Bơtho Khôi Juăt 5:16
“Lui yom bĕ mĕ ‘bă ih, kiơ̆ thoi Kră Yang tơtă boih kơ ih wă kơ ih gơh arih sot păng đei tơdrong pŭn hiôk tơ kơpal teh âu mă Kră Yang ‘Bok Kei-Dei ih ăn kơ ih.” (Bơtho Khôi Juăt 5:16)
Nơ̆r jet tơchĕng pơwao:
– Nơ̆r Kră Yang bơtho kon hơ’lơ̆p athei pơm thoi yơ hăm mĕ ‘bă?
– Bơ̆n athei pơm kiơ kơplah lu mĕ ‘bă pơm kơ bơ̆n ưh kơ hiôk?
– Yua kơ kiơ bơ̆n kăl kơ krao khan kơ mĕ ‘bă?
Tơdrong lui dan tơdrong lui yom lăm tơdrong tơ’bưh băl tơduă kon bơngai. Mơjĭt nơ̆r tơtă Kră Yang ‘Bok Kei-Dei bơtho pơkă tơgŭm ăn kơ kon bơngai tơm tơdrong pơm ‘lơ̆ng păng jơhngơ̆m ‘lơ̆ng lăm tơdrong arih. Nơ̆r tơtă “Athei lui yom kơ mĕ ‘bă.” Dan đơ̆ng rŏng kơ puăn nơ̆r tơtă athei pơm gah kon bơgai bơ̆n hăm Kră Yang păng dan adrol gah nơ̆r tơtă kơ kon bơngai bơ̆n athei pơm dih băl tơduă kon bơngai.
Lui yom kơ mĕ ‘bă jơ̆ athei pơyom kơ mĕ ‘bă, ưh kơ trŏ kơ kon hơ’lơ̆p lui yom kơ mĕ ‘bă yua kơ lu sư ‘lơ̆ng tôm ôh, mălei yua kơ Kră Yang ăn kơ mĕ ‘bă dơ̆ng ‘bơ̆t anih kăl kơ lăm chăl arih kon hơ’lơ̆p trŏ kơ chu yom. Kră Yang ăn kơ mĕ ‘bă đei bơ̆n, păng ăn kơ bơ̆n đei mĕ ‘bă. Thoi noh, kon hơ’lơ̆p athei chu yom mĕ ‘bă. Phŏ đei mơ’nah anat dêh wă pơm kiơ̆, mălei ‘noh jơ̆ đơ̆ng nơ̆r Kră Yang bơtho, păng mă bu bu pơm glăi kơ tơdrong juăt ‘nâu lei gô pŭ tơdrong phak (lăng Lêwi 20:9; LĐ Êyiptơ 21:17).
Minh tơdrong ưh kơ gơh sơngah ôh noh đei mĕ ‘bă mơ’nah pơm dôm tơdrong ưh kơ hiôk tih dêh kơ kon hơ’lơ̆p. Chu yom ưh kơ trŏ khan tŭk lê̆ dah hiơt đĭ dôm tơdrong glăi yoch, jĭ rơka lăm jơhngơ̆m, mălei kon hơ’lơ̆p ‘nĕ kơ hil areh dah mă blĕk ơh, yua kơ tơdrong noh pơm kơ bơ̆n rai ưh kơ hiôk hloh. Athei pơm dôm tơdrong kiơ bơ̆n gơh pơm wă kơ jing hiôk hơiă dih băl. Nơ̆r Kră Yang bơtho “Đe pơm kơnê̆ kơ bơ̆n, bơ̆n ‘nĕ pơm tơwih kơ đe, bơ̆n athei pơm ‘lơ̆ng, pơm trŏ, pơm kiơ̆ kơ tơdrong bôl buăl mă lăp đon, bơ̆n pơm thoi noh đĕch ‘lơ̆ng. Bơ̆n ‘nĕ kơ pơm dôm tơdrong kơnê̆ wă kơ bơ̆n oei hiôk hơiă hăm đĭ đăng bơngai.” (Rôm 12:17-18). Mĕ ‘bă thoi kơting, thoi sĕch lu bơ̆n, thoi noh mưh bơ̆n pơm kơ mĕ ‘bă bơ̆n ưh kơ hiôk, lei kư̆m oei pơm kơ bơ̆n kư̆m ưh kơ hiôk mơ̆n. Athei tơ’bôh jơhngơ̆m chu yom mĕ ‘bă wă kơ mĕ ‘bă kư̆m ‘bôh kon hơ’lơ̆p băt bơnê kơ mĕ ‘bă pơjing bơ̆n đei bơ̆n lăm teh đak âu, păng kon hơ’lơ̆p athei hiơ̆k dôm tơdrong đei truh kơ mĕ ‘bă. ‘Nĕ kơ hiơt krao khan kơ mĕ ‘bă. Đei lơ tơdrong bơ̆n ưh kơ gơh pơm kơnê̆ kơ mĕ ‘bă tơplih, mălei Kră Yang gơh pơm tôm tơdrong; athei krao khan kơ mĕ ‘bă yua kơ krao khan jơ̆ minh tơdrong ‘lơ̆ng hloh wă tơ’bôh jơhngơ̆m bơ̆n chu yom.
Mĕ ‘bă ăn kơ bơ̆n đei lăm teh đak âu, mălei tơdrong arih jơ̆ đơ̆ng Kră Yang ăn. Kră Yang pơkă gô ăn tơdrong arih păng pŭn hiôk kơ dôm lu kon hơ’lơ̆p chu yom mĕ ‘bă. Athei arih băt chu yom mĕ ‘bă mă mĕ ‘bă pă jing jat tat tơdrong. Wă kơ bơ̆n huay kơ hmach kơplah mĕ ‘bă đei lăm teh đak âu! Apinh Kră Yang ăn kơ rim ‘nu lu bơ̆n ling lang tơ’bôh jơhngơ̆m oei hiôk hơiă, ‘mêm mơnat, băt bơnê kơ mĕ ‘bă.
Ơ Kră Yang, inh bơnê kơ Ih, ăn kơ inh đei mĕ ‘bă pơjing păng ‘me rong. Apinh Ih ăn kơ inh arih chu yom kơ mĕ ‘bă thoi nơ̆r Kră Yang bơtho. Apinh Kră Yang tơgŭm, đei jơhngơ̆m pran wă kơ inh jing bơngai ‘bă, bơngai mĕ, dah bơngai kon ling lang hli yom kơ Kră Yang păng arih pơm kơmĭl ‘lơ̆ng. Yua anăn Kră Yang Yêsu Krist, Amen.
Lu bơ̆n đei păng oei chu yom mĕ ‘bă thoi yơ?
Đọc Kinh Thánh trong ba năm: Ê-sai 45
Kênh Youtube BHKTHN:
