Klei Aê Diê Blŭ: Klei Kbiă 29:29
Êlan kliăng: “Ƀiădah tơdah Krist truh leh jing sa čô khua ngă yang prŏng kơ klei jăk srăng truh, snăn Ñu găn sang čhiăm prŏng hĭn leh anăn jăk klă hĭn amâo djŏ kngan mnuih ngă ôh, čiăng lač amâo jing dŏ ti lăn ala anei ôh” (Hêbrơ 9:11).
Klei êmuh ksiêm mĭn: Kơ hlei pô leh anăn hbĭl ao doh jăk Y‑Arôn srăng lui? Ya ngă bruă klam Khua ngă Yang prŏng brei dưi čuê mơ̆ng ênuk anei truh ênuk êdei? Ya klei hriăm drei mâo hlăm klei hriăm hruê anei?
Aê Diê yơh jing pô mkra mjing kdrăp čhum ao yuôm bhăn kơ Y‑Arôn, Khua ngă yang prŏng tal êlâo, čiăng kơ bi guh kơang hlăm bruă ngă jing bi ala kơ phung ƀuôn sang Aê Diê ruah (Klei Kbiă 28:2). Ao doh anei mâo mnal đah da, êphôt, ao jung, ao hlăm lam, mu leh anăn hdrăng kơiêng (Klei kbiă 28). Grăp thŭn, Khua ngă yang prŏng hơô ao doh hlăm anôk doh jăk hĭn ngă klei akâo pap brei klei soh kơ pô leh anăn kơ phung ƀuôn sang. Bruă Y‑Arôn jing Khua ngă yang prŏng mjưh ruê̆ leh ñu djiê. Sa gưl knăm mđĭ jing Khua ngă yang mrâo dưi hluê ngă hlăm kjuh hruê sa čô anak êkei Y‑Arôn srăng lŏ čuê ngă Khua ngă yang prŏng leh anăn tŭ mă ao doh. Nanao snăn, bruă jing Khua ngă yang prŏng dưi čuê mơ̆ng ênuk anei truh ênuk êdei (êlan 29).
Anak mnuih hŏng klei khăp ngă soh, mâo klei bi knăl bi kdơ̆ng hŏng Aê Diê; kyua anăn, Aê Diê kčah leh klei akâo pap brei klei soh kơ phung ƀuôn sang brei ngă hlăm grăp thŭn, kyua anăn hlăm ênuk Klei Bi Mguôp Hđăp Aê Diê čiăng mâo sa čô Khua ngă yang prŏng ngă klei bhiăn bi tui klei soh. Hlăm ênuk Klei Bi Mguôp Mrâo, Khua Yang Yêsu jing Khua ngă yang kluôm dhuôm leh anăn lă lar kơ drei. Mdê hŏng phung Khua ngă yang prŏng hlăm ênuk Klei Bi Mguôp Hđăp, Khua Yang Yêsu amâo myơr mnơ̆ng bi tui kơ klei soh kơ ñu pô ôh. Ñu jing mnơ̆ng myơr doh mơ̆ng Aê Diê, tuh leh êrah bi tui klei soh kơ jih jang anak mnuih knŏng sa blư̆ djăp leh. Kơ drei jing đaŏ kơ Khua Yang Yêsu jing Pô Bi Mtlaih klam brei leh klei soh kơ drei čiăng djăp klei soh hlăm hruê mông leh êgao dưi pap brei. Êngao anăn, brei drei wah lač akâo kơ Yang Mngăt Jăk ksiêm dlăng ai tiê klei mĭn čiăng kmhal klei doh, hưn klei soh, akâo Aê Diê pap brei kơ klei soh hlăm grăp hruê leh anăn jih ai tiê mă bruă kơ Khua Yang.
Klei Aê Diê mpŭ kơ Y‑Arôn leh anăn phung anak êkei ñu, ngă kơ diñu dưi guh kơang hlăm čhiăm ao doh đru drei bi mĭn kơ klei Khua Yang Yêsu lač: “Tơdah sa čô mă bruă kơ Kâo, brei ñu tui hlue Kâo. Ti anôk Kâo dôk, dĭng buăl Kâo srăng dôk tinăn msĕ mơh. Hlei pô mă bruă kơ Kâo, Ama Kâo srăng mpŭ kơ ñu.” (Y‑Yôhan 12:26). Klei hdĭp bhiâo riâo rit, brei yap dŭm hruê pô, akâo kơ Khua Yang brei kơ drei klei thâo mĭn čiăng yua hruê mông yuôm bhăn leh anăn tŭ dưn kơ Ñu, klă sĭt drei srăng mâo klei guh kơang, amâo djŏ kyua čhiăm ao ôh ƀiădah kyua drei jih ai tiê khăp kơ Khua Yang leh anăn mă bruă kơ Ñu.
Ya klei drei srăng bi mlih mơ̆ng klei hriăm hruê anei?
Wah lač: Bi mni lač jăk kơ Khua Yang Yêsu mơak djiê hrô kơ kâo! Akâo kơ Ih đru kâo brei mđing tal êlâo kơ klei bi mguôp sĭt suôr hŏng Khua Yang, tui duah klei Ih čiăng leh anăn pai mă klei găl mă bruă kơ Ih leh anăn kơ Sang Aê Diê Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Yôp 1:1-2:10
Kênh Youtube BHKTHN:
