2 Petus 1:19-21
Nqe cim:
“Rau qhov tej lus qhia tshwm ntawd tsis yog neeg qhia, tiamsis yog Vaj Ntsujplig tus Dawbhuv tshoov neeg lub siab kom lawv qhia Vajtswv txojlus xwb” (2 Petus1:21)
Lus nug xav:
– Dabtsi ua rau cov thwjtim haj yam ntseeg siab ruaj rau cov Cevlus tej lus qhia tom Phau Vajluskub qub?
– Nws ntuas Vajtswv haivneeg dabtsi thaum uas hais meej hais tias “Vaj Ntsujplig tus Dawbhuv tshoov neeg lub siab”?
– Peb tau txhawb zog los ntawm Vaj Ntsujplig kev pab nyeem kawm Vajtswv Txojlus li cas?
Timthawj Petus qhia txog tus Tswv Yexus uas nws tus kheej tau pom kiag lub hwjchim ci ntsa iab saum lub roob thaum Yexus hloov cev (2 Petus 1:16-18). Qhov uas nws tau pom ntawd yog ib qho povthawj uas tsimnyog ntseeg siab thiab ua rau thwjtim Petus haj yam ntseeg ruaj hais tias tej lus uas cov cev Vajtswv lus tau hais ua ntej txog Yexus Khetos txoj kev rov qab los yeej muaj tseeb tiag tiag. Tsis tas li ntawd, Thwj tim Petus kuj siv qhov povthawj no los ceebtoom cov ntseeg hais tias, “rau qhov tej lus ntawd zoo ib yam li lub teeb uas ci hauv qhov tsaus ntuj…” (nqe 19). Vajtswv haivneeg niaj hnub no kuj tau txais lo lus ceebtoom li ntawd thiab. Thaum peb tseem tos hnub uas tus Tswv yuav rov qab los, peb yuav tsum nyeem, kawm, xav txog thiab ua raws li Vajtswv Txoj Lus uas yog lub teeb ci rau peb txoj hau kev, pab kom cov ntseeg rhais ruam mus ruaj khov, kovyeej kev txhaum thiab kev tuag. Txhua yam yuav nthuav pom meej thaum lub sijhawm “kaj ntug”, uas yog thaum Tswv Yexus Khetos nqis saum ntuj rov qab los.
Timthawj Petus hais meej: “…yeej tsis muaj ib tug uas yuav muaj tswvyim txhais tau tej lus qhia tshwm uas cov cev Vajtswv lus tau sau tseg lawm. Rau qhov tej lus qhia tshwm ntawd tsis yog neeg qhia…” (nqe 20-21). Vaj Ntsujplig tau tshoov cov cev Vajtswv lus, kom lawv hais thiab sau Vajtswv Txojlus tawm. Lo lus “tshoov” txhais tau tias “txhawb mus, coj mus”, zoo ib yam li lub nkoj uas muaj daim ntaub nkoj thiab raug cua tshuab kom txav mus. Cov cev Vajtswv lus yog cov uas sau Vajlugkub, ib yam li tus neeg uas tsa daim ntaub nkoj, lub nkoj txav mus vim yog cua tshuab thiaj ua rau lub nkoj mus. Ib yam li ntawd, Vaj Ntsuj Plig yog tus pub Vajtswv Txojlus rau cov Cevlus. Nws kuj yog tus yuav pab cov neeg nyeem thiab mloog Vajtswv Txojlus hauv txhua tiam neeg, kom lawv tau txais tej lus qhia uas Vajtswv xav qhia rau txhua tus. Tsis muaj leejtwg muaj cai txhais Vajlugkub raws li nws lub tswv yim thiab xav hais tias qhov ntawd yog qhov tseeb li.
Vajtswv Txojlus yog Vaj Ntsujplig tshoov cov cev Vajtswv lus kom sau tseg, yog li ntawd peb thiaj muaj peevxwm ntseeg thiab tso siab rau Vajtswv Txojlus hauv Vajlugkub. Qhov no kuj ua rau peb haj yam muaj siab xav nyeem, tshawb nrhiav thiab kawm Vajtswv Txojlus. Thaum peb kawm Vajlugkub, peb yuav tsum muaj lub siab txo hwjchim, qhib peb lub siab thov Vaj Ntsujplig coj peb txoj kev, hloov peb lub neej thiab cia peb dhau los ua tus neeg uas Vajtswv xav tau. Thov Vajtswv pab kom peb rau siab ntso kawm thiab tshawb nrhiav Vajtswv Txojlus, kom Nws Txojlus ua lub teeb ci coj peb txoj kev hauv lub neej, kom peb tsis txhob yuam kev. Cia peb thov Vaj Ntsujplig ua teeb ci kom peb to taub Vajtswv Txojlus tsis yuam kev. Tshwjxeeb tshaj yog, thaum Vaj Ntsujplig ceebtoom, qhuab ntuas thiab kho peb, cia peb txo hwjchim mloog raws Nws kev coj, kom peb thiaj ua neej muaj nqi rau Vajtswv thiab lwm tus.
Thov Vajtswv,
Tus Tswv, nyuam yaus ua Koj tsaug uas nyuam yaus muaj Koj Txojlus, uas yog Txojlus uas Vaj Ntsujplig tau tshoov neeg kom sau tseg. Thov pab nyuam yaus nco hais tias Koj Txojlus yog lub hauv paus ntawm kev txawj ntse thiab yog lub teeb ci rau nyuam yaus lub neej. Thov Koj pab kom thaum nyuam yaus kawm Koj Txojlus, nyuam yaus txo hwjchim thiab nyob rau hauv Vaj Ntsujplig txoj kev qhia thiab Nws tej lus ceebtoom. Nyuam yaus tuav Tswv Yexus Khetos lub npe thov, Amees.
Yam twg qhia tau hais tias peb vamkhom Vaj Ntsujplig thaum peb kawm Vajtswv Txojlus?
Nyeem Vajluskub hauv peb lub xyoos: Yauj 23
Kênh Youtube BHKTHN:
