Klei Aê Diê Blŭ: Klei Kbiă 29:10-14
Êlan kliăng: “Sĭt nik tui si klei bhiăn păt čiăng jih jang mnơ̆ng arăng bi doh hŏng êrah, leh anăn tơdah amâo mâo ôh êrah tuh, amâo mâo klei pap brei kơ klei soh ôh” (Hêbrơ 9:22).
Klei êmuh ksiêm mĭn: Ya jing sa drei êmô knô dam hlăm klei mđĭ jing khua ngă yang? Ya klei ih ƀuh djŏ tuôm kơ pô mơ̆ng klei bhiăn anei?
Arăng ngă êlâo klei bhiăn myơr hlăm klei ngă yang pap klei soh hlăm klei bhiăn mđĭ jing khua ngă yang. Kyua Aê Diê jing pô doh jăk, amâo mâo ôh pô dưi nao giăm Ñu wăt tơdah hlei pô jing Aê Diê ruah. Phung nao giăm Aê Diê brei dưi bi doh hluê si klei Ñu kčah. Mnơ̆ng myơr tal êlâo jing êmô knô dam (êlan 2) dưi pioh jing mnơ̆ng myơr ngă yang kơ klei soh. Klei bhiăn anei dưi hlue ngă snei: Y‑Môis srăng ba êmô knô nao ti anăp sang čhiăm, êmô anei jing mnơ̆ng hrô kơ Y‑Arôn leh anăn kơ phung khua ngă yang. Leh Y‑Arôn leh anăn phung anak êkei ñu dưm kngan ti kŏ êmô anăn, djăp mta klei soh diñu dưi dlăng msĕ si ba kơ mnơ̆ng anăn leh. Leh anăn Y‑Môis srăng mdjiê êmô anăn ti anăp Yêhôwa, ti ƀăng bhă sang čhiăm (êlan 11). Bruă ngă anei čiăng lač kơ Y‑Arôn leh anăn phung anak êkei ñu tŭ klei bi kmhal kơ klei soh diñu leh anăn Aê Diê yap diñu jing doh jăk.
Leh anăn êrah êmô knô dưi mmia hlăm ki knưl ngă yang leh anăn tuh êrah ti jơ̆ng knưl ngă yang. Hlue si klei bhiăn Aê Diê, mnơ̆ng myơr tuh êrah ngă kơ knưl ngă yang dưi doh jăk (Hêbrơ 9:21-22). Jih prăi guôm prôč tiê, anôk hgăl prŏng hlăm tiê, dua asăr boh ƀleh leh anăn prăi guôm digơ̆, leh anăn čuh ti dlông knưl. Ƀiădah kđeh êmô knô, klĭt, leh anăn eh ñu; ñu jing mnơ̆ng ngă yang kơ klei soh anăn brei čuh ti êngao wăl ƀuôn (êlan 14).
Aê Diê jing pô doh jăk, Ñu amâo dưi ôh amâo bi kmhal kơ klei soh anak mnuih ngă leh. Grăp čô mnuih soh leh sơaĭ, brei tŭ klei bi kmhal jing klei djiê ti anăp Aê Diê. Khădah snăn, Aê Diê jing klei khăp, hŏng knuih klei khăp Aê Diê amâo hơĭt ai ôh ƀuh anak mnuih tŭ klei bi kmhal kjham kjhuê̆. Kyua anăn, Ñu mâo leh hdră msir jing djiê hrô kơ anak mnuih. Bi tui klei soh dưi bi êdah hlăm bruă myơr mnơ̆ng hdĭp jing mnơ̆ng myơr čuh hlăm Klei Bi Mguôp Hđăp jing klei bi hmô mđing kơ sa knăm ngă yang kluôm ênŭm, Êđai Biăp Aê Diê. Khua Yang Yêsu lač: “kyuadah anei jing êrah kâo, êrah kơ klei bi mguôp tuh kyua lu mnuih čiăng pap brei klei soh diñu” (Y‑Mathiơ 26:18). Khua Yang Yêsu jing Pô Hrih Mjing mdưm leh pô jing pô hrô brei, Ñu tŭ klei arăng pơ̆ng ti kyâo bi kal ti čư̆ Gôlgôtha đưm dih kyua klei soh jih jang anak mnuih, čiăng kơ hlei pô tŭ ư jao klei ktrŏ pô kơ Ñu snăn dưi pap brei klei soh leh anăn dưi bi mrâo jing anak Aê Diê doh jăk, bŏ hŏng klei khăp.
Drei năng mơ̆ hŏng klei Khua Yang Yêsu djiê hrô kơ pô?
Wah lač: Ơ Khua Yang! Kâo jing sa čô mnuih soh năng hŏng klei djiê ƀiădah Aê Diê khăp kơ kâo. Kâo bi mni lač jăk kơ Ih kyua mơak djiê hrô kơ kâo, brei kơ kâo ao kpă ênô Ih čiăng kơ kâo dưi nao giăm Aê Diê doh jăk. Akâo kơ Ih đru kâo ƀrư̆ hruê ƀrư̆ jing msĕ si Khua Yang hĭn hlăm knuih doh jăk leh anăn bŏ hŏng klei khăp.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 34:29 – 35:19
Kênh Youtube BHKTHN:
