Tơdrong Pơđơ̆k 27:19-20
“Lăng muh măt lăm đak ‘bôh thoi yơ. Jơhngơ̆m bơngai kư̆m tơ’bôh thoi noh mơ̆n. Măt kon bơngai lăng ưh kơ đei laiyơ bơ̆l hăl. Dêh atâu păng lôch răm ưh kơ đei laiyơ hrăp.” (Tơdrong Pơđơ̆k 27:19-20)
Nơ̆r jet tơchĕng pơwao:
– Chăl arih kon bơngai đei pơtih thoi minh pôm kơmĭl đei tơdrong gĭt kiơ?
– Tơdrong hưp ham kon bơngai nhen tơdrong kiơ?
– Lu bơ̆n kăl kơ tơplih tơdrong kiơ wă kơ arih lăp đon?
Tơdrong pơđơ̆k 27:19-20 tơlĕch nơ̆r roi tơbăt gah tơdrong arih kon bơngai: Thoi lĕ kơmĭl pơchrang ‘bôh bơ̆n âu bu, kư̆m thoi lĕ nơ̆r bơtho tơbăt gah anih jrŭ lăm jơhngơ̆m hưch ham. Mưh tơguăt dih băl, lu bơ̆n ‘bôh hơđăl pơm kơmĭl kơ lăm chăl arih bơ̆n ‘bôh tơplơ̆ ‘bơ̆t anih jrŭ jơhngơ̆m rơhing. Minh chăl arih ưh kơ hơđơ̆ng tơgar păng ‘nhĕng gar dih băl ‘noh bơih tơdrong tơdra wă kơ lu bơ̆n, măt lu bơ̆n oei pơgơ̆r mă bơ̆n ‘bôh ưh kơ lăp đon.
Lăm trong 19 pơtao Salômôn pơting chăl arih lu bơ̆n nhen thoi minh pôm kơmĭl pơchrang: Tơdrong bơ̆n jang pơm păng nơ̆r pơna păng tơdrong bơ̆n pơ’nhŏ pơchrang mă tơpăt dôm tơdrong kiơ tơpă lăm jơhngơ̆m dah wă kơ băt lăm jơhngơ̆m bơ̆n thoi yơ, athei lăng lăng bơ̆n yua jơnăr păng jên tơmam. Kơmĭl âu ưh kơ gơh pơma hơlĕnh ôh.
Đơ̆ng trong 20, bơngai chih hla boar âu đei tơlĕch minh tơdrong tơpă tơtăm dêh: Jơhngơ̆m kon bơngai bơ̆n nhen thoi “Dêh atâu păng lôch răm” pơma kơ jơhngơ̆m hưp ham ưh kơ hrăp. Lăm tơdrong juăt bơngai Juđê, dêh atâu (Sheol) păng lôch răm (Aba ddon) jơ̆ anih pơrăm păng anih đe lôch ưh kơ tôch, minh nih ling lang tơmơ̆t mă ưh kơ layơ ‘bĕnh. “Măt kon bơngai” đei tơplih kơ tơdrong hưp ham lu bơ̆n, Jơhngơ̆m ham ưh kơ đei lăp đon mălei hơpơi rai lơ hloh: Lơ mŭk tơmam, wă kơ đe pơ-ư hơnơ̆ng, wă kơ đe pôk pơ ư anăn kơ dih ‘nâu bơih anih jrŭ mă ưh kơ mơn lăp đon, pơkă chơt hiôk mălei tă ba ăn tơdrong kơ đei.
Wă kơ ling lang lăp đon, lu bơ̆n athei pơm tơ’bôh “Jơhngơ̆m pơngot âu tơ anih jrŭ. Lu bơ̆n kăl pơm kiơ̆ jơhngơ̆m băt bone, jơhngơ̆m băt bone âu bơih nhen thoi pơgang huch hơmet lê̆ tơdrog ưh kơ lăp đon. Rim năr, athei ‘măn tŏ sĕt phŭt ră roi pêng tơdrong na bone kơ KrăYang. Tơdrong jang ‘nâu pơtơ̆p kơ măt bơ̆n lăng ‘bôh dôm tơdrong kiơ mă lu bơ̆n đei, tơplih kơ dôm tơdrong kiơ mă bơ̆n oei kơ bah, klaih kơ dơ̆ng, athei pơm tơ’bôh hloi jơhngơ̆m hơmrah, jơhngơ̆m ‘maih wă “Sơng iŏk” na jơhngơ̆m hơmrah athei “ Chă asong”. Athei chă năr lăm giĕng wă kơ tơgŭm jơnăr dah jên tơmam ‘nĕ kơ tơchĕng khan wă pơdreo lăi. Tơdrong jang ‘nâu pơrăm lê̆ tơdrong kơtang kret tơsen. Tuch luch, trong wă pơtôch ưh kơ trŏ wă pĭt lê̆ jơhngơ̆m hưp ham, mălei wă hơmet ming mă trŏ. Nơ̆r Kră Yang khan: “Dah iĕm đei mŭk tơmam tơ plĕnh ti, jơhngơ̆m đon iĕm kư̆m tơchĕng tơ noh mơ̆n. Dah iĕm đei mŭk tơmam tơ teh âu, jơhngơ̆m đon iĕm kư̆m tơchĕng tơ teh âu mơ̆n.” (Mathiơ 6:21). Jơhngơ̆m lu bơ̆n đei pơjing kơ lu tơdrong kiơ kơjăp ling lang. Thoi lăm noh,‘nĕ ăn măt bơ̆n lăng tơ anih jrŭ lăm teh đak âu wă gơnang kơ minh ‘nu ‘Bok Dŏng pơklaih đĕch na lu bơ̆n gơh lăp đon: ‘Noh tơngla KrăYang Yêsu Krít.
Ơ KrăYang, apinh ih mơnat kơ inh yua kơ jơhngơ̆m inh oei kiơ̆ kơ jơhngơ̆m kơdih tơ ala teh âu. Apinh ih tơgŭm inh pơm kiơ̆ jơhngơ̆m băt bonê păng jơhngơ̆m hơmrah, păng apinh wă kơ inh lăng tơ ih đĕch. Tơngla mă pơm kơ inh lăp đon. Apinh chăl arih inh pơchrang jơhnơ̆m ‘lơ̆ng lăm ih krao khan yua anăn Yêsu Krist, Amen.
Lu bơ̆n ling lang lăng tơ Kră Yang dah mă oei pơ̆k huŏng lăm anih jrŭ tơ ala teh âu?
Đŏk Sơ̆p Hla bơar ‘Bok Kei-Dei lăm pêng sơnăm: Aghê 2
Kênh Youtube BHKTHN:
