Klei Aê Diê Blŭ: Klei Bi hriêng 19:2-3
Êlan kliăng: “Klei mluk sa čô mnuih bi rai klei hdĭp ñu, ƀiădah lĕ ai tiê ñu ngêñ kơ Yêhôwa” (Klei Bi Hriêng 19:3)
Klei êmuh ksiêm mĭn: Si klei mtao Y‑Salômôn mtô djŏ kơ mnuih kƀah klei thâo săng leh anăn mnuih mluk? Si knuih mnuih mluk tơdah ñu ngă klei soh? Ya klei brei drei ngă čiăng hdĭp djŏ tui si klei Aê Diê blŭ leh anăn si knuih drei tơdah ngă soh hŏng Ñu?
Hlăm dua êlan Klei Bi Hriêng 19:2-3, Mtao Y‑Salômôn mtô anak ñu thâo knhuah hdĭp sa čô mnuih mluk čiăng anak ñu hdĭp hŏng klei thâo mĭn. Pruê̆ blŭ “kƀah klei thâo săng” hlăm êlan 2 bi êdah klei jing sa čô “mnuih mluk” hlăm êlan 3. Mnuih thâo mĭn jing mnuih thâo huĭ mpŭ kơ Aê Diê kyuadah “Klei huĭ mpŭ kơ Yêhôwa jing klei kčưm kơ klei thâo săng; phung mluk bi êmut kơ klei thâo mĭn leh anăn klei bi hriăm” (Klei Bi Hriêng 1:7). Mdê hŏng mnuih thâo mĭn, mnuih mluk bi kdơ̆ng hŏng hdră êlan leh anăn klei Aê Diê mtă. Boh knhal tuč bruă mnuih mluk ngă jing atăt kơ klei bi msoh leh anăn ngă klei soh kyua kƀah klei gĭr, ruăt kuăt leh anăn kƀah klei răng hlăm klei hdĭp. Kdlưn hĭn kơ anăn, mnuih mluk “bi rai klei hdĭp ñu” pô. Mơ̆ng klei dlăng hơăi mang kơ klei bhiăn, klei Aê Diê mtă, mnuih ƀai hdĭp soh hŏng hnơ̆ng Aê Diê kčah. Klei diñu dôk dơ̆ng ƀơ̆ng huă hŏng klei jhat ƀai bi kram klei hdĭp diñu hlăm klei soh, tŭ klei Aê Diê bi kmhal (Klei Bi Hriêng 11:31; 14:22). Ƀiădah kjham kjhuê̆ hĭn, tơdah leh diñu ngă soh leh anăn tŭ klei bi kmhal, diñu amâo kmhal kơ klei soh ôh, ƀiădah ƀuah Aê Diê. Klei mnuih mluk khăng kŏ amâo djŏ knŏng bi rai mă klei hdĭp diñu ênuk anei ôh ƀiădah wăt srăng tŭ klei bi kmhal hlŏng lar hlăm war pui mơh.
Aê Diê brei Klei Ñu Blŭ kơ anak mnuih jing mnơ̆ng ktrâo êlan kơ klei hdĭp, atăt gai grăp čô pô đăo kơ Krist thâo hdĭp hŏng klei thâo mĭn čiăng dưi mă tŭ klei jăk mơak. Kyuanăn, akâo Khua Yang đru grăp čô drei khăp hriăm Klei Ñu Blŭ, kpĭ mjuăt hlăm klei ksiêm mĭn leh anăn gưt kơ klei Ñu mtă. Mbĭt hŏng klei anăn, knang kơ Yang Mngăt Jăk mtô, bi hriăm, mkra mjuăt, leh anăn đru drei bi kdơ̆ng hŏng klei kđeh čiăng, atăt gai drei kơ klei kpă ênô (Galati 5:16-18). Grăp blư̆ ngă soh, brei drei akâo kơ Yang Mngăt Jăk êñơ̆k kơ drei, đru grăp čô drei thâo kmhal kơ klei soh leh anăn lŏ wĭt êbat hlăm êlan Khua Yang. Klei Aê Diê Blŭ mtă kơ grăp čô phung anak čô Ñu brei răng snei: “Snăn brei ih hdơr klei ih mă tŭ leh anăn hmư̆ leh; brei ih djă pioh klei anăn leh anăn kmhal hĕ. Tơdah ih amâo mdih ôh, Kâo srăng hriê msĕ si sa čô mnuih knĕ, leh anăn ih amâo srăng thâo ôh ya mông Kâo srăng truh kơ ih” (Klei Bi Êdah 3:3). Tơdah diih ngă soh kmhal bĕ hŏng Aê Diê, đăm ƀuah Ñu ôh, leh anăn kăn bi luč mông găl lŏ kplăk wĭt kơ êlan kpă ênô rei čiăng kơ đăm tŭ klei bi kmhal hlŏng lar.
Drei kmhal mtam mơ̆ tơdah ngă soh amâodah ƀuah Aê Diê kyua klei Ñu mkra mjuăt?
Wal lač: Ơ Khua Yang, kâo bi mni kơ Ih kyua Ih brei leh Klei Ih Blŭ kơ kâo. Bi mni kơ Ih kyuadah Ih pap brei leh klei soh kâo tơdah kâo hưn klei soh kâo leh anăn kmhal. Akâo kơ Khua Yang đru kâo thâo hdĭp djŏ tui si klei Ih čiăng leh anăn đru kâo thâo ƀuh klei soh leh anăn kmhal hĕ mtam hŏng Khua Yang.
Dlăng Klei Aê Diê Blŭ hlăm tlâo thŭn: Y‑Êskiêl 6:1–7:9.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
