆m chơt hiôk yua kơ đơ̆ng ‘Bok Kei-Dei tơl ăn kơ sư păng sư kŭm đei băt mơn kơ tơdrong mơnat păng tơdrong pran đơ̆ng Kră Yang lăm chăl arih sư. Thoi noh sư kŭm wă adrin “’Yua kơ inh wă pơư pơang anăn Yêsu Krist, na inh đei tơdrong rơdu tơrăn, đei tơdrong đe pơjăm, đei tơdrong gleh truh, tơdrong đe pơm pơmat inh, tơdrong anat anot, mă-lei jơhngơ̆m inh hiôk rai pran” (trong 10). ‘‘Bok Pôl đei băt mơn “nhen jrŭm ‘bet” noh jơ̆ tơdrong tơ’blŏk đơ̆ng Kră Yang wă tơgŭm kơ sư đei jơhngơ̆m đon ala păng tơjur akâu jăn sư ‘bơ̆t anăp ‘Bok Kei-Dei.
Dah lu bơ̆n khan thoi âu hoei bơih păng pơang akâu kơdih lei bơ̆n gô iŏk tơdrong ư ang lăm chăl âu đĕch ưh kơ đei tơdrong pơ ư-ang đơ̆ng Kră Yang ôh. Thoi noh phŏ kơnh Kră Yang ăn kơ lu bơngai pran noh đei tơdrong truh kiơ wă kơ tơ’bôh tơdrong mơsêh pran đơ̆ng Kră Yang rơđah hloh. Đei tơdrong pơlong lăng, jĭ jăn, pơmat tat truh kơ bơ̆n mă bơ̆n ưh kơ băt hlôh, phŏ kơnh lu bơ̆n đei krao khan apinh wă kơ Kră Yang pơklaih hloi, mă lei đơ̆ng tơdrong ‘‘Bok Pôl âu, bơ̆n băt kơ tôm tơdrong đơ̆ng Kră Yang ăn kơ bơ̆n pơm tơdrong keh đang tơdrong kơnhăm đơ̆ng Sư ăn ‘lơ̆ng hloh lăm chăl arih bơ̆n. Arih hăm đon lui păng tơdrong mơnat đơ̆ng Kră Yang wă khan bơ̆n athei đei jơhngơ̆m hiôk dôm tơdrong kiơ mă ‘Bok Kei-Dei đei ăn kơ bơ̆n lăm Kră Yang Yêsu. ‘noh jơ̆ tơdrong rơdu păng tơdrong anat kơ lu bơ̆n.
Bĕ bơ̆n pôm jơhngơ̆m đon krao khan,
Kơkuh kơ Kră Yang, apinh ih tơgŭm kơ inh đĭ jơhngơ̆m krao pinh ih lăm tơdrong hơnat pat, mă lei kŭm drơ̆ng iŏk tơdrong đơ̆ng Ih đei tơl ăn kơ inh mă khan inh ưh kơ hlôh đĭ. Apinh ih tơgŭm kơ inh băt mơn kơ tơdrong pran kơtang Ih lăm tơdrong rơdu rơmơ̆n inh. Yua anăn Kră Yang Yêsu Krist, Amen.
Ơ đĭ đăng bơngai mơ̆ng mă ‘mêm kơeng,
Lu bơ̆n hăm chu yom tơdrong Kră Yang wă hơmet tơdrong hơnat bơ̆n kiơ̆ thoi Sư wă ưh?
Lăm năr pơlong pơmat
Inh gơnang kơ Ih, tơdrong mơsêh Ih
Arih kiơ thoi Ih đei tơ’bôh
Yak năm đei Kră Yang hiôk chơt rim năr.
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Êsai 66
Kênh Youtube BHKTHN:
