Khiavdim 29:29
Nqe cim:
“Tiamsis Yexus Khetos twb los ua tus Povthawj Hlob saib xyuas ib puas tsav yam zoo uas nimno twb muaj lawm. Lub tsevntaub uas Yexus mus ua haujlwm hauv, lub ntawd tseemceeb dua thiab zoo dua lub qub. Lub ntawd tsis yog neeg txhais tes ua thiab tsis yog lub uas Vajtswv tsim cia rau hauv ntiajteb no” (Henplais 9:11).
Lus nug rau sawvdaws xav:
- Aloos cev tsoos tsho dawbhuv zoo li cas thiab dawbhuv rau leejtwg?
- Vim licas lub meejmom ua povthawj hlob yuav tsum tsa rau tej menyuam ib tiam dhau rau ib tiam?
- Zaj kawm no qhia rau peb yam dabtsi?
Ib tsoom cov mloog txhua tus,
Vajtswv yog tus muab qauv ua cev tsoos tsho tshwjxeeb thiab muaj nqis rau Aloos uas yog tus povthawj hlob hnav, kom nws muaj meejmom yuav sawvcev ntawm tus Tswv haivneeg (Khiavdim 28:2). Cev ris tsho dawbhuv no muaj daim ntaub npog hauvsiab, lub tsho efaus, lub tsho ntev, lub tsho txaij, txoj phuam ntoo thiab siv sia (Khiavdim 28). Ib xyoos twg tus povthawj hlob tau hnav cev tsoos tsho no mus ib zaug mus rau hauv chav uas Dawbhuv kawg nkaus ua kevcai fij khoom theej txhoj rau nws thiab cov pejxeem. Aloos ua povthawj hlob mus txog thaum nws tuag. Tomqab Aloos tuag lawm mam muaj ib rooj kevcai tsa cov povthawj tshiab txwm xya hnub xaiv Aloos cov tub ib tug los hloov nws chaw ua tus povthawj hlob thiab txais cev tsoos tsho dawbhuv ntawd. Lub meejmom ua povthawj hlob yuav tsum ua li ntawd mus ib tiam dhau ib tiam rau yav tom ntej (nqe 29).
Tibneeg muaj tus yamntxwv ua txhaum, pheej ntshaw ua yam tawmtsam tus Tswv. Yog li ntawd, tus Tswv thiaj qhia muaj rooj kevcai theej txhoj rau Nws haivneeg yuav tsum ua txhua lub xyoo. Nyob rau tiam Vajluskub Qub tus Tswv haivneeg yuav tsum muaj ib tug povthawj hlob los ua rooj kevcai theej txhoj ntawd. Los txog tiam Vajluskub Tshiab, Tswv Yexus yog peb tus Povthawj Hlob zoo kawg nkaus thiab ua tes haujlwm ntawd mus ibtxhis. Txawv cov povthawj hlob hauv tiam Vajluskub Qub, Tswv Yexus tsis fij khoom theej Nws lub txhoj. Yexus yog Vajtswv tus menyuam Yaj uas tsis muaj ib qhov phem, Nws tuag tib zaug xwb txhiv tau tibneeg ntiajteb lub txim thiab theej tau tus uas ntseeg Nws lub txhoj. Feem ntawm peb yog txais yuav Tswv Yexus tus uas txhiv peb tej kev txhaum thiab theej peb lub txhoj kom peb ua tau neeg tshiab. Dhau qhov ntawd, peb yuav tsum niaj hnub thov Vaj Ntsujplig qhia kom peb paub lees kev txhaum, thov tus Tswv zam tej kev txhaum uas peb niaj hnub yuam kev ua thiab mloog tus Tswv lus kawg siab kawg ntsws.
Qhov uas Vajtswv saib Aloos thiab nws cov tub muaj nuj nqis thiab lawv muaj meejmom yog los ntawm cev tsoos tsho dawbhuv uas lawv hnav, qhov ntawd ua rau peb xav txog Tswv Yexus cov lus hais: “Tus uas xav ua kuv tus tubtxib, tus ntawd yuav tsum nrog kuv mus, thiab kuv nyob qhov twg kuv tus tubtxib yuav nrog kuv nyob qhov ntawd. Kuv Txiv yuav qhuas tus uas ua kuv tus tubtxib” (Yauhas 12:26). Tibneeg txojsia luv kawg li, cia li zeem paub yus lub caij nyoog ua neej nyob thiab thov tus Tswv pub tswvyim kom peb paub siv txhua lub sijhawm muaj nqis, txawj ua haujlwm tawg paj txi txiv pub rau tus Tswv, ua li ntawd peb yuav tau tus Tswv qhuas. Ua tus Tswv haujlwm tsis yog vim peb cev tsoos tsho hnav tiamsis yog vim peb hlub lwm tus thiab ua tus Tswv haujlwm kawg siab kawg ntsws xwb.
Thov Vajtswv,
Ua Tswv Yexus tsaug, Koj tau los tuag txhiv nyuam yaus! Thov Koj pab nyuam yaus paub nrhiav kev sib raug zoo nrog Koj, nrhiav yam Koj nyiam thiab muab txhua lub sijhawm ua Koj tes haujlwm pab cov ntseeg saib kom tseemceeb. Amees.
Ib tsoom cov mloog uas hmov thiab tshua,
Peb txiav txim siab yuav hloov yam dabtsi thaum kawm dhau zaj hnub no?
Nyeem Vajluskub hauv peb lub xyoo: Yauj 1:1-2:10
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
