Loos 15:1-13
Nqe cim:
“Thov Vajtswv tus uas ua rau nej muaj lub siab ntev thiab muab siab rau ntseeg ntxiv pab kom nej nyob sib haumxeeb, nej thiaj yuav muaj tus yamntxwv ib yam li Yexus Khetos. Yog nej ua li ntawd, nej thiaj yuav koom tau ua ib lub siab qhuas Vajtswv tus uas yog peb tus Tswv Yexus Khetos Leej Txiv.” (Loos 15:5-6)
Lus nug rau sawvdaws xav:
– Timthawj Paulus nqua hu cov ntseeg Vajtswv yuav tsum ua neej zoo li cas?
– Vim li cas tus Tswv haivneeg yuav tsum ua neej li ntawd?
– Vajtswv Pawg Ntseeg yuav tsum ua neej muaj kev koom siab zoo li cas?
Timthawj Paulus ntuas cov neeg muaj zog, cov uas loj hlob sab ntsujplig yuav tsum nres pab cov neeg tsis muaj zog, cov uas tsawg kev ntseeg. Tus neeg muaj zog tsis txhob pheej ua kom zoo yus siab xwb tiamsis hmov tshua txog cov ntseeg uas tsawg kev ntseeg kom pab tau lawv thiab ua qauv rau lawv. “Pab” txhais tau tias nqa, thauj, ris qhov hnyav, tsaws sawv. Tus neeg muaj zog cheemtsum ua siab ntev pab cov neeg tsis muaj zog nce mus rau theem siab dua hauv sab kev ntseeg (nqe 1-2). Paulus muab tus qauv zoo rau txhua tus kawm ua raws. Tswv Yexus, tus uas yog lub Zwmtxwv thib ob hauv Vajtswv Peb Leeg tsis xaiv qhov uas ua raws li nws nyiam tiamsis ua raws li Vajtswv lub siab nyiam, muab Nws tus kheej fij los txhiv cawm neeg ntiajteb. Tswv Yexus lees yuav peb txhua tus uas yog neeg txhaum. Nws tiv ris tej kev txhaum peb ua, Nws ua siab ntev qhia kom peb ua tau zoo li Nws ua (nqe 3-6). Cov ntseeg Yexus uas nyob hauv tebchaws Loos muaj ntau haivneeg, nyias muaj nyias kev xav tiamsis txhua tus puavleej tau tus Tswv hlub, muab tus Tswv hu ua Leej Txiv. Yog li ntawd, cov kwvtij uas nyob hauv Vajtswv tsevneeg cheemtsum ua kom nyob sib haum xeeb “ib yam li Yexus Khetos” (nqe 5), txhais tau hais tias yuav tsum koom ua ib lub siab hauv Yexus Khetos tsis yog koom siab ua raws li ib tug neeg twg txojkev xav.
Thaum koom siab ua ke hauv tus Tswv ces ‘ib leeg txaus siab hlo txais yuav ib leeg” (nqe 7). Peb ib leeg yoojyim muab ib leeg tshem tawm vim tej kev sib txawv ntawm sab ntsujplig lossis kev xav, tiamsis yog peb ib leeg koom nrog ib leeg ces yog peb ua rau“Vajtswv yuav tau koob meej”! Paulus hais tias Vajtswv yog tus hais li cas Nws ua li ntawd, tej lus ua Nws cog tseg rau Anplahas, ntawm nws caj ces yuav muaj ib tug Cawmseej los, txhua haivneeg yuav tau koob hmoov (Chivkeeb 22:18). Txij nqe 9-12, Paulus muab ntau nqe Vajluskub los ua timkhawv txog Vajtswv txojkev hlub thiab txojkev npaj cawm neeg ntiajteb.
Txhua tus ntseeg Yexus puavleej tau txhiv los ntawm Tswv Yexus cov ntshav tsimtxiaj thiab puavleej muaj nqis tabmeeg Vajtswv. Yog li ntawd, cov kwvtij ntseeg Yexus yuav tsum ua lub neej kom haum Vajtswv siab, ib leeg txais yuav ib leeg. Peb cheemtsum muaj Vajtswv Txojlus qhia thiab txhawb kom peb thov Vajtswv pab sawvdaws ua tau cov ntseeg koom ib lub siab hauv Vaj Ntsujpig, koom siab ua haujlwm thiab txhawb nqa Vajtswv, sib pab kom sawvdaws loj hlob rau sab ntsujplig hauv tus Tswv.
Thov Vajtswv,
Vajtswv, thov ua Koj tsaug vim Koj hlub thiab pub koob hmoov, nyuam yaus thiaj muaj feem los ua Koj menyuam. Thov Koj pab kom nyuam yaus muaj kev ntseeg, kev hlub, kev txawj ntse thiab lub siab ntev ua neej koom nrog cov kwvtij ntseeg ua ke hauv txojkev pehawm Vajtswv thiab ib leeg pab txhawb ib leeg kom txojkev ntseeg loj hlob. Nyuam yaus tuav Tswv Yexus lub npe thov, Amees.
Peb tabtom koom siab ua raws li Vaj Ntsujplig los yog koom siab ua raws li neeg lub siab xav?
Nyeem Vajluskub hauv peb lub xyoo: Yaxayas 46
Kênh Youtube BHKTHN:
