Khiavdim 29:10-14
Nqe cim:
“Qhov tseemceeb, raws li Vajtswv txoj Kevcai yuav luag txhua yam yuav tsum muaj nqaij ntuag ntshav nrog thiaj raws li kevcai. Yog nqaij tsis ntuag ntshav tsis nrog Vajtswv yeej zam tsis tau neeg lub txim” (Henplais 9:22).
Lus nug rau sawvdaws xav:
- Muab tus heev nyuj uas tsis muaj qhov phem tua fij ua kevcai tsa povthawj muaj lub ntsiab li cas?
- Peb zeem paub txoj kevcai ntawd muaj yam dab tsi ntsigtxog peb?
Kevcai tua tsiaj fij theej txhoj xub ua ua ntej mam ua kevcai tsa povthawj. Vim Vajtswv yog tus dawbhuv kawg nkaus, tsis muaj tug yuav txav ti Nws txawm hais tias cov tau Vajtswv xaiv los ib yam nkaus. Tus uas los cuag Vajtswv yuav tau ua kevcai ntxuav raws li Nws txoj cai teem tseg. Yam khoom fij xub thawj yog tus heev nyuj uas tsis muaj qhov phem (nqe 2) muab tua fij ntxuav kev txhaum. Kevcai ntxuav kev txhaum tau ua li no: Mauxes cab tus heev nyuj los nres ntawm hauv ntej lub Tsevntaub, tus heev nyuj yog los nyob Aloos thiab cov povthawj lub chaw. Thaum Aloos thiab nws cov tub tiag tes rau saum tus heev nyuj taubhau, suav hais tias lawv tej kev txhaum tau muab rau tus nyuj ntawd ris. Thaum ntawd, Mauxes tua tus heev nyuj tabmeeg tus Tswv, ntawd qhov rooj Tsevntaub sib ntsib (nqe 11). Ua li ntawd xav qhia hais tias, Aloos thiab nws cov tub twb raug txim rau lawv tej kev txhaum thiab tau Vajtswv suav hais tias lawv yog neeg dawbhuv lawm.
Tom qab ntawd muab ntiv tes tub cov ntshav nyuj mus pleev rau cov kub ntawm lub thaj. Raws li Vajtswv txoj cai, tus tsiaj tej ntshav yuav ua rau lub thaj dawbhuv (Henplais 9:21-22). Tas nrho tej roj npog plab hnyuv, npog plawv, npog raum thiab ob lub raum puavleej coj mus hlawv fij saum lub thaj. Tej nqaij thiab txhua yam seem ntawm tus nyuj puavleej muab mus hlawv rau nraum sab ntug yeej nraud huv tib si (nqe 14).
Vajtswv lub txwm keeb yog dawbhuv, Nws yuav tsis zam rau tibneeg tej kev txhaum uas lawv ua. Txhua tus tibneeg puavleej ua txhaum thiab sawvdaws yuav raug Vajtswv rau txim. Tiamsis tus Tswv yog kev hlub, los ntawm Nws nplooj siab hlub thiaj tsis xav cia tibneeg raug txim txomnyem ntsuav. Yog li ntawd, Nws thiaj npaj kev muab yam los tuag hloov chaw. Kevcai ntxuav kev txhaum uas tus tsiaj raug tua hloov chaw hauv qub kevcai yog ua qhia txog yam khoom fij uas muaj tiav log ntawm Vajtswv tus Menyuam Yaj. Tswv Yexus hais tias: “khob cawv txiv hmab no, yog Kuv cov ntshav uas ua lub homthawj nias rau Vajtswv Txojlus cog tseg. Kuv cov ntshav no yuav ntws los ntxuav ntau leej tej kev txhaum huv tibsi mus” (Mathais 26:28). Tswv Yexus yog tus tsim tiamsis Nws muab Nws los ua tus hloov chaw, Nws cia luag coj mus ntsia rau saum ntoo khaublig ntawm roob khaulakhauthas hnub thaud vim tibneeg tej kev txhaum, kom leejtwg los muab tej kev txhaum tso rau Nws ris, ces tau dim txim thiab tau rov los ua Vajtswv tus uas zoo kawg nkaus li menyuam.
Peb puas ua lub neej phim yog tus uas tau Tswv Yexus tuag hloov chaw lawm?
Thov Vajtswv,
Tus Tswv! Nyuam yaus yog ib tug neeg txhaum uas tsimnyog raug puastsuaj mus tiamsis Koj tseem hlub. Nyuam yaus ua Koj tsaug uas Koj tau tuag hloov nyuam yaus chaw, pub nyuam yaus tau los ua Vajtswv tus uas zoo kawg nkaus li menyuam. Thov pab nyuam yaus yim hnub yim muaj lub neej zoo thooj tus Tswv Koj ntawm kev dawbhuv thiab kev hlub. Amees.
Nyeem Vajluskub hauv peb lub xyoo: II.Xwmtxheej Vajntxwv 34:29-35:19
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
